استانادا سارىارقا اۋداندىق «بەلسەندى ۇزاق ءومىر ءسۇرۋ ورتالىعى» مەن «ەلوردا اقساقالدارى كەڭەسى» قوعامدىق بىرلەستىگىنىڭ ۇيىمداستىرۋىمەن «قىمىزمۇرىندىق» مەرەكەسى ءوتتى.
اعا بۋىن وكىلدەرىنىڭ ەجەلدەن تويلانىپ كەلە جاتقان قىمىزمۇرىندىق مەرەكەسىن دارىپتەپ, ونىڭ ماڭىزدىلىعىن ناسيحاتتاۋ ماقساتىندا وتكەن مادەني ءىس-شاراعا ورتالىقتىڭ ونەرپازدارى, زەينەتكەرلەر مەن جاستار قاتىستى. استانا توڭىرەگىندەگى اۋىلداردا اشىتىلعان قىمىزدىڭ ءدامىن ءداستۇر بويىنشا الدىمەن اقساقالدار تاتىپ, جينالعان جۇرتقا باتا بەردى. وسىدان كەيىن ويىن-ساۋىققا كەزەك بەرىلدى.
قىمىزمۇرىندىق – بيە بايلاپ, العاشقى قىمىز ءىشۋ تويى. قۇلىن بايلانىپ, بيە ساۋىلىپ, ونىڭ ءسۇتى قورلانىپ اشىتىلعان سوڭ, ەكى-ءۇش كۇن بويى جينالعان قىمىزعا اقساقالدار مەن كورشى-قولاڭ «قىمىزمۇرىندىققا» شاقىرىلادى. ياعني العاشقى قىمىز ادامدارعا سالتاناتپەن ۇسىنىلىپ, «كوپكە بۇيىرسىن» دەگەن تىلەكپەن بەرىلەدى. اقساقالدار ءۇي يەسىنە راقمەت ايتىپ, باتاسىن بەرەدى. وسىلايشا بيە بايلانعان كەزدە «قىمىزمۇرىندىق» جاساعان حالقىمىز كۇزدە سوڭعى قىمىزدان اۋىل اقساقالدارىنا تاعى دا ءدام تاتتىرىپ, «سىرگەجيار» جاساعان. حالىقتىڭ بۇل ءداستۇرى دە قوناقجايلىلىقتى, جومارتتىق پەن مارتتىكتى كورسەتەدى. دەگەنمەن, سوڭعى كەزدەرى بۇل ءداستۇر دە ۇمىتىلا باستاعان ەدى.
– قىمىزمۇرىندىق ۇمىتىلىپ بارا جاتقان ءداستۇرىمىز ەدى. بۇگىن وسى ءداستۇردى باس قالانىڭ تورىندە جاڭعىرتۋدىڭ ءمانى وتە زور. بۇل ەل بويىنشا تويلايتىن مەرەكە. سوندىقتان دا ءبىز قۇزىرلى ورىندارعا, مينيسترلەرگە «قىمىزمۇرىندىق» مەرەكەسىن رەسپۋبليكا بويىنشا تويلاساق دەگەن ءوتىنىش ايتىپ جاتىرمىز, – دەدى ءىس-شاراعا ارنايى قاتىسۋعا كەلگەن قوعام قايراتكەرى, اعارتۋشى ۇستاز, قازاقستان رەسپۋبليكاسىنىڭ مادەنيەت قايراتكەرى وسپان سۇلەيمەنۇلى.
مەرەكەدە قازاقتىڭ ۇمىت بولىپ بارا جاتقان تاعى ءبىر ونەرى – ورىمشىلىك تە جۇرت نازارىنا ۇسىنىلدى. ورىمدەي جاستار سول جەردە قامشى ءورىپ, ءوز ونەرلەرىن كورسەتتى.
«ورىمشىلىكتى تالعات دەيتىن اعايىمنان ۇيرەندىم. قازىر 6, 8, 12 تاسپادان ءورىم ورە الامىن. ورىمشىلىك ونەرگە قاتتى قىزىعامىن, بولاشاقتا ۇلتىمىزدىڭ وسى ونەرىن ۇمىت قالدىرماي, دامىتۋعا ۇلەسىمدى قوسقىم كەلەدى» دەدى مۇحتار اۋەزوۆ اتىنداعى №86 مەكتەپ گيمنازيانىڭ وقۋشىسى رامازان تۇرعانبەك.
ايالا ابزالقىزى,
ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ ستۋدەنتى
