23 ماۋسىم – پوليتسيا قىزمەتكەرلەرىنىڭ كاسىبي مەرەكەسى. پوليتسيا – قوعامدىق ءتارتىپتىڭ كۇزەتشىسى. ال ءتارتىپ – تىنىشتىعىمىزدىڭ كەپىلى.
ويتكەنى ولار قانداي دا ءبىر مەرەكەدە كوڭىلدەرى الاڭسىز بوپ, ەل قاتارلى دەمالا دا المايدى. وعان مويىندارىنداعى مىندەتتىڭ اۋىرلىعى مۇمكىندىك بەرمەيدى. سولاي بولا تۇرسا دا انتىنا ادالدىعىن بۇزباعان قىراعى ساقشىلارىمىز ءبىر ساتكە دە وزدەرىن بوساڭسىتقان ەمەس. سولاردىڭ ءبىرى – استانا قالاسى پوليتسيا دەپارتامەنتى ارنايى جۇمىلدىرۋ جانە دايارلاۋ باسقارماسىنىڭ ەرەكشە تاپسىرمالار بويىنشا اعا ينسپەكتورى, پوليتسيا پودپولكوۆنيگى شالقار بارجاقسىنوۆ.
ول ىشكى ىستەر ورگاندارىندا قىزمەتىن 2002 جىلدان باستاپ, ەسىل اۋدانى پوليتسيا باسقارماسىنىڭ جەكە قۇرامىن تىكەلەي قاداعالاپ, ساقشىلاردىڭ كاسىبي دايارلىعىنا جاۋاپتى بولىپ قىزمەت ەتىپ كەلەدى. ءوزى – قويان-قولتىق ۇرىستان جانە ەركىن كۇرەستەن سپورت شەبەرى. ول مىنە, وسى ونەرىن قازىرگى تاڭدا استانا قالاسىنىڭ 5 مىڭعا جۋىق پوليتسيا قىزمەتكەرلەرىنە ۇيرەتىپ ءجۇر. كەيىپكەرىمىز قوعامدىق ورىنداردا پوليتسيا ءوزىن دە, حالىقتى دا قورعاي ءبىلۋى كەرەك دەپ ەسەپتەيتىنىن ايتادى.
– مەن كۇندەلىكتى كەستەگە سايكەس پوليتسيالارعا ءوزىمنىڭ بىلگەن تاجىريبەممەن بولىسەمىن. وندا سپورتتىڭ بىرنەشە تۇرىنەن جانە قارۋ ۇستاۋمەن قاتار قاسكويلەردەن قورعانۋدىڭ امال ءتاسىلىن ۇيرەتىپ, ساباق بەرەمىن. قازىرگى تاڭدا باسقارمادا 25-كە جۋىق ادام قىزمەت ەتەمىز. باسشىلىق قۇرامدى قوسپاعاندا 16-عا تاياۋ ءبىزدىڭ قىزمەتكەرلەرىمىز كۇندە جاتتىعۋ الاڭىندا پوليتسيالاردى ءتۇرلى قورعانۋ تاسىلدەرىنە جاتتىقتىرادى. ويتكەنى پوليتسيا قىزمەتكەرلەرى حالىقتىڭ بىردەن-ءبىر قورعانىشى بولعاندىقتان, ەڭ اۋەلى ولار وزدەرىن قورعاي الۋى ءتيىس. ءارى قانداي دا ءبىر جاعدايعا تاپ بولعاندا اينالاسىنا زالال كەلتىرمەي شەشۋدىڭ جولىن قاراستىرىپ, تەز ارەكەت ەتۋى كەرەك. ال مۇندايدا كۇندەلىكتى جاتتىعۋ جاساپ تۇرعاننىڭ پايداسى زور, – دەيدى.
سونداي-اق باتىر بابالارىمىز جاۋعا شاپقاندا بەس قارۋىن اسىنىپ, نەشە ءتۇرلى ونەرگە جاتتىققانى سياقتى پوليتسيالاردىڭ دا بەس قارۋى قاشاندا دايىن ءجۇرۋى كەرەك دەپ بىلەتىنىن ايتقان ول, پوليتسيا ءوزىنىڭ جۇكتەلگەن مىندەتىن ءمۇلت كەتىرمەي ورىنداۋى ارقىلى حالىقتىڭ سەنىمىنە يە بولا الاتىنىن العا تارتادى.
– ارينە, ارنايى پوليتسيا ەكەندىگىمىزدى ءبىلدىرىپ تۇراتىن فورما كيگەن ادامدار بولعاندىقتان, ەلدىڭ بارلىعى دا بىزگە ءوزىنىڭ قورعانىشى رەتىندە قارايدى. ساقشىلار ءارتۇرلى جاعدايدا جول تابا بىلەتىن سەرگەكتىككە يە بولۋى كەرەك. ءارى پوليتسيا قىزمەتكەرى بولعان ادام قارۋ ۇستاي بىلۋدەن بولەك, سۋدا ءجۇزۋدى دە, قىلمىسكەردى پسيحولوگيالىق تۇردە قورقىتۋدى دا ءبىلۋى كەرەك. مىنە, ول سوندا عانا ءوزىنىڭ قىزمەتىن قاي كەزدە بولسا دا لايىقتى اتقارا الادى. ءارى سپورتپەن اينالىسىپ تۇرعان ادامنىڭ ءوزىن-ءوزى سەرگەك ۇستايتىنى ەكىباستان بەلگىلى. سوندىقتان دا پوليتسيالارعا كۇندەلىكتى جاتتىعۋ جاساتۋ بارىسىندا ءوز دەنساۋلىقتارىن ايالاۋدى, بىلىمدەرىن ارتتىرىپ وتىرۋدى ايتىپ وتىرامىن. مەنىڭ ويىمشا, ءتارتىپ ساقشىلارى كۇن سايىن سپورت داعدىلارىنا دايىندالىپ, ارنايى سىناق قابىلداپ, ازاماتتاردى قورعاي الاتىنداي قابىلەتى مەن دەنە شىمىرلىعىن دامىتىپ, بىلەك كۇشى مەن نىسانانى دالدەۋ داعدىسىنا دا جەتىك بولۋى شارت, – دەيدى ش.بارجاقسىنوۆ.
ءسوز اراسىندا ول پرەزيدەنتتىڭ پوليتسيالارعا جۇكتەگەن تاپسىرماسىنىڭ ءمان-ماڭىزىنا توقتالىپ جانە سول باعىتتا قانداي جۇمىستار اتقارىلىپ جاتقانىن دا تىلگە تيەك ەتتى.
– باتىر باۋىرجان مومىشۇلىنىڭ «ءتارتىپسىز ەل بولمايدى, تارتىپكە باعىنعان قۇل بولمايدى» دەگەن ءسوزى بار. راسىندا دا مەملەكەتتىڭ ءوسىپ-وركەندەۋى ءۇشىن تەمىردەي ءتارتىپ قاجەت. ونسىز العا باسۋ مۇمكىن ەمەس. بۇل تۇرعىدا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تىكەلەي تاپسىرماسىمەن قۇقىق قورعاۋ ورگاندارىن رەفورمالاۋ جۇمىستارى جۇرگىزىلۋدە. وسى باعىتتاعى جاڭا باستامالار 2019 جىلدان باستاۋ العانى بەلگىلى. سول جىلعى 17 ساۋىردە وتكەن ىشكى ىستەر مينيسترلىگىنىڭ كەڭەيتىلگەن القا وتىرىسىنا قاتىسقان مەملەكەت باسشىسى قۇقىق قورعاۋ جۇيەسىندەگى رەفورمانىڭ نەگىزگى مىندەتى – قازاقستاندىقتاردىڭ قۇقىقتارىن مۇلتىكسىز قامتاماسىز ەتۋ ەكەنىن ايتىپ, ۆەدومستۆونىڭ الدىنا قۇقىقبۇزۋشىلىقتارعا مۇلدەم توزبەۋشىلىكتى قالىپتاستىرۋ تۋرالى مىندەت قويۋ كەرەك ەكەندىگىن ايتقان مەملەكەت باسشىسى «قازىر پوليتسيا تىكەلەي ءوز مىندەتتەرىنە جاتپايتىن جۇمىستارمەن اينالىساتىن ۋاقىت ەمەس. بۇل باعىتتا العاشقى قادام جاسالدى. ءىىم-ءنىڭ قۇرامىنان توتەنشە جاعدايلار جونىندەگى قىزمەت ءبولىندى. ىشكى ىستەر ورگاندارى قۇرىلىمدارىن ودان ءارى وڭتايلاندىرۋ جۇمىستارى قۇقىق قورعاۋ جانە سوت جۇيەسىن رەفورمالاۋ جونىندەگى كوميسسيانىڭ شەڭبەرىندە جۇزەگە اسىرىلاتىن بولادى. بىراق بۇل پوليتسيانىڭ قىزمەتىن السىرەتۋ دەگەن ءسوز ەمەس. ءىىم جانە ونىڭ قۇرىلىمدىق بولىمشەلەرى ءتارتىپتى قامتاماسىز ەتۋدە مەملەكەتتىڭ نەگىزگى تىرەك كۇشى بولعان جانە سولاي بولا بەرەدى» دەپ ايتقان بولاتىن. بۇل ءبىز ءۇشىن شىن مانىندە سەنىم مەن ارتىلعان مىندەت دەپ بىلەمىز. سوندىقتان پرەزيدەنتتىڭ تاپسىرماسىن جۇزەگە اسىرۋ ماقساتىندا تىنباي ەڭبەكتەنىپ جاتىرمىز. اينالىپ كەلگەندە, ءبارىمىز دە – وسى مەملەكەتتىڭ بولاشاعى ءۇشىن تەر توگىپ جۇرگەن جاندارمىز. سوندىقتان مەن ەل ازاماتتارىن قاراپايىم جانە مەملەكەتتىك قىزمەتشى دەپ بولمەيمىن. ويتكەنى وتان الدىندا ءبىرىمىز پەرزەنتتىك بورىشىمىزدى اتقارۋعا, ءبىرىمىز ادامدىق مىندەتىمىزدى وتەۋ ءۇشىن بارىمىزدى سالىپ ءجۇرمىز. سوندىقتان دا پوليتسيا ارقاشان حالىقپەن بىرگە, حالىقتىڭ دا بىزبەن بىرگە بولعانى ماڭىزدى, – دەيدى شالقار مۇحامبەتۇلى.
مىنە, وسىنداي جۇرتى ءۇشىن ىستەپ, ۇلت ءۇشىن ەڭبەك ەتىپ كەلە جاتقان شالقار سياقتى سايىپقىران ساقشىلاردىڭ بولۋى – حالقىمىزدىڭ دا ورتاق قۋانىشى. جاستار, مىنە, وسىنداي مەملەكەتتىك قىزمەتكەرلەردەن ءتالىم السا, بولاشاعىمىز بۇدان دا جارقىن بولاتىنىنا سەنىمىمىز كامىل قاشاندا.
شاپاعات ءابدىر
