ەلوردالىق دارىگەرلەر ەلىمىزدە العاش رەت وتە سيرەك كەزدەسەتىن دەرتكە وتا جاسادى, دەپ حابارلايدى astana-akshamy.kz.
ەلورداداعى ۇلتتىق عىلىمي ونكولوگيا ورتالىعىنىڭ دارىگەرلەرى وتە سيرەك كەزدەسەتىن دەرتكە ۇشىراعان تۇرعىنعا اعزا اۋىستىردى.
دارىگەرلەردىڭ ايتۋىنشا, ميەلوپروليفەراتيۆتى نەوپلازيا توبىنا جاتاتىن ىلكى ميەلوفيبروز دەپ اتالاتىن دەرت ميلليوننىڭ بىرىندە عانا كەزدەسەدى. بۇل دەرت – سۇيەك كەمىگىنىڭ ىسىك اۋرۋى, فيبروزدى ءتىن سۇيەك كەمىگىندەگى قان تۇزەتىن ءدىڭ جاسۋشالارىنىڭ ورنىن باسىپ, سول ارقىلى قانداعى ساۋ جاسۋشالاردىڭ ءبولىنۋىن بۇزادى.
50 جاستاعى پاتسيەنتكە جاسالعان اللوگەندى ترانسپلانتاتسيالىق وتا قازاقستاندا العاش رەت جاسالىپ وتىر. ياعني ناۋقاستىڭ اعاسىنان الىنعان دونورلىق سۇيەك كەمىگىن وعان اۋىستىرىپ سالدىق. وتا ءساتتى ءوتتى دەۋگە تولىقتاي نەگىز بار. قازىرگى ۋاقىتتا تولىقتاي دونورلىق حيمەريزمگە قول جەتكىزىلىپ, قانداعى كورسەتكىشتەر بىرتىندەپ قالىپقا كەلە باستادى, – دەيدى ورتالىقتىڭ ونكوگەماتولوگيا بولىمشەسىنىڭ مەڭگەرۋشىسى رۋزال ۆيلدانوۆا.
قاتەرلى ىسىك اۋرۋلارىنا جاتاتىن دەرتكە ستاتيستيكا بويىنشا ورتا ەسەپپەن 65 جاستاعىلار شالدىعادى. دەگەنمەن دارىگەرلەر كەيىنگى ۋاقىتتا جاستاردىڭ اراسىندا دا كەزدەسىپ وتىرعانىن ايتتى.
دەرتتىڭ ەمى – سۇيەك كەمىگىن ترانسپلانتاتسيالاۋ ارقىلى كونسەرۆاتيۆتى ەم قولدانۋ. وسىلايشا, اۋرۋدىڭ اسقىنۋىنىڭ الدىن الىپ, ىسىكتىڭ ۇلعايۋىن بولدىرماۋعا بولادى.
سونداي-اق دارىگەرلەر اۋرۋدىڭ بەلگىلەرىنە كوكباۋىردىڭ ۇلعايۋى, گەموگلوبيننىڭ تومەندەۋى, ياعني انەميا, سۇيەكتەردىڭ قاقساۋى, قاناۋعا بەيىمدىك, ترومبوز, قىشىنۋ مەن ينفەكتسيالار جاتاتىنىن ەسكەرتتى.
ميەلوفيبروزدى تولىقتاي ەمدەۋگە بولا ما دەگەن سۇراققا كەلسەك. قازىرگى ۋاقىتت ميەلوفيبروزدى تولىقتاي ەمدەيتىن ءدارى جوقتىڭ قاسى. الايدا كونسەرۆاتيۆتى تەراپيا مەن تارگەتتىك پرەپاراتتار ارقىلى سۇيەك كەمىگىنىڭ قىزمەتىن جاقسارتۋعا مۇمكىندىك بار, – دەپ اتاپ ءوتتى رۋزال ۆيلدانوۆا.
