ەلوردادا بۇگىنگە دەيىن قىزىلشا بويىنشا 289 باستاپقى جانە 110 راستالعان جاعداي تىركەلدى. ونىڭ ىشىندە 14 جاسقا دەيىنگى بالالار سانى – 81. قىزىلشانىڭ كۇن سايىن تىركەلۋى 45-تەن 30 جاعدايعا دەيىن ازداپ تومەندەگەنىمەن جاعداي ءالى دە كۇردەلى. ناۋقاستاردىڭ شامامەن 79 پايىزى – قىزىلشاعا قارسى ەكپە الماعان ازاماتتار, اۋرۋدىڭ باستى سەبەبى وسى. ولاردىڭ ىشىندە قىزىلشاعا قارسى ۆاكتسينا العاندار تەك 5 پايىز, ال ۆاكتسينا العان, الماعانى بەلگىسىز ناۋقاستار 16 پايىزدى قۇرايدى.
بۇل تۋرالى استانا قالاسىنىڭ كوممۋنيكاتسيالار قىزمەتىندە استانا قالاسىنداعى قىزىلشانىڭ ەپيدەميولوگيالىق جاعدايى جانە قىزىلشا اۋرۋىن تومەندەتۋ بويىنشا الدىن الۋ شارالارى تۋرالى وتكەن بريفينگتە استانا قالاسىنىڭ باس مەملەكەتتىك سانيتارلىق دارىگەرى سارحات بەيسەنوۆا مەن استانا قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى گۇلناز دوسمىرزاەۆا باياندادى.
2023 جىلى قاراشا ايىنان باستاپ 6 ايدان 10 اي 29 كۇندىك بالالارعا جاپپاي ۆاكتسيناتسيا جۇرگىزىلىپ كەلەدى جانە جەلتوقسان ايىنان بەرى ولارعا 2-4 جاستاعى بالالار قاتارى قوسىلدى. 6 قاراشادان باستاپ بۇگىنگە دەيىن 44 800 بالا ەكپە العان. بۇگىندە ۇلتتىق ۆاكتسيناتسيا كۇنتىزبەسىنە سايكەس ۆاكتسيناتسيا الماعان بالالاردى انىقتاۋ جۇمىستارى جالعاسۋدا. وسىلايشا, 1 جانە 6 جاستا قىزىلشاعا قارسى ەگىلمەگەن 7-18 جاس ارالىعىنداعى انىقتالعان 13 000 بالانىڭ 5 692-ءسى ەكپە العان.
– ناۋقاسپەن بايلانىستا بولعان جاعدايدا 72 ساعات ىشىندە شۇعىل ەكپە الۋعا مۇمكىندىك بارىن اتاپ وتكىم كەلەدى. وسىلايشا ۆاكتسيناتسيا الماي ناۋقاسپەن بايلانىستا بولعان ادامداردى ينفەكتسيادان ۋاقتىلى قورعاۋ جانە ينفەكتسيانىڭ ودان ءارى تارالۋىن بولدىرماۋ ماقساتىندا 2514 ادام ەگىلدى. سوندىقتان جالعىز ءتيىمدى قورعانىس ول ۆاكتسيناتسيا ەكەنىن تاعى ءبىر رەت اتاپ وتەمىن. بالالارىن ۋاقتىلى ەكپە الۋىن قامتاماسىز ەتۋ, ەڭ الدىمەن, اتا-انالاردىڭ جاۋاپكەرشىلىگىندە, – دەيدى س.بەيسەنوۆا.
قىزىلشا بويىنشا ەپيدەميولوگيالىق ماۋسىمنىڭ باسىنان (2023 جىلدىڭ ناۋرىزىنان باستاپ) بۇگىنگى كۇنگە دەيىن قىزىلشانىڭ 1188 جاعدايى تىركەلدى, ونىڭ ىشىندە 14 جاسقا دەيىنگى بالالار اراسىندا 843 جاعداي. راستالعان جاعدايلاردىڭ جالپى سانىنان زەرتحانالىق راستالعان 1143 (96%) جاعداي, كلينيكالىق راستالعان 45 (4%) جاعداي.
اۋىرعاندار سانىنىڭ ءوسۋىنىڭ باستى سەبەپتەرىنىڭ ءبىرى – ۆاكتسيناتسيا دەڭگەيىنىڭ جەتكىلىكسىزدىگى. الەمدىك ستاتيستيكا كورسەتكەندەي, COVID-19 پاندەمياسى كەزىندە قىزىلشاعا قارسى ۆاكتسيناتسيا نەمەسە رەۆاكتسيناتسيا الماعان حالىقتىڭ سانى ارتتى. قىزىلشانىڭ تارالۋىن بولدىرماۋ ءۇشىن توپتىق يممۋنيتەتىنىڭ جالپى كورسەتكىشى بۇكىل حالىق اراسىندا 85-90 پايىزدان كەم بولماۋى كەرەك
