بۇگىن قازاقستاندا مەملەكەتتىك رامىزدەر كۇنى اتالىپ ءوتتى. اتاۋلى كۇنگە وراي ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ باس عيماراتى الدىنداعى ۇستازدار اللەياسىندا «رامىزدەرىم – ماقتانىشىم!» مەرەكەلىك ءىس-شاراسى وتكىزىلدى. ونى استانا قالاسىنىڭ ءبىلىم باسقارماسى جانە ادىستەمەلىك ورتالىعى ۇيىمداستىردى.
مەملەكەتتىك رامىزدەرىمىزدى ۇلىقتاۋعا ارنالعان سالتاناتتى ءىس-شاراعا ەلوردالىق مەكتەپكە دەيىنگى ۇيىمداردىڭ تاربيەلەنۋشىلەرى مەن پەداگوگتەرى, قازاقستان رەسپۋبليكاسى وقۋ-اعارتۋ مينيسترلىگىنە قاراستى “بالالاردى ەرتە دامىتۋ ينستيتۋتى”, ءبىلىم باسقارماسىنىڭ وكىلدەرى, شاقىرىلعان قوناقتار مەن الەۋمەتتىك سەرىكتەستەر قاتىستى.
بالاباقشا تاربيەلەنۋشىلەرى قىلقالاممەن مەملەكەتتىك رامىزدەرىمىزدى – ءانۇران, ەلتاڭبا, تۋدى ۇلىقتاپ, ءتۇرلى-ءتۇستى بوياۋ ارقىلى سۇيىسپەنشىلىگىن جەتكىزسە, ۇلتتىق ناقىشتا, اسپانكوك ءتۇستى كيىنگەن جۇلدىزداي جارقىراعان ورەندەر اشىق اسپان استىندا بي بيلەپ, تاقپاق ايتىپ, ءان شىرقاپ, مەرەكەلىك كوڭىل-كۇي سىيلادى, ويىن ويناپ, شىنىعىپ, ءتاتتى جەپ, اينالانى شاتتىققا بولەدى.
مەملەكەتتىك رامىزدەر – حالقىمىزدىڭ رۋحىن, ۇلتتىق سالت-ساناسىن, قاھارماندىعى مەن دانالىعىن, بولاشاققا ءۇمىتىن, ارمان-تىلەگىن جەتكىزەتىن ەرەكشە قۇندى بەلگىلەر. كوك تۋىمىز كوكتە جەلبىرەپ, ءانۇرانىمىز اركەز شىرقالىپ, ەلتاڭبامىز ەلدىگىمىز بەن بىرلىگىمىزدىڭ سيمۆولىنا اينالعانى سوعان دالەل.
جيىنعا قاتىسقان پەداگوگتار, تاربيەلەنۋشىلەر, اتا-انالار, قالا تۇرعىندارى تاۋەلسىزدىكتىڭ قاسيەتتى رامىزدەرىن دە ەرەكشە قادىرلەپ, قاستەرلەپ, قادىرىن ءتۇسىنۋ كەرەكتىگىن ايتتى. ءاربىر ازامات قازاقستاننىڭ تۋىن, ەلتاڭباسىن, ءانۇرانىن تۇمارداي قاسيەت تۇتۋى قاجەت. تاۋەلسىزدىگىمىز تۇعىرلى بولۋى ءۇشىن, ەلىمىزدىڭ سيمۆولى – مەملەكەتتىك رامىزدەردى قۇرمەتتەۋ – ءبارىمىزدىڭ مىندەتتى پارىزىمىز.
– مەملەكەتتىك رامىزدەر – ەل دامۋىنىڭ اجىراماس بولىگى. سوندىقتان قازاقستاندىقتاردىڭ وسى رامىزدەرگە دەگەن قۇرمەتى, ولاردى بويتۇمارداي قاستەرلەۋى ەرەكشە سەزىلىپ تۇرۋى ءتيىس. رامىزدەر ارقىلى ەلىمىزدى بۇكىل الەم تانيدى. ويتكەنى وندا قازاق حالقىنىڭ باستان وتكىزگەن تاريحى, مادەنيەتى مەن ءداستۇرى كورىنىس بەرەدى. جاستاردىڭ وتانسۇيگىشتىك سەزىمىن وياتادى, پاتريوتيزمگە ۇندەيدى, باتىلدىققا تاربيەلەيدى. العاشقى جىلدارداعىداي ەمەس, قازىرگى كەزدە ەلىمىزدىڭ ءانۇرانى ءماتىنىن بىلمەيتىن جان كەمدە-كەم. ول ناسيحاتتىڭ جەمىسى دەسەك, قاتەلەسپەيمىز, – دەدى وقۋ-اعارتۋ مينيسترلىگىنىڭ بالالاردى ەرتە دامىتۋ ينستيتۋتى ديرەكتورىنىڭ ورىنباسارى ماريام ەرمانوۆا.
سالتاناتتى ءىس-شاراداعى ەلوردالىق ءبىلىم الۋشىلاردىڭ ونەرى, ءبىلىمى مەرەكەنىڭ شىرايىن اشىپ, پاتريوتتىق رۋحىمىزدى اسقاقتاتا ءتۇستى.
