رەسپۋبليكا مەن الەمگە تانىمال سپورتشىلار استاناداعى ەكواكتسيانى قولدادى, دەپ حابارلايدى astana-akshamy.kz
ەلوردادا «تازا قازاقستان. استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسيا جالعاسۋدا. ەكولوگيالىق ءىس-شارانى قازاقستاننىڭ عانا ەمەس, شەتەلدەن كەلگەن سپورتشىلار دا قولدادى.
استاناعا دزيۋدودان حالىقارالىق جارىسقا ۆەنەسۋەلادان كەلگەن Vanessa Chalg سپورتشىسى ەكواكتسيانى كەرەمەت يدەيا دەپ سانايدى.
«تۋعان ولكەنىڭ تازالىعىن ساقتاۋعا قاتىسۋ – ءاربىر ازاماتتىڭ مىندەتى. استاناعا جارىسقا كەلگەن كەزدە بىزگە وسى جەردە وتكىزىلىپ جاتقان ەكولوگيالىق اكتسيا تۋرالى ايتىلدى. مەنىڭ ويىمشا, بۇل كەرەمەت يدەيا. ۆەنەسۋەلا سپورتشىلارى دا وسىنداي ەكواكتسيالارعا ءجيى قاتىسادى جانە ءبىزدىڭ قالالارىمىزدىڭ تازالىعىنا ۇلەس قوسادى», – دەدى ول.
ەكولوگيالىق اكتسيانى دزيۋدودان قازاقستان چەمپيونى, ەۋروپا كۋبوگىنىڭ جۇلدەگەرى ەكاتەرينا توكارەۆا دا قولدادى.
«تازا قالا – ارقايسىمىزدىڭ ەڭبەگىمىز. سەبەبى قالاداعى ءتارتىپ پەن تازالىق كوبىنەسە قالا تۇرعىندارىنىڭ مادەنيەتى مەن مىنەز-قۇلقىنا بايلانىستى. ءبىز ءبارىمىز ادەمى جانە تازا قالادا ءومىر سۇرگەندى ۇناتامىز, بىراق ونى وسىلاي جاساۋ ءۇشىن ارقايسىمىز تازالىق پەن ءتارتىپتىڭ قاراپايىم ەرەجەلەرىن ساقتاۋىمىز كەرەك. مەن سپورتشى رەتىندە ءارتۇرلى ەكولوگيالىق اكتسيالاردى قولدايمىن, قازاقستاندا تازالىقتى ساقتاۋعا جانە قورشاعان تابيعاتتى لاستاماۋعا تىرىسۋ وتە جاقسى», – دەپ اتاپ ءوتتى سپورتشى.
ەستەرىڭىزگە سالا كەتەيىك, اۋقىمدى ەكواكتسيا اياسىندا قالانى سانيتارلىق تازارتۋ, نوسەر جانە ارىق كاناليزاتسياسى, كوشەلەردى, تروتۋارلاردى, ورامىشىلىك اۋماقتاردى, قوعامدىق كەڭىستىكتەر مەن اۋلالاردى تازالاۋ جۇمىستارى جۇرگىزىلۋدە.
سونداي-اق جاسىل جەلەكتەردى كۇتىپ-ۇستاۋ جانە وتىرعىزۋ, ساۋدا نىساندارىنا ىرگەلەس اۋماقتاردى جيناۋ, كوگالدار مەن گۇلزارلار ورناتۋ, رۇقسات ەتىلمەگەن پوليگونداردى جويۋ جۇمىستارى جۇرگىزىلۋدە.
