قازاقستاندا تاعى ءبىر پەتيتسيا قاجەت قولدى جينادى. پەتيتسيا اۆتورلارى مەملەكەتتىك قىزمەتشىلەرگە قۇمار ويىندارعا تىيىم سالۋدى ۇسىنىپ وتىر, دەپ حابارلايدى astana-akshamy.kz.
«شەنەۋنىكتەرگە قۇمار ويىندارعا تىيىم سالۋ» دەپ اتالاتىن پەتيتسيا E-Petition.kz رەسمي پورتالىندا جاريالاندى. ونى «ادىلدىك جولى» تاۋەلسىز رەسپۋبليكالىق قوعامدىق بىرلەستىگى قولعا العان. «جەمقورلىق, ۇرلىق, جىمقىرۋ, جەڭ ۇشىنان جالعاسقان سىبايلاستىق – مۇنىڭ ءبارى شەنەۋنىكتەر اراسىنداعى قۇمار ويىنعا دەگەن بەيىمدىلىكتىڭ سالدارى. الايدا مەملەكەتتىك ماسشتابتا لۋدومان-شەنەۋنىكتەردىڭ ماسەلەسى شەشىلمەي وتىر», – دەپ جازىلعان پەتيتسيادا. پەتيتسيا اۆتورلارى مەملەكەتتىك قىزمەتشىلەرگە, بيۋدجەت سالاسىنداعى قىزمەتشىلەرگە, اسكەري قىزمەتشىلەرگە, ۇلتتىق قاۋىپسىزدىك كوميتەتى, ىشكى ىستەر مينيسترلىگى جانە باسقا دا كۇش قۇرىلىمدارى قىزمەتكەرلەرىنە قۇمار ويىندارعا تولىق تىيىم سالۋدى ەنگىزۋ قاجەت دەپ ەسەپتەيدى.
ء«بىزدىڭ شەنەۋنىكتەر حالىقارالىق تاجىريبەگە سىلتەمە جاساعاندى ۇناتادى. ال فيليپپين مەن موڭعوليا سياقتى ەلدەردە مۇنداي تىيىمدار قازىردىڭ وزىندە بار», – دەپ مىسالدار كەلتىردى پەتيتسيا اۆتورلارى. وسى ۋاقىتقا دەيىن پەتيتسياعا 50 مىڭ قازاقستاندىق قول قويعان. بۇعان دەيىن مادەنيەت جانە اقپارات مينيسترلىگى وكىلدەرى اكىمشىلىك راسىمدىك-پروتسەستىك كودەكستىڭ 90-4-بابىنا سايكەس, پەتيتسياعا 50 مىڭ قول جيناعاننان كەيىن مينيسترلىك ونى قاراۋعا قابىلدايتىنىن مالىمدەگەن. وسى كودەكستىڭ 90-5-بابىنا سايكەس, ءوتىنىشحات تىركەلگەن كۇننەن باستاپ 40 جۇمىس كۇنىنە دەيىنگى مەپزىمدە قارالادى. وسىدان كەيىن تارتىپكە سايكەس ونىڭ قۇرامىنا مۇددەلى تۇلعالاردىڭ, مەملەكەتتىك ورگانداردىڭ جانە قوعامدىق بىرلەستىكتەردىڭ وكىلدەرى كىرەتىن جۇمىس توبى قۇرىلادى.
