استانا تاريحى سارىارقا اۋدانىنان باستالادى. ەلوردامەن بىرگە ەسەيىپ, كوركەيىپ كەلە جاتقان اۋدان اۋماعىندا «اگروقالاشىق», «كوكتال», «كوكتال-2» تۇرعىن الاپتارى جانە «ورمان وتىرعىزۋ ۋچاسكەسى» كەنتى ورنالاسقان. وسى ەلدى مەكەندەردە جۇزەگە اسقان يگى ىستەر تۋرالى سارىارقا اۋدانىنىڭ اكىمى باۋىرجان ەرالى كەڭىنەن اڭگىمەلەدى.
– باۋىرجان بەيبىتۇلى, ەلوردانىڭ تاريحي ورتالىعى سانالاتىن سارىارقا اۋدانىنا اكىم بولىپ تاعايىندالعانىڭىزعا 7 ايعا جۋىقتاپتى. وسى ۋاقىت ارالىعىندا اۋداندا جانە تۇرعىن الاپتاردا قانداي ماسەلەلەر شەشىمىن تاپتى؟
– سارىارقا اۋدانى ەلوردا تاريحىنىڭ باستاۋى عوي. اۋداننىڭ وزىندىك ءداستۇرى, وزىندىك ەرەكشەلىگى بار. ەل استاناسى ارقاعا كوشپەي تۇرىپ تۇرعىندارىمىزدىڭ كوپشىلىگى وسى اۋداندا ءومىر ءسۇرىپ كەلەدى. ەلوردامىزدىڭ قالاي قۇرىلعانى تۋرالى ەستەلىكتەردىڭ باسىم بولىگى دە ءبىزدىڭ اۋداننان باستالادى. مۇندا كوپتەگەن تاريحي نىسان بار. وسى ورايدا تاريحي اۋداندى جاڭعىرتۋعا, ەسكى ينفراقۇرىلىمدى جاڭارتۋعا ەرەكشە نازار اۋدارىپ كەلەمىز.
اۋداندى جاھاندىق تۇردە وزگەردى دەپ ايتا المايمىن. ءبىرىنشى كەزەكتە تۇرعىنداردىڭ تىرشىلىگىنە قاجەتتى ينفراقۇرىلىمدى جاقسارتۋعا كۇش سالامىن. وزىمە دەيىن اتقارىلعان جۇمىستى جانداندىرىپ, ءارى قاراي دامىتۋدامىز. ماسەلەن, اۋدان اكىمى بولىپ تاعايىندالعاننان باستاپ تۇرعىندار تاراپىنان «شاپاعات» ساۋدا ءۇيىنىڭ ماڭىنداعى ستيحيالىق ساۋدا ورنىن الىپ تاستاۋدى وتىنگەن حاتتار كوپ كەلدى. بۇل جىلدار بويى كوتەرىلىپ كەلە جاتقان كۇرمەۋلى ماسەلە بولاتىن. قازىرگى تاڭدا ول اۋماقتا جايما بازاردى جويىپ, تولىقتاي اباتتاندىرۋ جۇمىسىن جۇرگىزدىك. ال ساۋداگەرلەرگە ءوز كاسىبىن زاڭداستىرۋعا كومەكتەسىپ, وركەنيەت تالابىنا ساي پاۆيلوندارعا, ساۋدا ۇيلەرىنە ورنالاستىردىق. سونداي-اق ك.كۇمىسبەكوۆ كوشەسىندەگى ەسكى گاراجداردىڭ ورنىنا تۇرعىنداردىڭ ءوتىنىشىن ەسكەرىپ, قوعامدىق كەڭىستىك جاسالدى. 800-گە جۋىق اعاش وتىرعىزىپ, كوپ-كورىم دەمالىس اۋماعىنا اينالدىردىق. بۇدان بولەك, جاۋىن-شاشىن شامادان تىس جاۋعان كەزدە جەكە تۇرعىن ۇيلەردى, الەۋمەتتىك نىسانداردىڭ اۋلاسىن سۋ باسىپ قالىپ جاتاتىن. وسى ماسەلەنى شەشۋ ءۇشىن اۋداننىڭ 15 كوشەسى مەن 8 ورامىشىلىك اۋماعى بويىنشا ارىق-ناۋا جەلىسى مەن سۋ وتكىزۋ قۇبىرىن جۇرگىزدىك. ناتيجەسىندە جاۋىننان كەيىن سۋ دەڭگەيىنىڭ ەداۋىر جىلدام تومەندەۋىنە سەبەپ بولدى. دەگەنمەن بۇل باعىتتاعى جۇمىس ءارى قاراي جالعاسا بەرمەك.
– اۋدان قۇرامىنداعى تۇرعىن الاپتاردا قانشا حالىق تۇرادى؟ بۇگىنگى تاڭدا ولاردى نەندەي ماسەلەلەر كوبىرەك تولعاندىرادى؟
سارىارقا اۋدانىنىڭ اۋماعىندا استانانىڭ تاريحي كۇرە تامىرى سانالاتىن ەسكى شاھار, سونىمەن قاتار, «اگروقالاشىق», «كوكتال», «كوكتال-2» تۇرعىن الاپتارى جانە «جاسىل ەل» اۋىلى ورنالاسقان. حالىق تىعىز قونىس تەپكەن اۋداندا 354 مىڭداي تۇرعىن بار
– سارىارقا اۋدانىنىڭ اۋماعىندا استانانىڭ تاريحي كۇرە تامىرى سانالاتىن ەسكى شاھار, سونىمەن قاتار, «اگروقالاشىق», «كوكتال», «كوكتال-2» تۇرعىن الاپتارى جانە «جاسىل ەل» اۋىلى ورنالاسقان. حالىق تىعىز قونىس تەپكەن اۋداندا 354 مىڭداي تۇرعىن بار. ءار تۇرعىن الاپتىڭ سۇرانىسى دا ءارتۇرلى. مىسالى, «كوكتال» تۇرعىن الابىنىڭ «نۇربەسىك» شاعىن اۋدانىندا وزگە وڭىرلەردەن كوشىپ كەلگەن تۇرعىندارىمىز كوپ. ال «اگروقالاشىقتاعى» حالىقتىڭ باسىم بولىگى – تسەلينوگراد كەزەڭىنەن بەرى وسىندا تۇراتىن جەرگىلىكتى تۇرعىندار. سايكەسىنشە, ءار جەردە ماسەلە اركەلكى. دەگەنمەن تۇرعىندارمەن كەزدەسكەندە ەڭ كوپ قوزعالاتىنى – اباتتاندىرۋ جانە ينفراقۇرىلىمدى جاقسارتۋ ماسەلەسى.
بۇگىندە تۇرعىن الاپتارداعى كوپتەگەن ماسەلە جوسپارلى تۇردە شەشىمىن تاۋىپ جاتىر. ماسەلەن, ينفراقۇرىلىم تۋرالى ايتاتىن بولساق, «كوكتال-2» تۇرعىن الابىندا 100 پايىز جارىقتاندىرۋ جۇرگىزىلىپ, جولدار اسفالتتالدى. بۇدان بولەك, ورتالىق گاز, سۋمەن جابدىقتاۋ ماسەلەلەرى شەشىمىن تاۋىپ, كارىز جۇيەسى جاسالدى جانە جوعارى جىلدامدىقتى ينتەرنەت قوسىلدى. سونىمەن قاتار «كوكتال-1» الابىنا كەلەتىن بولساق, جولداردىڭ شامامەن 60 پايىزى اسفالتتالدى. الايدا ەشقاشان اسفالت كورمەگەن كوشەلەرى دە بار. وسىعان بايلانىستى تۇرعىنداردىڭ تروتۋارلاردىڭ كەيبىر جەرلەرى دەفورماتسيالانعان دەگەن سىن ەستىپ جاتامىز. البەتتە, بۇل تۇرعىدا ۇزدىكسىز جۇمىستى جۇرگىزە بەرەمىز. اتالمىش ورتالىقتىڭ ءار ماسەلەسى – ءبىزدىڭ نازارىمىزدا.
اۋدان كەلبەتىن ساقتاۋ ءۇشىن جانە ءارى قاراي كوركەيۋى ءۇشىن جىل سايىن قاجەتتى جۇمىس جۇرگىزىلۋدە. مەملەكەت باسشىسى دا شەت ايماقتاردى دامىتۋ كەرەك دەگەن مىندەت قويدى. راسىمەن, قالانىڭ ورتالىعىندا جاسالعان جاعداي شەت ايماقتاردا دا جاسالۋى قاجەت. اكىمدىك تاراپىنان جۇرگىزىلەتىن قانداي دا ءبىر يگىلىكتى, حالىق بيۋدجەتىنە جاسالاتىن شاراپاتتى تۇرعىندار تەڭ كورۋگە ءتيىس.
ال «اگروقالاشىققا» توقتالار بولساق, بۇل ايماق – جەردى زاڭسىز يەمدەنۋ ەلەمەنتىنە بايلانىستى پايدا بولعان كۇردەلى جەر تەلىمى. ۇيلەر باتپاقتى جەرلەردە ورنالاسقاندىقتان, يگەرىلۋى وتە قيىن ايماق. وڭ جاعالاۋداعى ءتورت باتپاق تۇگەلدەي ءدال «اگروقالاشىق» اۋماعىندا ورنالاسقان. اسىرەسە كوكتەمدە ەرىگەن قار مەن جەراستى سۋى كوتەرىلگەن كەزدە جاعداي ۋشىعىپ جاتادى. بۇگىندە بۇل ماسەلە دە جەر يگەرىلۋى ەسەبىندە اقىرىنداپ شەشىمىن تاۋىپ جاتىر. سونىمەن قاتار «اگروقالاشىق» تۇرعىن الابىندا كارىز جوباسى جاسالۋدا. بۇل جوعارىدا ايتقان ماسەلەنىڭ شەشىمىن تابۋعا سەپتىگىن تيگىزەدى.
جالپى Telegram الەۋمەتتىك جەلىسىندە اۋدان تۇرعىندارىنىڭ چاتى بار. سول چاتتا مەن دە بارمىن. چاتتا تۇرعىندار ءوز پروبلەماسى تۋرالى اشىق جازا الادى. حالىقپەن ءجيى كەزدەسۋ وتكىزەمىز. جەكە قابىلداۋ دا بار. ءبىر سوزبەن ايتقاندا, تۇرعىندارمەن ۇنەمى بايلانىستامىز جانە بارلىق سۇراققا اشىقپىز.
– قازىرگى كەزدەگى ەڭ وزەكتى پروبلەمانىڭ ءبىرى – ەلوردانى گازداندىرۋ. بۇل باعىتتا قانداي جۇمىس جۇرگىزىلىپ جاتىر؟ اۋدان تۇرعىندارى تولىعىمەن گازداندىرىلدى ما؟
– راسىمەن دە, تۇرعىن الاپتاردى گازداندىرۋ جانە ەنەرگيا كوزدەرىن گازعا كوشىرۋ اتموسفەراعا تيگىزەتىن زياندى ازايتادى. سونداي-اق گاز باللوندارىن پايدالانۋعا بايلانىستى توتەنشە جاعدايلاردى بارىنشا ازايتۋعا مۇمكىندىك بەرەدى.
بۇگىندە سارىارقا اۋدانىندا گازداندىرۋ پروتسەسى 90 پايىزعا جۇرگىزىلگەن. بۇل 4413 ابونەنتتى قۇرايدى.
بۇرىن گازدى ۇيگە كىرگىزۋ ماسەلەسى وتە قيىن بولاتىن. قۇجاتتاردى 8 تارماق بويىنشا ۇسىنۋ قاجەت بولدى. ءبىر عانا نۇسقاسىن ورىنداۋ ءۇشىن ميلليون تەڭگە جۇمساۋ قاجەت ەدى. ال قىزمەتتىڭ ءوزى 76 جۇمىس كۇنىن الاتىن. ءوزىڭىز ويلاڭىز, ءبىر قۇجات ءۇشىن ادام جارتى جىل جۇگىرەتىن. استانا قالاسىنىڭ اكىمى ۇكىمەتپەن اقىلداسىپ, قولداۋ تابۋىنىڭ ناتيجەسىندە قۇجاتتار ءتىزىمىن بارىنشا قىسقارتىپ, تۇرعىندارىمىز ءۇشىن مۇمكىندىگىنشە قاراپايىم جانە ىڭعايلى توتە جولىن جاسادىق. بۇل گازداندىرۋ پروتسەسىنە بەلگىلى ءبىر دارەجەدە سەرپىن بەردى.
– سارىارقا اۋدانىنىڭ اۋماعىنداعى جولداردىڭ جاعدايى قالاي؟ بيىل قاي كوشەلەر جوندەلدى؟
– بۇگىندە اۋدان كوشەلەرىنىڭ 82 پايىزى تولىقتاي اسفالتتالعان. بيىل جوسپارلانعان 21 كوشەنى قالپىنا كەلتىرىپ, ورتاشا جوندەۋ جۇمىسىن جۇرگىزدىك. ودان بولەك, ش.بەيسەكوۆا كوشەسى مەن ن.تىلەنديەۆ داڭعىلىنىڭ قيىلىسىندا ەكى دەڭگەيلى جولايىرىق سالىنۋدا. اتالعان قۇرىلىس جۇمىسى قالاعا كىرىپ-شىعاتىن 20 مىڭ كولىكتىڭ ءجۇرۋىن جەڭىلدەتىپ, ن.تىلەنديەۆ, بوگەنباي باتىر داڭعىلدارى جانە اقان سەرى مەن قارامەندە بي شاقاۇلى كوشەلەرىندەگى كەپتەلىستەن ارىلتادى.
– اۋداندا قانشا اۋلا بار, بيىل قانشا اۋلا اباتتاندىرىلدى؟ «حالىق قاتىساتىن بيۋدجەت» جوباسى تۋرالى دا از-كەم اڭگىمەلەي وتىرساڭىز.
– بيىل 40 اۋلا اۋماعىن اباتتاندىردىق. جالپى, اباتتاندىرۋدىڭ بىرىڭعاي ستاندارتىنان بولەك, ءار اۋلانىڭ ءوز ەرەكشەلىگى بار. تۇرعىنداردىڭ دا تىلەگىن ەسكەرۋ قاجەت. مۇنىڭ بارلىعىن ءاردايىم قاپەرىمىزدە ۇستايمىز. سونىمەن قاتار بيىل تاريحي كوشەلەردى رەكونسترۋكتسيادان وتكىزۋدى جوسپارلاعانبىز. سونىڭ اياسىندا «شاپاعات» ساۋدا ءۇيى ايماعىنداعى 12 اۋلا كوگالداندىرىلىپ, ويىن الاڭى جاڭارتىلدى, جارىقتاندىرۋ جۇمىسى جۇرگىزىلىپ, اۋماقتىڭ تاسجولى تولىق جوندەۋدەن ءوتتى. ناتيجەسىندە 4,5 مىڭ اۋلا تۇرعىنىن قۋانتتىق.
اۋدان كەلبەتىن ساقتاۋ ءۇشىن جانە ءارى قاراي كوركەيۋى ءۇشىن جىل سايىن قاجەتتى جۇمىس جۇرگىزىلۋدە. مەملەكەت باسشىسى دا شەت ايماقتاردى دامىتۋ كەرەك دەگەن مىندەت قويدى. راسىمەن, قالانىڭ ورتالىعىندا جاسالعان جاعداي شەت ايماقتاردا دا جاسالۋى قاجەت. اكىمدىك تاراپىنان جۇرگىزىلەتىن قانداي دا ءبىر يگىلىكتى, حالىق بيۋدجەتىنە جاسالاتىن شاراپاتتى تۇرعىندار تەڭ كورۋگە ءتيىس
وعان قوسا, «حالىق قاتىساتىن بيۋدجەت-2023» جوباسى بويىنشا اۋدانىمىزدىڭ 15 اۋلاسىندا كەشەندى اباتتاندىرۋ جۇمىسى اياقتالدى. اعىمداعى جوندەۋ جۇمىسى اياسىندا قوسىمشا 13 اۋلا اۋماعى جاڭارتىلدى. وسى ورايدا ايتا كەتەيىك, اۋدان تۇرعىندارى اۋلانى تولىقتاي جوندەۋ, سكۆەر, ساياباق, قوعامدىق كەڭىستىك سالۋ, تروتۋارلاردى جايلاستىرۋ, اۋداندى كوگالداندىرۋ جانە ت. ب. باعىتتار بويىنشا ءوزىنىڭ ءوتىنىشى مەن جوسپارىن ۇسىنا الادى.
تۇرعىندار ناقتى وزگەرىستەردى جانە جوبا ءۇشىن قاجەتتى سومانى كورسەتە وتىرىپ, اباتتاندىرۋ جوسپارىن ازىرلەۋى كەرەك. دايىن جوسپاردى قالا تۇرعىندارى اۋداندىق اپپاراتتىڭ رەسمي سايتىنا جۇكتەيدى. وتىنىمدەر تەحنيكالىق تەكسەرۋ جانە تالداۋ كەزەڭىنەن سوڭ تۇرعىنداردىڭ داۋىس بەرۋىنە شىعارىلادى. ەڭ سوڭىندا جەڭىپ شىققان جوبانى جۇزەگە اسىرامىز.
– قوعامدىق كەڭىستىكتەر تۋرالى نە ايتاسىز؟
– اباتتاندىرۋ بارىسىندا قالا تۇرعىندارىنىڭ يدەياسىنا, قالاۋىنا قۇلاق اسىپ, جوبالاردى ىسكە اسىرۋ بويىنشا بىرگە اقىلداسامىز. بيىل وسىنداي بىرقاتار ۇسىنىس جۇزەگە اسىپ, قوعامدىق كەڭىستىكتەر پايدا بولدى. ماسەلەن, كوكتوبە كوشەسى, 5-ءۇيدىڭ ىرگەسىندە بوس جاتقان الاڭنىڭ ورنىنا سپورت-ويىن ايماعى, دەمالۋ ورنى اباتتاندىرىلدى. ال ك.كۇمىسبەكوۆ كوشەسى, 7/1-ءۇيىنىڭ الدىنداعى ەسكى گاراجداردىڭ ورنىنا اۋدان تۇرعىندارىنىڭ دەمالۋىنا ىڭعايلى ءارى قاۋىپسىز قوعامدىق كەڭىستىك اباتتاندىرىلدى. ياعني جاياۋ جۇرگىنشىلەر جولى سالىنىپ, جارىقتاندىرۋ جۇرگىزىلدى جانە 800-دەن استام جاسىل جەلەك, ال جالپى اۋدان بويىنشا 5 مىڭعا جۋىق اعاش وتىرعىزىلدى.
سونداي-اق فاحد بەن ابدۋل ازيز كوشەسىندە, بوگەنباي باتىر داڭعىلى 43/1-ءۇي, ىقىلاس دۇكەنۇلى, 30-ءۇي مەكەنجايلارىندا ورىندىقتار مەن اتكەنشەكتەرى بار دەمالىس ايماقتارى, ىقىلاس دۇكەنۇلى, 34-ءۇي اۋلاسىندا جاڭا سپورت الاڭى جانە سكەيت-پارك پايدا بولدى. وعان قوسا, جەلتوقسان, بۇقارباي باتىر, اعىباي باتىر, بەيبىتشىلىك كوشەلەرى, بوگەنباي باتىر, رەسپۋبليكا داڭعىلدارىندا دا اباتتاندىرۋ جۇمىسى جۇرگىزىلدى. ونىڭ ىشىندە كەدەرگىسىز ورتا قۇرىلىپ, اۋدان تۇرعىندارىنا قولدانىسقا بەرىلدى. بۇل وزگەرىستەردىڭ بارلىعى ەلوردامىزدىڭ جايلىلىعىن ارتتىرىپ, تاريحي اۋداننىڭ كەلبەتىن كوركەيتە ءتۇستى.
– تۇرعىنداردى تولعاندىرعان تاعى ءبىر ماسەلە – مەكتەپتەر مەن بالاباقشالاردىڭ جەتىسپەۋشىلىگى. بۇل پروبلەما قاشان شەشىلەدى؟
– مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا استانا شاھارىندا 24 مەكتەپ سالىنادى. سول «جايلى مەكتەپتىڭ» ەكەۋى سارىارقا اۋدانىندا بوي كوتەرەدى.
قازىر قاراساي باتىر مەن بۇلانتى كوشەلەرىنىڭ قيىلىسىنداعى مەكتەپ قۇرىلىسىنىڭ جۇمىسى اياقتالىپ قالدى. تەك ىشكى جوندەۋ جۇمىسى قالعانىن اتاپ وتكىم كەلەدى.
– اۋدانداعى ءسىز ءۇشىن ەڭ وزەكتى پروبلەما قايسى, ونى قالاي شەشۋگە بولادى دەپ ويلايسىز؟
– جوعارىدا اتاپ وتكەنىمدەي, ەڭ باستى ماسەلەنىڭ ءبىرى – ينفراقۇرىلىم. بيىل اۋداننىڭ توزىعى جەتكەن داڭعىلدارىن اباتتاندىرۋدى قولعا الماقپىز. قازىر جوباسىن جاساۋدامىز, الداعى ۋاقىتتا ناقتىراق جاريالايمىن.
ءىرى جوسپارلار تۋرالى ايتساق, «نۇربەسىك» شاعىن اۋدانىندا ينجەنەرلىك ينفراقۇرىلىم جۇمىسىن تولىعىمەن اياقتايمىز. بۇگىندە بۇل ايماقتا كارىز, سۋ جانە سۋ قۇبىرى قۇرىلىسىن جۇرگىزۋدەمىز. ودان بولەك, بيىل اۋدانىمىزدىڭ 6 كوشەسىندە جارىقتاندىرۋ جۇرگىزىلدى. بۇرىن بۇل كوشەلەردە جارىق مۇلدەم بولماعان. ەندى جىلدىڭ سوڭىنا دەيىن تەحنيكالىق مۇمكىندىك بولعان جاعدايدا, كوممۋنالدىق قىزمەتتەرمەن كەلىسىپ, تاعى دا جارىعى جوق 24 كوشەگە شامدار قويۋدى جوسپارلاپ وتىرمىز.
سونداي-اق «كوكتال-2» ىقشام اۋدانىندا 800 ورىندىق كوپسالالى اۋرۋحانانىڭ قۇرىلىسى بەلسەندى جۇرۋدە. پايىمداۋىمشا, اۋرۋحانانىڭ قۇرىلىسى تولىق بىتكەن سوڭ اۋداننىڭ عانا ەمەس, قالامىزداعى جالپى جۇرتتىڭ ەم-دوم قابىلداۋىنا سەپ بولادى, مەگاپوليستىڭ مەديتسينا سالاسىندا اقساپ جاتقان كۇرمەۋلى ماسەلەنى شەشۋگە ءتيىس.
– استانانىڭ ومىرىڭىزدە الاتىن ورنى قانداي؟ باس قالانىڭ قاي جەرى سىزگە ەرەكشە ۇنايدى؟ نەسىمەن؟
– ەڭ ءبىرىنشى, سۋبەكتيۆ پىكىرىم دەپ قابىلداڭىز, شىنىن ايتقاندا, ماعان استانانىڭ ساف ءارى تازا اۋاسى ۇنايدى. ازاتتىق ءۇشىن ارپالىسقان حان كەنەنىڭ رۋحى سىڭگەن, ەل رۋحانياتىنا ۇيىتقى بولعان شاھار دەسەك جاراسادى. البەتتە, «استانا – جاستار قالاسى, بولاشاقتىڭ قالاسى» دەپ بەكەر ايتىلماعان.
ەلورداعا ارمان قۋىپ كەلدىك. وسىندا ءبىلىم الدىق, وندىك, وركەندەدىك. ەڭبەك جولىم دا وسى قالادا باستالدى, بۇگىندە استانالىقتاردىڭ يگىلىگى ءۇشىن بارىنشا قىزمەت ەتىپ ءجۇرمىن. قولىمىز قالت ەتكەندە وتباسىممەن ەسىلدىڭ جاعالاۋىندا قىدىرعاندى جاقسى كورەمىن. اۋدانىمىزدىڭ تەاترلارىنا بارىپ تۇرامىن. بىراق وقىرمانعا مىنا جايتتى ايتا كەتۋىم كەرەك, مۇنداعى تەاترلاردا انشلاگ وتە جوعارى. 1-2 اي بۇرىن بيلەتى تاۋسىلىپ كەتەتىن رۋحاني ورتالىقتارىمىز بار. جالپى دەمالامىن دەگەن ادامعا استانادا جايلى ورىن جەتەرلىك.
اۋدانىمىزدىڭ حالقى وتە بەلسەندى. كەزدەسۋلەردە, باسقا دا جيىنداردا ءوزىنىڭ ويىن, كەلەلى ماسەلەنى كولدەنەڭ, وتكىر ساۋالدارىن ەش بۇكپەسىز ءارى اشىق جەتكىزىپ وتىرادى. جاناشىر جاندار كوپ. جوبالاردى تالقىلاۋعا, جۇزەگە اسىرۋعا ءاردايىم تۇراقتى اتسالىسىپ وتىرادى. البەتتە, اۋدانىمىزدىڭ كوركەيۋى ءۇشىن الداعى ۋاقىتتا دا ارقاشان بىرلەسە جۇمىس اتقارا بەرەمىز دەپ سەنەمىن. ءوز باسىم كەز كەلگەن تۇرعىنعا اشىقپىن. سارىارقالىق تۇرعىندارعا ايتار تىلەگىم ۇشان-تەڭىز. مۇقاعالي اقىن ايتقانداي, «جىلۋىن بەرىپ جەبەگەن, ۇيقىمەن ءتاتتى بولەگەن» باسپانالارىڭىز باقىتتىڭ وشاعى بولسىن, ءار ءۇيدىڭ ىشىندە مەيىرىم مەن ماحاببات بولسىن! اۋدانىمىز جىلدان-جىلعا تۇرلەنىپ, گۇلدەنە بەرسىن!
