استانا قالاسىنىڭ ءبىلىم باسقارماسىنىڭ ۇيىمداستىرۋىمەن ماحامبەت وتەمىسۇلى اتىنداعى وقۋشىلار سارايىندا بالالار مەن جاسوسپىرىمدەر اراسىنداعى XVII «شاتتىق-2024»اشىق شىعارماشىلىق قالالىق بايقاۋىنىڭ اشىلۋ سالتاناتى ءوتتى.
ءساۋىردىڭ العاشقى كۇندەرىندە ەلوردالىق ءبىلىم بەرۋ ۇيىمدارىندا ءداستۇر بويىنشا ون جەتىنشى رەت جاس تالانتتاردى انىقتاۋ, ىزدەۋ جانە ولارعا قولداۋعا كورسەتۋ ماقساتىندا كەڭ اۋقىمدى شىعارماشىلىق الاڭ اشىلادى. «شاتتىق» بالالار مەن جاستار ونەرىنىڭ بىرەگەي جوباسى ەلوردانىڭ جاس تۇرعىندارىنىڭ ومىرىندە ورىن الاتىن ايرىقشا ءىس-شارا. بۇل شىعارماشىلىق سايىس قاتىسۋشىلارعا باتىل جوسپارلارىن, ارمان-ماقساتتارىن جۇزەگە اسىرىپ, ونەرلى ورەندەردىڭ كاسىبي ساحنادا ونەر كورسەتۋگە, كورەرمەندەردىڭ شىنايى سۇيىسپەنشىلىگىنە يە بولۋعا مۇمكىندىك بەرەدى.
التى مىڭعا جۋىق قاتىسۋشى 11 جانردىڭ 20 نوميناتسياسى بويىنشا باق سىنايدى. ونىڭ ىشىندە حالىق شىعارماشىلىعى, ەسترادالىق جانە حور ءانى, حالىق ءبيى, زاماناۋي حورەوگرافيا, اسپاپتىق ورىنداۋشىلىق, تەاتر جانە بەينەلەۋ ونەرى, سونداي-اق فوتوشىعارماشىلىق, 3D-مودەلدەۋ سەكىلدى قىزىقتى نوميناتسيالار بار. جاس قۇراقتاي ءوسىپ كەلە جاتقان ۇرپاق اراسىندا مەديا-مادەنيەتتى دامىتۋ, تاقىرىپتىق بەينەروليكتەر جاساۋ داعدىلارىن جەتىلدىرۋ ماقساتىندا «Tik-tok» نوميناتسياسى ەنگىزىلگەنىنە دە بيىل ءۇشىنشى جىل.
بايقاۋ كۇندەرى 4-26 ءساۋىر ارالىعىندا 67 التىن, 89 كۇمىس, 111 قولا مەدالدار يەلەرىن تاۋىپ, 375 ديپلومانت ماراپاتتالادى, جۇلدەگەرلەردى دايىنداعان پەداگوگتارعا 267-دەن استام سەرتيفيكات بەرىلەدى. بايقاۋدا مادەنيەت, ونەر, ءبىلىم جانە قوعامنىڭ كورنەكتى قايراتكەرلەرى قازىلىق ەتەدى. وقۋشىلار سارايىنداعى سالتاناتتى اشىلۋ سالتاناتىندا «حالىق ءبيى» جانرىنا قاتىساتىن حورەوگرافيالىق ۇجىمدار 7 جاس پەن 18 جاس ارالىعىنداعى بالالار مەن جاسوسپىرىمدەر ساحنادا ءوز ونەرلەرىن پاش ەتىپ, وزدەرىنىڭ كاسىبي شەبەرلىكتەرىن كورسەتتى.
قالانىڭ ءبىلىم بەرۋ ۇيىمدارىندا ونەرلى جاستاردىڭ ءوز مۇمكىندىگىن كورسەتىپ, شەبەرلىگىن شىڭداعان ەرەكشە كەزەڭ باستالدى. ول ءبىر اي مەرزىمگە جالعاسادى. دوستىق پەن شىعارماشىلىققا, بەكزات ونەرگە, بيىك ماقساتقا تالپىنعان ەلوردالىق ءبىلىم الۋشىلارعا تەك قانا ساتتىلىك تىلەيمىز!
