مامىر ايىندا قازاقستاندىق اۆتوديلەرلەر 12 813 جاڭا كولىك ساتقان, بۇل ءبىر جىل بۇرىنعىدان 13,2 پايىزعا از, دەپ حابارلايدى astana-akshamy.kz
اعىمداعى جىلدىڭ ءساۋىر ايىندا قازاقستاننىڭ اۆتوموبيل نارىعىندا ساتىلىمنىڭ وسكەنى بايقالعان بولاتىن, الايدا مامىردا بۇل ءۇردىس جالعاسىن تاپپادى.
قازاقستان اۆتوموبيل وداعىنىڭ (قاو) مالىمەتىنە سۇيەنسەك, ءبىر ايدا ەلدەگى اۆتوسالوندار 12 032 جەڭىل اۆتوكولىك, 781 جۇك كولىگىن جانە ءبىر اۆتوبۋس ساتقان. بۇل 2024 جىلعى ساۋىرمەن سالىستىرعاندا 19,56 پايىزعا جانە وتكەن جىلمەن سالىستىرعاندا 13,2 پايىزعا از. الايدا, قاو اتاپ وتكەندەي, مۇنداي قۇلدىراۋ الدىن الا بولجانعان جانە قازىر نارىق بۇرىنعى بەتالىسىنا ورالىپ كەلە جاتىر. ءبىر قىزىعى, قازاقستاندا جاڭا كولىكتەردىڭ ساتىلىمى ازايىپ قانا قويماي, اۆتونەسيەگە سۇرانىستىڭ دا ايتارلىقتاي تومەندەگەنى بايقالادى.
مامىر ايىندا نەسيەلەر سانى 10 پايىزعا, ال ولاردىڭ جالپى سوماسى 7 پايىزعا قىسقارعانىن بۇعان دەيىن حابارلاعان بولاتىنبىز. بۇل جاعداي ساتىلىممەن بايلانىستى بولۋى ابدەن مۇمكىن.
تانىمال اۆتوكولىك برەندتەرىنە كەلەتىن بولساق, مامىر ايىندا قازاقستاندىقتار Chevrolet Cobalt كولىگىن كوپ ساتىپ الدى – 1165. ودان كەيىن Hyundai Tucson – 1138 ساتىلىم, ال ۇزدىك ۇشتىكتى Kia Sportage اياقتادى. ونىڭ ساتىلىم سانى 900 بولدى. سونداي-اق ۇزدىك بەستىككە JAC J7 جانە Haval M6 – سايكەسىنشە 514 جانە 438 ساتىلىمدار كىرەدى.
جىل باسىنان بەرى قازاقستاندىقتار 66 457 اۆتوكولىك ساتىپ الدى, بۇل وتكەن جىلدىڭ سايكەس كەزەڭىمەن سالىستىرعاندا 0,1 پايىزعا ارتىق.
مامىرداعى بايقالاتىن تومەندەۋ نارىقتاعى سۇرانىستىڭ ناقتى تومەندەۋىنە اكەلمەگەنى بەلگىلى بولدى. جالپى العاندا, ساراپشىلار 2024 جىلى اۆتوديلەرلەر شامامەن 160-165 مىڭ جاڭا اۆتوكولىك ساتا الادى دەپ بولجايدى.
ەسكە سالا كەتەيىك, بۇعان دەيىن قازاقستاندا ەسكى كولىكتەردىڭ – 20 جىلدان اسقان كولىكتەردىڭ ۇلەسى ارتىپ كەلە جاتقانى بەلگىلى بولدى.
