قوعامدا سۋديانىڭ ادىلدىك ورناتۋداعى, ءىستىڭ اق-قاراسىن شەشۋدەگى ءرولى قاشان دا جوعارى. مارتەبەسى ءاردايىم بيىك بولاتىنى سوندىقتان. ويتكەنى ول – زاڭگەرلىكتىڭ شىڭى, مەملەكەتتىك بيلىكتىڭ ماڭىزدى ءبىر تارماعى. بۇگىنگى تاڭدا سوت جۇيەسى مەن سۋديالاردىڭ حالىق الدىنداعى بەدەلىن ارتتىرىپ, سەنىمىن نىعايتۋدى كوزدەگەن ناقتى ىستەر قولعا الىنىپ, ول وڭ ناتيجەسىن بەرۋدە.
بۇعان كوز جەتكىزۋ ءۇشىن ولاردىڭ ەكى تاراپتى تاتۋلاستىرۋشى رەتىندەگى اتقارىلعان ىستەرىنە قاراپ باعالاۋعا بولادى. سوت اكىمشىلىگى جۇمىسىن جولعا قويۋدىڭ ارقاسىندا سۋديالاردى الەۋمەتتىك قامسىزداندىرۋدى جاقسارتۋعا, سوت عيماراتتارىن سالۋ مەن جوندەۋ باعىتىنداعى ىستەردىڭ كولەمىن ۇلعايتۋعا, پرەزيدەنت تاپسىرماسىنا ساي سوت كورپۋسىنا ۇزدىك كادرلاردى تارتۋعا قادام جاساپ كەلەدى. وتاندىق سوت تالاي جىلدان بەرى ساندىق تەحنولوگيانى سەنىمدى تۇردە قولدانىپ كەلە جاتقان مەملەكەتتىك مەكەمەلەردىڭ كوشباسشىسى سانالادى. ىستەردى سۋديالارعا اۆتوماتتى تۇردە ءبولۋ مەن «سوت كابينەتى» سەرۆيسى ارقىلى ارىز-شاعىمداردى ونلاين قابىلداۋدان باستالعان بۇل جاڭاشىلدىقتىڭ بۇگىندە ارناسى كەڭەيگەن. سونىڭ ناتيجەسىندە «سوت كابينەتى» سەرۆيسىندە كورسەتىلەتىن قىزمەتتەر شەگى ۇلعايىپ, تسيفرلاندىرۋ قاعازباستىلىقتى بارىنشا جويدى. سوت قۇجاتتارىمەن ونلاين تۇردە تانىسا الاتىن ازاماتتىق جانە اكىمشىلىك ىستەر بويىنشا «تانىسۋ» ءمودۋلى ىسكە قوسىلدى. سونداي-اق «سوت تاجىريبەسى تسيفرلىق تالداۋ» جۇيەسى پايدالانۋعا ەنگىزىلدى. وسىنىڭ ءبارى ازاماتتاردى سوت اۋرەسىنەن قۇتقارىپ, سوت بيلىگى مەن حالىق اراسىنداعى سەنىمنىڭ نىعايۋىنا جول اشتى. قوعامنىڭ شيەلەنىسىن تومەندەتەتىن, تاراپتارعا تۋىستىق, ارىپتەستىك, ەڭبەك قاتىناستارىن ساقتاۋعا كومەكتەسەتىن فاكتور – تاتۋلاسۋ. وتكەن جىلى داۋدى تاتۋلاستىرۋ تەتىكتەرى ارقىلى ءتيىمدى شەشكەندەر سانى از ەمەس. ماسەلەن, رەسپۋبليكا بويىنشا 56 مىڭ تاراپ تاتۋلاسسا, ەلوردادا وسىنداي 6 مىڭ كەلىسىمگە قول جەتكىزىلىپ وتىر. مۇنداي ىلكىمدى جاڭاشىلدىقتار الداعى ۋاقىتتا دا جالعاسا بەرەرى داۋسىز. ەڭ باستىسى, جاقسى ىسكە بىرىگىپ, ورتاق ماقسات جولىندا تالماي قىزمەت ەتۋ – پارىز.
اقتوتى ابدىقۇلوۆا,
استانا قالاسى
الماتى اۋداندىق
سوتىنىڭ سۋدياسى
