«قىتايداعى قازاقستاننىڭ تۋريزم جىلى» اياسىندا قر-دىڭ قحر-داعى ەلشىلىگى قر مادەنيەت جانە اقپارات مينيسترلىگىنىڭ قولداۋىمەن دەچجوۋ (شاندۋن ولكەسى) جانە لانفان (حەبەي) قالالارىندا روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ گاسترولىن ۇيىمداستىردى, دەپ حابارلايدى astana-akshamy.kz.
دەچجوۋ قالاسىندا وتكەن كونتسەرتتىڭ اشىلۋ سالتاناتىندا قازاقستاننىڭ قىتايداعى ەلشىلىگىنىڭ كەڭەسشى-ۋاكىلى اسقار شالقارباەۆ جانە شاندۋن ولك. سىرتقى ىستەر باسقارماسى باسشىسىنىڭ ورىنباسارى سۋن ەباو ءسوز سويلەدى.
قازاقستاندىق ديپلومات كورەرمەندەردى قازاقستان مەن قىتاي اراسىنداعى ىنتىماقتاستىق پەن ءوزارا ءىس-قيمىلدىڭ نەگىزگى جەتىستىكتەرى تۋرالى حاباردار ەتتى. بيىلعى جىل «قازاقستاننىڭ قىتايداعى تۋريزم جىلى» اياسىندا ءوتىپ جاتقانىنا نازار اۋدارىپ, قاتىسۋشىلاردى قازاقستاننىڭ كورىكتى جەرلەرىنە بارۋعا شاقىردى.
سۋن ەباو ءوز سوزىندە قازاقستان قىتايدىڭ جاقىن دوسى جانە سەنىمدى سەرىكتەسى ەكەنىن اتاپ ءوتتى. ول ەكى ەل اراسىنداعى مادەني ىنتىماقتاستىقتىڭ ءوسىپ كەلە جاتقان سەرپىنىن اتاپ, بۇل ەكى ەل اراسىنداعى ماڭگىلىك جان-جاقتى ستراتەگيالىق ارىپتەستىكتى دامىتۋعا قوسىمشا سەرپىن بەرەتىندىگىنە سەنىم ءبىلدىردى.
كونتسەرت باعدارلاماسىنا «استانا سازى» قازاق مەملەكەتتىك فولكلورلىق ءانسامبلى, «گۇلدەر» بي ءانسامبلى, ءداستۇرلى ورىنداۋشىلار ەلمۇر جاڭابەرگەن, ەربولات شالدىبەكوۆ, ارداق بالاجانوۆا, وپەرا انشىلەرى سالتانات احمەتوۆا, مەدەت چوتاباەۆ, سونداي-اق تانىمال ءانشى ءادىلحان ماكيننىڭ قويىلىمدارى كىردى.
ءىس-شارالار تولىق زالمەن ءوتىپ, قوناقتاردىڭ جالپى سانى 2000 استام كورەرمەندى قۇرادى.
