سوڭعى كۇندەرى استانادا تولاسسىز جاۋعان قار اينالانى اق ۇلپاعا ورادى. بۇل قالانىڭ كوممۋنالدىق سالا قىزمەتىنىڭ جۇمىسىن كۇشەيتتى. وسىعان وراي, ەلوردادا قاردى تازالاۋ جانە شىعارۋ جۇمىسى تاۋلىك بويى جالعاسۋدا. 5 اقپان كۇنى تاڭەرتەڭ سانيتارلىق تازالاۋدا 2,5 مىڭعا جۋىق جول جۇمىسشىسى جۇمىسقا شىقتى.
استانا كوشەلەرىن قار مەن مۇزدان تازارتۋعا 1,6 مىڭ ارنايى تەحنيكا مەن 2,5 مىڭعا جۋىق جول جۇمىسشىسى جۇمىلدىرىلدى. وتكەن تۇندە قالادان 3,7 مىڭ رەيسپەن 55 مىڭ تەكشە مەتردەن استام قار شىعارىلدى.
قىستىڭ باسىنان بەرى ەلوردادان پوليگوندارعا بارلىعى 3,7 ملن تەكشە مەتر قار شىعارىلدى, قار پوليگونىنا جونەلتىلگەن رەيس سانى 273,5 مىڭعا جەتتى.
قاردىڭ ۇزدىكسىز جاۋىنا بايلانىستى باس قالانىڭ كوممۋنالدىق قىزمەتتەرى تاۋلىك بويى كۇشەيتىلگەن رەجيمدە جۇمىس ىستەپ جاتىر. تۇنگى اۋىسىمدا قار تازالاۋ جۇمىستارىندا
300-گە جۋىق جول جۇمىسشىسى, 1,3 مىڭنان استام ارنايى تەحنيكا جۇمىلدىرىلدى.
قىس باستالعاننان بەرى قالادان پوليگوندارعا 3659196 تەكشە مەتر جەردىڭ قارى جونەلتىلدى, رەيس سانى – 269753.
استانا اۋماعىنداعى قاردى تازارتۋ ءجۇمىستارى قالانىڭ بارلىق بەس اۋدانىندا دا جۇرگىزىلىپ جاتىر. ماسەلەن, الماتى اۋدانىندا قىس مەزگىلى باستالعالى بەرى 973150 تەكشە مەتر قار شىعارىلدى. قازىرگى تاڭدا بۇل ىسكە اۋىسىمىنا 436 ارنايى جابدىقتالعان تەحنيكا, سونداي-اق 679 جول تازالاۋشى قىزمەتكەرلەر جۇمىلدىرىلعان.
بايقوڭىر اۋدانىنىڭ اۋماعىندا دا ىشكى ورام جولدارىن تازالاۋ جۇمىستارى جۇرگىزىلۋدە. قىس مەزگىلى تۇسكەننەن بۇگىنگى كۇنگە دەيىن بايقوڭىر اۋدانى اۋماعىنان قار پوليگونىنا 700 مىڭعا جۋىق تەكشە مەتر قار شىعارىلدى. بۇل 50 مىڭعا جۋىق رەيستى قۇرايدى.
قازىرگى تاڭدا اۋدان اۋماعىنا بەلگىلەنگەن قار پوليگونى ءتيىستى رەجيمدە جۇمىس جاساپ تۇر. قار پوليگونى جۇك كولىكتەرىنىڭ نومىرلەرىن تىركەۋ جۇيەسىمەن جابدىقتالعان. سونداي-اق ول جەردە بەينەباقىلاۋ كامەرالارى ورناتىلىپ, جارىقتاندىرۋ قوسىلعان. تۇرعىنداردىڭ قاۋىپسىز قوزعالىسىن قامتاماسىز ەتۋ ءۇشىن ءبىرىنشى كەزەكتە الەۋمەتتىك نىساندار مەن كوشە بويلارى جانە الدىڭعى كەزەكتە اۋلا اۋماقتارى قاردان تازارتىلۋدا. كوممۋنالدىق قىزمەتتەر تولىقتاي كۇشەيتىلگەن رەجيمدە جۇمىس ىستەپ, سانيتارلىق تازالاۋعا اۋدان بويىنشا 300-گە جۋىق ارنايى, 400-دەن اسا جۇمىسشى جۇمىلدىرىلعان. بۇدان بولەك, كوكتايعاق بولدىرماۋ ءۇشىن ارنايى تۇزدى قوسپالار دا سەبىلۋدە.
قاردان داڭعىلدار, تروتۋارلار, اۋلالار مەن ۇيلەردىڭ ىشكى جولدارى تازارتىلدى. قار شىعارۋ جۇمىستارى تاۋلىك بويى, كۇندىزگى جانە تۇنگى اۋىسىمدا جۇرگىزىلەدى.
تۇننەن تاڭعا دەيىن اۋدان اۋماعىن 185 بىرلىك ارنايى تەحنيكا جانە 36 جۇمىسشى تازالايدى. قار تازالاۋعا ءوزى اۋدارعىش جۇك ماشينالارى, تيەگىشتەر, اۆتوگرەيدەرلەر جانە ت. ب. تارتىلدى.
