سۋ ايدىندارىندا قاۋىپسىزدىكتى قامتاماسىز ەتۋ ءۇشىن پاترۋلدەۋ شارالارى كۇشەيتىلەدى
ۇكىمەت وتىرىسىندا سۋداعى قاۋىپسىزدىكتى قامتاماسىز ەتۋ ماسەلەسى قارالدى. بالالارعا قاتىستى جۇمىس كۇشەيتىلەدى. باستى مىندەت – ءجۇزۋ اۋماعىنداعى قاۋىپسىزدىك جانە ەرەسەكتەر تاراپىنان قاداعالاۋ, دەپ حابارلايدى astana-akshamy.kz.
سونىمەن قاتار سۋعا كەتكەندەردىڭ ەداۋىر بولىگى ماس كۇيىندە بولعانىن اتاپ وتكەن ءجون. بۇل ورىن العان جاعدايدىڭ شامامەن 60%-ىن قۇرايدى. سۋ ايدىندارىندا دەمالۋشىلاردىڭ ىشىمدىك ءىشۋ پروبلەماسىنا نازار اۋدارىلدى. ماسەلەن, ىشكى ىستەر ورگاندارىنىڭ بولىمشەلەرىنە مۇددەلى مەملەكەتتىك ورگاندارمەن بىرلەسىپ, سۋ جاعاسىنداعى دەمالىس ورىندارىندا ىشىمدىك ىشۋگە تىيىم سالۋ, اسىرەسە دەمالىس جانە مەرەكە كۇندەرى پاترۋلدەۋدى كۇشەيتۋ تاپسىرىلدى. سونداي-اق سۋ كولىگىن دۇرىس پايدالانۋ ماسەلەلەرى دە تالقىلاندى.
«كولىك مينيسترلىگى وڭىرلەردىڭ اكىمدىكتەرىمەن بىرلەسىپ شاعىن كولەمدى كەمەلەردى پايدالانىلۋدى باقىلاۋ بويىنشا شارالار قابىلداۋ ءتيىس. ادامداردىڭ اقاۋلى كەمەلەرگە ءمىنىپ, كەيىن قايعىلى وقيعامەن اياقتالعان جاعدايلار از ەمەس. بۇل ماسەلەدە قاتاڭ باقىلاۋ قاجەت», — دەدى ۇكىمەت باسشىسى.
