سەنات دەپۋتاتى بيبىگۇل جەكسەنباي استاناداعى كوشەلەردىڭ بىرىنە بەلگىلى مەملەكەت جانە قوعام قايراتكەرى شايسۇلتان شاياحمەتوۆ ەسىمىن بەرۋدى ۇسىندى, دەپ حابارلايدى astana-akshamy.kz.
–«حالىقتى وياتقىڭ كەلسە, ونىڭ تاريحىن ويات» دەگەن ءسوزدىڭ ءمانى تەرەڭدە. بۇگىنگى دەپۋتاتتىق ساۋالعا عىلىمي تانىم كوكجيەگىن كەڭەيتكەن, قازاق ۇلتىنىڭ ابزال پەرزەنتى شايسۇلتان شاياحمەتوۆ نەگىز بولىپ وتىر. ول ەلىمىزدىڭ ءبىلىم, عىلىم سالاسىنىڭ دامۋىنا, انا ءتىلىمىزدىڭ وركەندەۋىنە, ۇلت رۋحانياتىنىڭ جاڭارۋىنا ولشەۋسىز ۇلەس قوستى. 1960-1986 جىلدار ارالىعىندا قازاق جەرىندە 500-دەن استام قازاق مەكتەپتەرىنىڭ نەگىزسىز جابىلىپ, ارالاس مەكتەپكە اينالعانىن توتاليتارلىق جۇيەدەن قايمىقپاي, اشىق جازعان تۇڭعىش ساياساتكەر. قىزىل يمپەريانىڭ قىسپاعىنان بوساپ, جاڭا ازات ەلدىڭ ءبىلىم سالاسىن قايتا قۇرۋعا دا ولشەۋسىز ەڭبەك ءسىڭىردى. 1992 جىلدىڭ 18 قاڭتارىندا قابىلدانعان تاۋەلسىز قازاقستاننىڭ تۇڭعىش ء«بىلىم تۋرالى» زاڭىن شاياحمەتوۆ ازىرلەپ, سول زاڭ ەلىمىزدەگى مەملەكەتتىك ەمەس وقۋ ورىندارىنىڭ قۇرىلۋىنا, جەكە مەنشىك بالاباقشا مەن مەكتەپتەردىڭ اشىلۋىنا نەگىز بولدى. “بولاشاق” باعدارلاماسىنىڭ نەگىزىن سالىپ, سونىڭ ارقاسىندا 1989-1991 جىلدارى مينيسترلىك 15 شەت مەملەكەتتىڭ مينيسترلىكتەرىمەن جانە جوو-مەن بايلانىس ورناتتى. وسى ۋاقىتقا دەيىن كورنەكتى مەملەكەت جانە قوعام قايراتكەرىنىڭ ەڭبەگىن ءوز دەڭگەيىندە باعالاۋ نازاردان تىس قالىپ كەلدى. وسى رەتتە ەلوردا كوشەلەرىنىڭ بىرىنە قايراتكەر ەسىمىن بەرۋدى سۇرايمىن, – دەدى دەپۋتات.
سەناتوردىڭ ايتۋىنشا, ش. شاياحمەتوۆ حالىقارالىق «قازاق ءتىلى» قوعامىنىڭ قۇرىلۋىنا باستاماشى بولعان, مەملەكەتتىك ءتىلدى جەدەل وقىتۋ ورتالىعىن اشۋعا مۇرىندىق بولعان تۇڭعىش ۇلت قايراتكەر. قازاق تەرمينولوگياسىنىڭ تاۋەلسىزدىك جىلدارىندا دامۋىنا دا ۇلكەن ۇلەس قوستى. وسى ۋاقىتقا دەيىن كورنەكتى مەملەكەت جانە قوعام قايراتكەرىن ۇلىقتاۋ, ەڭبەگىن باعالاۋ نازاردان تىس قالعان تۇلعانىڭ ەسىمىن جاڭعىرتۋ ءۇشىن سەناتور كورنەكتى تاريحي تۇلعالاردىڭ ءومىربايانىن جوعارى وقۋ ورىندارىنىڭ باعدارلاماسىندا بەلسەندى تۇردە زەرتتەۋدى ۇسىندى. اتاپ ايتقاندا, جوعارى جانە ورتا ارناۋلى وقۋ ورىندارىنىڭ ستۋدەنتتەرى ءۇشىن شايسۇلتان شاياحمەتوۆ اتىنداعى ستيپەنديا تاعايىنداۋ تۋرالى ماسەلەنى قاراۋ كەرەك. دەپۋتات سونىمەن قاتار ش.شاياحمەتوۆ اتىنداعى «ءتىل-قازىنا» عىلىمي-پراكتيكالىق ورتالىعىن تولىققاندى ۇلتتىق عىلىمي ينستيتۋت رەتىندە قايتا قۇرۋ, سونداي-اق الماتى قالاسىنداعى پەداگوگ كادرلاردىڭ بىلىكتىلىگىن ارتتىرۋدىڭ رەسپۋبليكالىق ينستيتۋتىنا ش.شاياحمەتوۆتىڭ ەسىمىن بەرۋدى ۇسىندى.
فوتو: سەناتتىڭ ءباسپاسوز قىزمەتىنەن
