لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ كاسىپوداق ۇيىمى, Altyn Qyran قوعامدىق قورى, Patriot portaly جانە Qadaz ورتالىعىنىڭ دەمەۋشىلىگىمەن باق قىزمەتكەرلەرىنىڭ كاسىبي مەرەكەسىنە وراي «زودياك» بيليارد كلۋبىندا الاشتىڭ ارداقتىسى اقسەلەۋ سەيدىمبەكتi ەسكە الۋعا ارنالعان تاستاياقتان رەسپۋبليكالىق تۋرنير ءوتتى.
جىل سايىن جۋرناليستەر اراسىندا ءداستۇرلى تۇردە ءوتىپ كەلە جاتقان بۇل جارىسقا رەسپۋبليكالىق باق وكىلدەرىمەن قاتار قويشىعارا سالعارا, سايىن نازاربەك, تولەن ابدىك سەكىلدى جازۋشىلار جانە قوعام قايراتكەرلەرى قاتىستى.
ال جارىستىڭ اشىلۋ سالتاناتىندا ءسوز سويلەگەن اتالعان ۋنيۆەرسيتەت رەكتورى, ۇعا اكادەميگى ەرلان سادىقوۆ الاشتىڭ ارداقتى ۇلى اقسەلەۋ سەيدىمبەكتىڭ قالىپتاستىرعان بيىگىنىڭ الاسارمايتىنىن ايتىپ ءبىر توقتالدى. سونىمەن قاتار ۇيىمداستىرىلىپ وتىرعان ويىننىڭ مانىنە دە نازار اۋدارىپ, تاستاياق شارلارىن ادامداردىڭ تاعدىرىمەن بايلانىستىرا سويلەپ, جارىس يەلەرىنە ومىردە دە ونەردە دە ورىندارىن ءدال جانە تۋرا تابۋىنا تىلەكتەستىك ءبىلدىرىپ جارىس شىمىلدىعىن اشتى. بەلگىلى قالامگەر, سەناتور نۇرتورە ءجۇسىپ قاتىسۋشىلارعا جەڭىس پەن ساتتىلىك تىلەدى.
سونىمەن نە كەرەك, بىرلىك پەن ىنتىماقتى نەگىز ەتىپ, ۇرپاقتار ساباقتاستىعىنىڭ تۋىن كوتەرگەن دودا ءمانى دە, ءسانى دە كەلىسىپ مارەگە جەتتى.
ناتيجەسىندە ارداگەرلەر اراسىنان ءبىرىنشى ورىندى ارداگەر فوتوجۋرناليست ماقسۋت يرجانوۆ, ەكىنشى ورىندى بەلگىلى ساتيريك-جۋرناليست بازاربەك تۇكىباي, ءۇشىنشى ورىندى ارداگەر قالامگەر سادىبەك تۇگەل, ءتورتىنشى ورىندى تۇرماعانبەت كەنجەباەۆ جەڭىپ الدى. ال جۋرناليستەر اراسىنان ءبىرىنشى ورىنعا «حابار» اگەنتتىگىنىڭ قىزمەتكەرى احمەت-ءالى ساحوۆ جايعاسسا, ەكىنشى ورىندى «ايقىن – ليتەر» حولدينگىنىڭ ديرەكتورى, بەلگىلى اقىن تالعات ەشەنۇلى, ءۇشىنشى ورىندى «Qazaqstan» تەلەارناسىنىڭ رەجيسسەرى اسىلحان ماناپوۆ, ءتورتىنشى ورىندى «ەگەمەن قازاقستان» گازەتىنىڭ ءفوتوتىلشى ەرلان وماروۆ قانجىعاسىنا بايلادى.
بۇدان باسقا «ەڭ سىيلى», «ەڭ مادەنيەتتى», «ەڭ شەبەر», «ەڭ مەرگەن», «ەڭ شاپشاڭ», «تەحنيكاسى ەڭ مىقتى تاستاياقشى» سياقتى ارنايى جۇلدەلەر دە تابىستالدى.
شاپاعات ءابدىر
