قازاقستانداعى 11-سىنىپ وقۋشىلارى مەكتەپ بىتىرگەندە ءار جىلى قايعىلى, وقىس, توسىن وقيعالاردىڭ ورىن الۋى ۇردىسكە اينالىپ بارادى. قۇقىق قورعاۋ ورگاندارى ساقتىق شارالارىن ارتتىرىپ, باقىلاۋدى كۇشەيتكەنمەن, بۇل جاعداي بيىل دا قايتالاندى.
اتاپ ايتقاندا, جامبىل وبلىسىندا مەكتەپ تۇلەكتەرى مىنگەن كولىك جول اپاتىنا ۇشىراپ, جول-كولىك وقيعاسى سالدارىنان 21 جاستاعى ازاماتشا وقيعا ورنىندا قازا تاپتى. ونىڭ جولاۋشىلارى – 17, 20 جاستاعى ازاماتتار مەن 11-سىنىپ بىتىرگەن تۇلەك اۋرۋحاناعا جەتكىزىلگەن. ماڭعىستاۋ وبلىسى بەينەۋ اۋدانىنىڭ بورانقۇل اۋىلىندا تۇلەكتەر اراسىندا توپتىق توبەلەس بولدى. استانادا 18 جاستاعى بويجەتكەندى پىشاقتاپ كەتكەنى تۋرالى اقپارات تا الەۋمەتتىك جەلىدە جەلدەي ەسىپ ءجۇر. مۇنىڭ سەبەبى نەدە؟! نە ءۇشىن ەلىمىزدە مەكتەپ ءبىتىرۋ قۋانىشىنىڭ سوڭى قايعىلى جاعدايعا اينالادى؟
مۇنىڭ دا وزىندىك سەبەبى بار. «قازاقستاندا شۇلىق ساتىپ الساڭ دا جۋ دەيدى ەكەن, جۋماساڭ قۋ دەيدى ەكەن» دەپ شەتەلدەگى اعايىندار مىسقىلعا شىعارعانداي, ەلىمىزدە ورىنسىز توي تويلاۋ, كەلسە-كەلمەسە باس قوسىپ, سەرۋەندەپ ءجۇرۋ ادەتكە اينالعان. «بالاپان ۇيادا نەنى كورسە, ۇشقاندا سونى ىلەدى» دەگەندەي, وسىنى كورگەن تۇلەكتەر قايدان ويىن-تويدان قۇر قالسىن, جاڭا عانا 11-سىنىپ ءبىتىرىپ, وقۋشىلىق ءومىردىڭ تاعدىرىنا قاتىستى ەڭ ماڭىزدى كەزەڭ ەندى باستالعالى تۇرسا دا, ءبارىن ۇمىتىپ, تويلاۋعا كىرىسەدى.
جاستايىنان ءسان-سالتاناتقا بوي ۇرىپ, اكە-شەشەسىنىڭ داۋلەتىنە ماستانعان بالالار مۇندايدا ءوزىن ءبىر كورسەتىپ قالۋعا تىرىسىپ, باسقوسۋعا اكەسىنىڭ قىمبات كولىگىن ءمىنىپ كەلۋدى مىقتى كورەدى. كامەلەت جاسىنا تولماعاندىقتان, ونىڭ كوبىندە كولىك جۇرگىزۋ كۋالىگى جوق. سوعان قاراماستان, كولىك تىزگىنىنە وتىرادى دا, ابدەن لەپىرىپ العان سوڭ قارقىندى اسىرىپ, تەرەزەدەن باسىن شىعارىپ باقىرىپ, ويىنا كەلگەنىن ىستەيمىن دەپ وقىس جاعدايعا تاپ تولادى. وسىنىڭ ءبارى ءبىزدىڭ وتباسىنداعى تاربيەنىڭ وسالدىعى مەن مەكتەپ تاربيەسىنىڭ جەتىمسىزدىگىنە تىكەلەي قاتىستى. 11-سىنىپ ءبىتىرۋدى بالا ومىرىندەگى كەرەمەت كەزەڭ ساناپ, ونى ايرىقشا اسپەتتەپ جىبەرگەنىمىزدىڭ كەسىرى. شىن مانىندە, «تاۋىقسىز دا تاڭ اتادى» دەگەندەي, 11-سىنىپ ءبىتىرۋ – بالا ومىرىندەگى قالىپتى ۇدەرىستىڭ ءبىرى, دۋمانداتىپ تويلايتىنداي ونىڭ ەشبىر ەرەكشەلىگى جوق. اسىرەسە تولىق اقىل توقتاتىپ ۇلگەرمەگەن جاستار ءۇشىن بۇل بوس ءسوز, جىرتاقاي كۇلكىنىڭ باسقوسۋى عانا. ونى ارناۋلى كولىك جالداپ, قىمبات كولىكتەردىڭ شەرۋى ەتىپ وتكىزۋ دە توبىرلىق سانانىڭ كورىنىسى.
دەمەك, بۇل ماسەلەگە قوعام, اتا-انا جانە مەكتەپ بولىپ باسا نازار اۋدارۋ كەرەك. ەڭ باستىسى, 11-سىنىپتى ءبىتىرۋ ءساتىن تويلاماسا دا ءومىر اعىسى وزگەرمەيتىنىن, ول دا جاي كۇن ەكەنىن ۇرپاق ساناسىنا ەرتەرەك سىڭىرەتىن كەز جەتتى. ويتكەنى سانا وزگەرمەي, ساپالىق ءوسۋ دە بولمايدى.
