وڭتۇستىك كورەيادا قىسقى سپورت تۇرلەرىنەن جاسوسپىرىمدەر وليمپياداسىنىڭ بايراعى كوتەرىلدى. وعان قازاقستاندىق سپورتشىلار دا اتتاندى. كوزىندە وت ويناعان, جۇرەگىندە جالىن مازداعان جاستار ەل نامىسىن لايىقتى قورعايتىنىنا سەنەمىز. ءبىزدى ۇلتتىق قۇراما مۇشەلەرى كيگەن فورما قىزىقتىردى.
اق پەن كوك ءتۇس ۇندەستىك تاپقان فورمادا ۇلتتىق ورنامەنت ۇيلەسىپتى. بارىنەن بۇرىن قۇراماعا ەنگەن ۇلدار دا, قىزدار دا تاقيا كيىپ, ۇلتتىق كيىمدى دارىپتەۋدى مۇرات ەتىپتى.
قىسقى سپورت تۇرلەرى بويىنشا وليمپيادالىق دايارلاۋ ورتالىعىنىڭ ديرەكتورى ارداق تۇلەندينگە حابارلاسىپ, جارىسقا ساتتىلىك تىلەپ, فورمانىڭ ديزاين-يدەياسىن قايدان العانىن بىلدىك.
– كورەيانىڭ كانۆوندو پروۆينتسياسىنداعى وليمپيادالىق قالاشىققا ورنالاستىق. سپورتشىلارىمىز العاشقى جاتتىعۋىن وتكىزىپ ۇلگەردى. كوماندا مۇشەلەرىنىڭ اۋىزبىرشىلىگى جاقسى. وليمپياداشىلارىمىز جاتتىعۋ كەزىندە, اسحاناعا بارعاندا فورماسىن ماقتانىشپەن كيىپ ءجۇر. وعان وزگە ەلدىڭ سپورتشىلارى قىزىعا قاراپ, بىرگە سۋرەتكە تۇسۋدە.
فورمانىڭ يدەياسىنا كەلەتىن بولساق, وليمپيادالىق دايارلاۋ ورتالىعىنىڭ ماماندارىمەن اقىلداسا كەلىپ, جاستار تاقيامەن جۇرگەنىن دۇرىس دەپ شەشتىك. بۇل يدەيانى ءمينيسترىمىز دە قولداپ, بەكىتتى. ءبىز وزگەلەردى ءوزىمىزدىڭ ۇلتتىق ەرەكشەلىگىمىزبەن, قۇندىلىعىمىزبەن تاڭعالدىرا الامىز.
دالادا وتەتىن سپورت تۇرلەرىندە سپورتشىلار جىلى كيىنەدى, ال عيمارات ىشىندە وتەتىن جارىستا جانە ماراپاتتاۋ سالتاناتىندا تاقيا كيىپ جۇرەدى. بۇل جاستاردى رۋحتاندىرادى, – دەدى ارداق تۇلەندين.
دۇرىس كوزقاراس, ۇتىمدى شەشىم. ۇلتتىق ناقىشتاعى فورما – ەلدىكتىڭ ءبىر نىشانى. توكيو وليمپياداسىندا قىرعىزستان قۇراماسى ايىر قالپاعىن كيىپ شىققاندا سۇيسىنگەن ەدىك. پاريج وليمپياداسىنا ءبىزدىڭ ۇلتتىق قۇراما دا تاقيانى كيىپ شىقسا قانداي جاراسىمدى بولار ەدى!
– قىزداردىڭ تاقياسى ۇلتتىق ناقىشتاعى ويۋمەن ورنەكتەلگەن اق ءتۇستى, ۇلداردىكى قارا ءتۇستى. فورماداعى كوك بايراق كوزگە بىردەن تۇسەدى. قالاشىقتا جۇرگەن كوماندالار اراسىندا ەستەتيكالىق تۇرعىدا تارتىمدىسى بىزدىكى دەۋگە بولادى. اۋەجايعا قونعان كەزدە كورەيالىقتاردىڭ نازارى ءبىزدىڭ تاقياعا ءتۇستى. وليمپيادا قالاشىعىنا بىزبەن بىرگە كەلگەندە اۆستريا مەن ۆەنگريا سپورتشىلارى تاڭدانىپ, بىرگە سۋرەتكە ءتۇسۋدى ۇسىنىپ جاتتى. باستىسى, جاستار جەڭىستى جولدى جاڭىلماي تاۋىپ, ءانۇرانىمىزدى كوپتەپ شىرقاتسا, – دەدى تۋريزم جانە سپورت ءمينيسترىنىڭ كەڭەسشىسى دياس احمەتشارىپ.
ءبىزدىڭ وليمپياداشىلار سپورتتىڭ 5 تۇرىنەن باق سىناپ, 55 مەدال جيىنتىعىنا تالاسادى.
