سىرعاناپ سەرتتەن قايتپاعان
![](https://astana-akshamy.kz/wp-content/uploads/2024/06/oemirzaq-qospanuly-bolsambekov-1.jpg)
اتاق-داڭقى, ماقسات-ابىرويى بيىك ميليتسيا گەنەرالى ومىرزاق قوسپانۇلى – ناعىز دەگدار ازامات. جۇمىس بابىندا ايبىنىن اسقاقتاتىپ تۇراتىن قىزمەت فورماسىندا كورسەڭ سۇستى, قاھارلى كورىنگەنمەن, تىلدەسە قالساڭىز مەيىربان, كىشىپەيىل, قاراپايىم قالپىنا ءتانتى بولاسىز. ءسوزى شەگەمەن قاققانداي نىق. ادامنىڭ ىشكى ويىن, ايتار ءسوزىن بىردەن سەزىپ, اڭگىمە جەلىسىن ءوزى باستاپ, جىلى جىميىپ وتىرادى.
ومىرزاق قوسپانۇلى بولسامبەكوۆ 1939 جىلى 18 ماۋسىمدا بۇرىنعى اقمولا قالاسىندا دۇنيەگە كەلگەن. 1956 جىلى ورتا مەكتەپتى بىتىرگەننەن كەيىن, ىشكى ىستەر ورگاندارىنىڭ جولداماسى بويىنشا ومبى قالاسىنداعى ارنايى ميليتسيا ورتا مەكتەبىنە وقۋعا ءتۇسىپ, 1958 جىلى اقمولا ستانتسياسىنداعى ميليتسيانىڭ ىزدەستىرۋ قىزمەتىنە تاعايىندالادى. بۇل كەزەڭ – قازاقستانعا تىڭ جانە تىڭايعان جەرلەردى يگەرۋگە بۇرىنعى سوۆەت وداعىنىڭ تۇكپىر-تۇكپىرىنەن ادامدار اعىلا باستاعان كەزەڭ. ولاردىڭ اراسىندا تىڭ يگەرەتىن, تىڭايعان جەرلەردى حالىق شارۋاشىلىعىنا پايدالانىپ, ەل ەكونوميكاسىن ارتتىرۋ ءۇشىن كەلگەن ەنتۋزياستار بولدى, سول ايماقتارعا كەزدەيسوق كەلگەندەر دە كوپ ەدى. ولار جەر-جەردە ءتارتىپ بۇزىپ, مەملەكەت قارجىسىن ىسىراپ ەتۋ, ۇرلىق جاساۋ سياقتى كەلەڭسىزدىكتەر جاساپ, جۇمىسشىلار اراسىندا ىرىتكى تۋعىزىپ وتىردى. بۇل ورايدا كولىك پوليتسياسىنىڭ قۇقىقتىق ءتارتىپتى قورعاۋداعى زور ەڭبەگىن اتاپ ءوتۋ – پارىز.
جاس وفيتسەر ومىرزاق قوسپانۇلى جاڭا جۇمىس ۋچاسكەسىندە ءبىلىم مەن بىلىگىن, ۇيىمداستىرۋشىلىق جانە كاسىبي قابىلەتىن كورسەتىپ, ناعىز ءتارتىپ ساقشىسى, قىراعى, ادال قىزمەتكەر ەكەنىن دالەلدەدى. جوعارعى ورىنداردىڭ نازارىنا ءىلىنىپ, 1962 جىلى ول قازاق كسر ىشكى ىستەر مينيسترلىگىنىڭ قولداۋىمەن ركفسر قوعامدىق قاۋىپسىزدىك مينيسترلىگىنىڭ ماسكەۋدەگى جوعارعى مەكتەبىنە كۇندىزگى بولىمگە وقۋعا جىبەرىلدى. 1966 جىلى ءبىتىرىپ, تۋعان قالاسىنا كولىكتەگى ىشكى ىستەر ورگاندارىنا قىزمەتكە ورالدى. جوعارعى مەكتەپتى ءبىتىرىپ, تەرەڭ بىلىممەن قارۋلانىپ كەلگەن مىقتى كادر رەتىندە 1967 جىلدان باستاپ تسەلينوگراد وبلىستىق اتقارۋ كوميتەتىنىڭ ىشكى ىستەر باسقارماسىندا ءتۇرلى باسشىلىق لاۋازىمدا ەڭبەك ەتەدى. جۇمىس جەڭىل بولماسا دا, قىلمىستىق ىزدەستىرۋدىڭ جەدەل وكىلى, انىقتاۋشى, تەرگەۋشى بولا ءبىلدى. قىراعىلىقتىڭ, تىنىمسىز ءىز كەسۋدىڭ ناتيجەسىندە قانشاما قىلمىستىڭ بەتىن اشتى. كىسى ءولتىرۋ, بارىمتا, مەملەكەت مۇلكىن تاركىلەۋ, قاراقشىلىقپەن كۇرەسۋ كاسىبي شەبەرلىكتى, جەدەل ارەكەت جاساۋدى, باتىلدىق پەن تاباندىلىقتى تالاپ ەتەدى. ارىپتەستەرمەن بىرلەسە وتىرىپ شەشىم قابىلداۋ, اۋىزبىرشىلىكپەن ورتاق ماقساتقا جۇمىلا ءبىلۋ دە ماڭىزدى تەتىك. سەرگەكتىك, بايقاعىشتىق, اناليتيكا قابىلەتىن دامىتا تۇسەدى. وسىلار – ومىرزاق اعانىڭ بويىنان تابىلاتىن قاسيەتتەر. وسىنداي ەرەكشەلىكتەرىمەن الدىڭعى ساپتان كورىنگەندىكتەن, تسەلينوگراد وبلىستىق اتقارۋ كوميتەتى ىشكى ىستەر ءبولىمىنىڭ باستىعى 1979 جىلى شتابتىق جۇمىسقا تاعايىندالدى. 1989 جىلدان 1999 جىلعا دەيىن تسەلينوگراد وبلىستىق اتقارۋ كوميتەتى ىشكى ىستەر باسقارماسىنىڭ باستىعى, قازاقستان رەسپۋبليكاسى استاناسىنىڭ الماتىدان اقمولاعا كوشۋى كەزەڭىندە ىشكى ىستەر ورگاندارىنىڭ جۇمىسىن قايتا ۇيىمداستىرۋعا قوسقان وراسان زور ۇلەسىن ايتپاي كەتسەك ادىلەتسىزدىك بولار ەدى. قاجىرلى ەڭبەگى باعالانىپ, وتانعا سىڭىرگەن ەڭبەگى ءۇشىن قازاقستان رەسپۋبليكاسىنىڭ «قۇرمەت» وردەنىن يەلەندى. كسرو جانە «قازاقستان رەسپۋبليكاسى ءىىم ەڭبەك سىڭىرگەن قايراتكەرى جانە ارداگەرى», كسرو جانە قازاقستان رەسپۋبليكاسى ءىىم كوپتەگەن مەدالىمەن ماراپاتتالعان. سونىمەن قاتار ومىرزاق قوسپانۇلى اقمولا وبلىسىنىڭ قۇرمەتتى ازاماتى اتاندى. وسىنىڭ ءبارى – وتانعا جانقيارلىقپەن قىزمەت ەتۋدىڭ جارقىن ايعاعى. مەملەكەتىمىزدىڭ ىشكى ىستەر ورگاندارىنىڭ قۇرىلۋىنا, ازاماتتاردىڭ قاۋىپسىزدىگىن قامتاماسىز ەتۋگە, ولاردىڭ زاڭدى قۇقىعى مەن مۇددەسىن قورعاۋعا قوسقان زور ۇلەسى ءۇشىن 1990 جىلى ميليتسيا گەنەرالى ارنايى جوعارعى اتاعى بەرىلدى.
ارتىنشا ۇزاق جىلعى ەڭبەكتىڭ زەينەتىن كورەتىن ۋاقىت كەلدى. قۇرمەتتى دەمالىسقا شىققاننان كەيىن دە اسىل اعامىز قوعامعا قىزمەت ەتۋدەن تىس قالمادى. 2000-2007 جىلدار ارالىعىندا قازاقستان رەسپۋبليكاسى قۇقىق قورعاۋ ورگاندارىنىڭ «دينامو» ەرىكتى دەنە شىنىقتىرۋ-سپورت قوعامى توراعاسىنىڭ ورىنباسارى بولدى.
2007 جىلدىڭ مامىر ايىنان باستاپ ميليتسيا گەنەرال-مايورى ومىرزاق بولسامبەكوۆ – «ىشكى ىستەر ورگاندارى مەن ۇلتتىق ۇلان ارداگەرلەرىنىڭ قازاقستاندىق ۇيىمى» قوعامدىق بىرلەستىگىنىڭ توراعاسى. بۇل ۇيىمنىڭ دا كوتەرەر جۇگى, اتقارار مىندەتى جەتەرلىك. جاستارعا پاتريوتتىق تاربيە بەرۋدە ءاربىر ارداگەردىڭ ايتارى دا, كورسەتەر جولى دا بار. جاس وفيتسەرلەر مەن جوعارعى ميليتسيا مەكتەبىنىڭ كۋرسانتتارى تىعىز بايلانىس ورناتىپ, ۇرپاقتار ساباقتاستىعىن جالعاستىرۋدا.
ومەكەڭ ءومىر جولىندا ماماندىق تاڭداۋدان دا, جار تاڭداۋدان دا جاڭىلىسپادى. وفيتسەر بولۋ جۇرەكتىڭ باتىرلىعى, وزىنە سەنىمدى ادامنىڭ باتىلدىعى دەگەندەي, ماماندىعىن جازباي تاپقان.
55 جىل وتاسقان اسىل جارى رىسبيكە ازاماتىنىڭ قاۋىپ-قاتەرگە تولى, شىتىرمان وقيعالاردىڭ بەلورتاسىندا جۇرەتىن جۇمىسىن جان جۇرەگىمەن تۇسىنە ءبىلىپ, سەنىمدى سەرىگى بولا ءبىلدى. اعامىز قانشا دارەجەگە جەتسە, وعان ەرىنىڭ قاس-قاباعىن باعا بىلگەن اقىلدى ايەلدىڭ ۇلەسى زور دەپ بىلەمىز. ۇل-قىز تاربيەلەپ, ودان نەمەرە-شوبەرە ءسۇيىپ وتىرعان ءبىر بايتەرەك, ءبىر شىنار ومىرزاق بولسامبەكوۆتىڭ اۋلەتى – تامىرىن تەرەڭگە تارتىپ, جاپىراعى جايقالىپ وتىرعان ءۇيلى شاڭىراق.
بۇگىندە 85 جاسقا تولىپ وتىرعان, سىرعاناسى سەرتتەن قايتپاعان, ەكى ءسوزدى ايتپاعان, قانداي جاعداي تۋسا دا, ادالدىقتى ساقتاعان ميليتسيا گەنەرال-مايورى ومىرزاق قوسپانۇلىن مەرەيلى جاسىمەن قۇتتىقتايمىز!
تاۋ كوشىپ, تاۋسىلمايدى داريالار, ەل باردا ەردىڭ ءىسىن تاني الار دەمەكشى, ساپتا تۇرىپ, ەلگە قىزمەت ەتۋدىڭ ۇلگىسىن كورسەتىپ, سارا جول سالعان گەنەرال اعامىزدىڭ جانكەشتى ەڭبەگى مەن ونەگەسىن ومىردەرەگىنەن تانىپ, اباي حاكىم ايتقانداي, تولىق ادامدى كوردىك, پرەزيدەنت ايتىپ جۇرگەن ادال ادام بەينەسىن تانىدىق.
قارلىعاش قۇسپانوۆا, استانا قالاسى
ارداگەرلەر كەڭەسىنىڭ ءجۋرناليسى