استانا قالاسى اكىمدىگىنىڭ «شاراپات» الەۋمەتتىك قىزمەت كورسەتۋ ورتالىعى – بۇل تاجىريبەسى مول, قارتتار مەن مۇمكىندىگى شەكتەۋلى ادامدارعا كۇتىم بويىنشا ساپالى جانە كەشەندى قىزمەت كورسەتۋشى مەملەكەتتىك مەكەمە.
ورتالىقتا زەينەت جاسىنا جەتكەن, ءى جانە ءىى توپتاعى مۇگەدەكتەر مەن باسقا ادامنىڭ كومەگى مەن كۇتىمىنە مۇقتاج جالعىزباستى ادامدار تۇرادى. مەكەمە 1989 جىلى قۇرىلعان, ال 2007 جىلدان باستاپ كوكتال-1 تۇرعىن الابى, اققورعان كوشەسى, 2 مەكەنجايىنا ورنالاستى. اۋماعى – 4,5254 گا, جالپى تۇرعىن اۋدانى 26136,6 ش.م الىپ جاتقان ورتالىق – ينفراقۇرىلىمى دامىعان كىشىگىرىم قالاشىق. مۇنداعى تۇرعىن ءۇي عيماراتى بەس بلوكتان تۇرادى, ونىڭ تورتەۋى تۇرعىنداردىڭ پايدالانۋىندا بولسا, بەسىنشىسىندە اكىمشىلىك ورنالاسقان. 250 ورىندىق كەڭ جانە جايلى اسحانا, شاشتاراز, زاماناۋي اۆتوماتتى كىر جۋعىش ماشينالارمەن جانە ۇتىكتەۋ تاقتاسىمەن جابدىقتالعان كىر جۋاتىن بولمە, باسسەينى بار ساۋنا, بولەك جىلىتۋ قازاندىعى, اۆتوكولىك گاراجى, عۇرىپتىق ۇيدەن تۇرادى.
ورتالىق قىزمەتكەرلەرى استانا قالاسىنىڭ 901 تۇرعىنىنا ارناۋلى الەۋمەتتىك قىزمەت كورسەتەدى, ونىڭ ىشىندە 341 قىزمەت الۋشى ستاتسيونارلىق جاعدايدا, 560 قىزمەت الۋشى ۇيدەن قاتىناپ, ءتيىستى قىزمەت الادى. تۇرعىنداردىڭ الدى 98 جاسقا كەلدى. ۇلى وتان سوعىسىنىڭ ارداگەرى رايسا ەگوروۆناعا ارنايى الەۋمەتتىك قىزمەت كورسەتىلىپ, قازىرگى كۇندە گوسپيتالدە ەم الۋدا. مۇندا قارتتار ءبىر-ەكى ورىندىق بولمەدە جاتادى. ارقايسىسى تۇرمىسقا قاجەتتى زاتتارمەن جابدىقتالعان. قوزعالىس مۇمكىندىگى شەكتەۋلى جاندارعا ارنايى پاندۋس پەن ليفت, تاعى باسقا كومەكشى قۇرالدار قاراستىرىلعان. ءاربىر قاباتتا ەلەكتر پليتاسىمەن جابدىقتالعان قوناق بولمەلەرى, تۋىستارى مەن قوناقتارىن قابىلداۋعا ارنالعان بولمەلەرگە ادەمى ءارى قولايلى جيھازدار قويىلعان. مۇندا قىزمەت الۋشىلار بوس ۋاقىتىن وتكىزەدى. قوناق بولمەلەردە قالاعا تىكەلەي بايلانىساتىن تەلەفوندار ارقىلى قاريالار تۋعان-تۋىسىنىڭ حابارىن ءبىلىپ وتىرادى. نەگىزى, قارتتاردىڭ قالاۋىنا قاراي تۋىستارى ءۇش كۇننەن ءۇش ايعا دەيىن الىپ كەتىپ, اعايىنشىلاپ كەلۋىنە رۇقسات ەتىلگەن. دەنساۋلىعى ناشارلاعان قارتتارعا ەم-دومىن جاسايتىن ينتەنسيۆتى تەراپيامەن قامتاماسىز ەتۋگە قاجەتتى قۇرال-جابدىقتارمەن جابدىقتالعان پاللياتيۆتىك كومەك ءبولىمى جۇمىس ىستەيدى.
شاماسى كەلگەنشە قول قۋسىرىپ قاراپ وتىرماي, ارناۋلى الەۋمەتتىك ەڭبەككە ارالاساتىنداردىڭ سانى جەتكىلىكتى. كۇن سايىن تۇسكە دەيىن ساندىك-قولدانبالى ونەرىنە يكەمى بار 20 شاقتى ادامعا – تىگىن شەبەرحاناسىندا «ەلوردانىڭ ەكو-سومكەلەرى» اتتى الەۋمەتتىك جوباسىمەن سومكە تىگەتىندەرگە جاعداي جاسالعان. 30-دان استام قولونەرشى پايدالى ىسپەن اينالىسىپ, ۋاقىتىن ءتيىمدى وتكىزەدى. اشىق ەڭبەك تەراپياسى, گۇل ءوسىرۋ, باۋ-باقشا, جىلىجايعا قارايتىن قاريالار دا تاجىريبەسىمەن ءبولىسىپ, ناۋرىزدان قازانعا دەيىن وسى جۇمىستاردان قول ۇزبەيدى. ودان بولەك, باسپا ستۋدياسى (بەيىندىك جانە الەۋمەتتىك جوبا), ءۇي جيناۋ, تاعى باسقا تىرلىكتەردىڭ ورتاسىندا بەلسەندى قارتتار جۇرەدى.
قارتتارعا قامقورلىقتىڭ ءبىر سالاسى – الەۋمەتتىك-مادەني قىزمەتتەر. ورتالىقتىڭ جوسپارلانعان بارلىق مادەني ءىس-شاراسى: كونتسەرت, سپورتتىق ءىس-شارا, ەكسكۋرسيا, تسيرككە بارۋ, مەيرامحاناعا قوناققا اپارۋ بولسىن ۇلكەن مەرەكەدەي ءوتىپ, قارتتار ءبىر سەرپىلىپ قالادى. مۇندا قىزمەت الۋشىلاردىڭ تۋعان كۇنى, باسقا مەرەكەلەرى ەلەۋسىز قالمايدى. اپتاسىنا ءبىر رەت ديسكوتەكا, فيلم كورسەتىلىپ, «ءۇمىت» جانە «نوستالگيا» ۆوكالدىق توبىندا رەپەتيتسيالار تۇراقتى جۇرگىزىلەدى. جىل بويى قىزمەت الۋشىلار مەن قىزمەتكەرلەرگە جەكە كونتسەرت بەرۋ داستۇرگە اينالدى.
تەمىرعالي سەيفۋللين, پسيحولوگ:
«بۇل جەردە 2018 جىلدان بەرى قىزمەت ەتەمىن. پسيحولوگتىڭ جۇمىسى, جالپاق تىلمەن ايتقاندا, ەگەر دارىگەر ادام ءتانىن ەمدەسە, پسيحولوگ جانتانۋشى مامان رەتىندە قاريالاردىڭ جانىن ەمدەيدى. وتە كۇردەلى قىزمەت. ءارتۇرلى ادام, تاعدىردىڭ سالۋىمەن وزىنە بەيتانىس ادامدارمەن بىرگە ءومىر ءسۇرىپ جاتىر. ارقايسىسىنا جەكە دارا كوڭىل ءبولىپ, وزگەشە كوزقاراسپەن جۇمىس ىستەۋ كەرەك. ورتالىقتا ەموتسيونالدىق جاعدايدى تۇراقتاندىرۋعا كومەكتەسەتىن جانە قارتتاردىڭ پسيحيكالىق, فيزيكالىق دەنساۋلىعىن جاقسارتۋعا باعىتتالعان كەز كەلگەن ءىس-شارالاردىڭ ءتيىمدىلىگىن ارتتىرۋعا كومەكتەسەتىن سەنسورلىق اپپاراتۋراسى بار پسيحولوگيالىق جەڭىلدىككە ارنالعان سەنسورلىق بولمە بار. ارت-تەراپيا كونتەكستىندەگى قۇم تەراپياسى – بۇل قىزمەت الۋشىنىڭ شىعارماشىلىق ءوزىن-ءوزى كورسەتۋىنە باستى نازار اۋدارىلاتىن ۆەربالدى ەمەس نىسان. كارىلەردىڭ كوز جانارى سونە باستاعاندا, ءتۇرلى جارىقپەن ادىپتەلگەن سۋرەتتەر ارقىلى كوز جانارىن وياتاتىن امال بار. ول دا قاجەت. ادامنىڭ ىشكى رەنىشى باس كوتەرتپەي, قيىندىقتارعا مويىپ, الدىنان جارىق كورمەي كەتكەن كەزدەرى وزدەرىن كۇرت تاستاپ جىبەرەدى. اينالاعا بەي-جاي قاراپ, ءومىر سۇرۋگە دەگەن ىقىلاسى كەميدى. قيىنشىلىق قىسقاندا قۇم تەراپياسى, ءتۇرلى حوش يىستەرمەن تىنىقتىرۋ دا جاقسى اسەر ەتەدى. ادامداردىڭ ميى تىنىعىپ, جۇرەگى جىلىپ, اينالاسىنا مەيىرىمى ويانادى. وتكەن ومىرىندەگى كوڭىلسىز جايتتاردى ۇمىتتىرادى. كوڭىل كۇيى كوتەرىلگەندە جانى جاي تابادى. جەكە پسيحولوگيالىق كەڭەس بەرۋ, كۇندەلىكتى اڭگىمەلەسۋ, قارىم-قاتىناس جاساۋ, تىڭداۋ, ىنتالاندىرۋ, بەلسەندىلىككە ىنتالاندىرۋ, ومىرشەڭدىگىن پسيحولوگيالىق قولداۋ قىزمەت الۋشىلاردىڭ پسيحيكالىق دەنساۋلىعىن نىعايتۋدى قامتاماسىز ەتەدى. پسيحولوگيالىق ترەنينگتەر بەلسەندى پسيحولوگيالىق اسەر ەتۋ جانە جاڭا ۇجىمعا بەيىمدەلۋ, توپتىڭ ەمانسيپاتسياسى جانە جاڭا ۇجىمعا قىزىعۋشىلىقتىڭ كورىنىسى رەتىندە جۇرگىزىلەدى. «جاقسى قارىم-قاتىناس», «ماعان سەن», «سترەسس پەن شارشاۋدان ارىلامىز», «ءبىز بىرگەمىز», «داستارحان باسىنداعى قارىم-قاتىناس», «جۇمىس ورنىنداعى شيەلەنىستى ەموتسيونالدى اتموسفەرانى قالاي بولدىرماۋ كەرەك؟» سياقتى ترەنينگتەر وتكىزىپ, جاڭا ورىندا جاڭاشا ءومىر ءسۇرۋدىڭ ەرەجەسىن ءتۇسىندىرىپ, جاڭا قارىم-قاتىناسقا ماشىقتاندىرامىز».
مۇندا ارناۋلى الەۋمەتتىك قىزمەتتەر كورسەتۋ سالاسىندا جانە زاڭدىق ماڭىزى بار ءارتۇرلى قۇجاتتى دايىنداۋعا بايلانىستى ماسەلەلەر بويىنشا زاڭگەرلىك كەڭەس بەرۋدى مەكەمەنىڭ زاڭگەرى جۇزەگە اسىرادى. قارتتار مەن مۇگەدەكتەرگە ءارتۇرلى قىزمەت ءتۇرى بويىنشا جەڭىلدىكتەر بەرۋ, مۇراگەرلىك قۇجاتتارىن رەتتەۋ, قازاقستان رەسپۋبليكاسىنىڭ باسقا دا زاڭدارىنا قاتىستى ماسەلەلەر قارتتاردىڭ ءومىرىن اينالىپ وتپەيدى. سول سەبەپتى قارتتاردىڭ زاڭ تۇرعىسىنداعى قۇقىعى جاقسى قورعالعان.
مەكەمە قىزمەتىنىڭ باسىم باعىتى – وسىندا تۇراتىن ادامداردىڭ قاجەتتىلىگىن تولىق قامتاماسىز ەتۋ, ارناۋلى الەۋمەتتىك قىزمەت ساپاسىن ۇنەمى جاقسارتۋ جانە قىزمەت الۋشىلاردىڭ الەۋمەتتىك بەيىمدەلۋىن ارتتىرۋ. قارتتار تولىق نەمەسە جارتىلاي قوزعالۋ, وزىنە قىزمەت كورسەتۋ قابىلەتىنەن ايىرىلعانداردىڭ تۇراقتى جانە ۋاقىتشا تۇرۋىنا بارلىق جاعداي جاسالعان. وسىنىڭ ناتيجەسىندە قولدانىستاعى ستاندارتتار مەن كولەمدەرگە ساي جارتىلاي نەمەسە تولىق ءوز-وزىنە قىزمەت كورسەتۋدەن قالعان جانە ۇدايى باسقا ادامنىڭ كۇتىمىنە مۇقتاج ادامدارعا ارناۋلى الەۋمەتتىك قىزمەت كورسەتۋ, جاسى مەن دەنساۋلىق جاعدايىنا قاراپ ولاردىڭ تۇلعالىق دامۋىنا, قوعامداعى ومىرگە ىقپالداسۋىنا باعىتتالعان تۇرمىس جاعدايىن جاساۋ جوعارى دەڭگەيدە دەپ ايتۋعا نەگىز بار.
