«تازا قازاقستان» اۋقىمدى ەكواكتسياسى اياسىندا جانە دۇنيەجۇزىلىك قورشاعان ورتانى قورعاۋ كۇنىنە وراي استانادا اۋقىمدى ەكولوگيالىق ءىس-شارا وتكىزىلدى, دەپ حابارلايدى astana-akshamy.kz
ەكواكتسياعا «جاسىل ەل» جاستار ەڭبەك جاساعىنىڭ 100-گە جۋىق جاۋىنگەرى قاتىستى. ەكواكتسيا ماقساتى – الەمدىك قوعامداستىقتىڭ نازارىن قورشاعان ورتانىڭ ماڭىزدى پروبلەمالارىنا اۋدارۋ جانە قازاقستاندىقتاردى تابيعاتقا ۇقىپتى قاراۋعا باۋلۋ.
«بۇگىنگى ءىس-شارا «تازا قازاقستان: استانا – تازالىق پەن ءتارتىپتىڭ ۇلگىسى» ەكولوگيالىق اكتسياسى اياسىندا وتكىزىلدى. قالا اۋماعىن جيناۋ بويىنشا بۇل ەكواكتسيانى «جاسىل ەل» حح ماۋسىمىنىڭ 100-دەن استام جاۋىنگەرى قولدادى. ءبىز قورشاعان ورتانى تازا ۇستاۋعا ەرەكشە نازار اۋدارامىز. تازالىق پەن تارتىپتە ءومىر ءسۇرۋ ەلوردانىڭ ءاربىر تۇرعىنى ءۇشىن كۇندەلىكتى ومىرگە اينالۋى ءتيىس. مۇنداي تازالاۋ جانە كوگالداندىرۋ شارالارى حالىقتىڭ ەكولوگيالىق مادەنيەتىنە جاقسى اسەر ەتەدى. ءبىز سونداي-اق جاستارىمىزدى تاربيەلەپ, قورشاعان ورتاعا ۇقىپتى قاراۋعا تاربيەلەۋىمىز كەرەك. ەكولوگيالىق اكتسيالار تۇراقتى نەگىزدە جۇرگىزىلەتىن بولادى, سونداي-اق «جاسىل ەل» جاستارى قالامىزدىڭ ساياباقتارىن, سكۆەرلەرىن, مەكتەپ جانىنداعى اۋماقتارىن قوقىستان تازارتاتىن بولادى», – دەدى ەلوردالىق جاستار ساياساتى ماسەلەلەرى باسقارماسىنىڭ باس مامانى ەرلان ايدار.
ەكولوگيالىق اكتسيانى استانا قالاسىنىڭ جاستار ساياساتى ماسەلەلەرى جونىندەگى باسقارماسى مەن بايقوڭىر اۋدانى اكىمدىگىنىڭ قولداۋىمەن «ستۋدەنتتىك قۇرىلىس جانە جاستار جاساقتارىنىڭ رەسپۋبليكالىق قوزعالىسى» قوعامدىق قورى ۇيىمداستىردى.
«مەن «جاسىل ەل» قاتارىنا كىرىپ, بۇگىنگى ەكواكتسياعا قاتىسۋعا بەل بۋدىم, ويتكەنى مەن تابيعاتقا جانە قالامىزعا كومەكتەسكىم كەلدى. كەيبىر ادامدار قوقىستى دۇرىس ەمەس جەرگە تاستايدى جانە ونىڭ قورشاعان ورتاعا قالاي زيان تيگىزەتىنى تۋرالى ويلانبايدى. بىراق اركىم وزىنە جانە ءبىزدىڭ تابيعاتىمىزعا جاۋاپتى بولۋى كەرەك», – دەپ ءبولىستى «جاسىل ەل» قاتىسۋشىسى اياۋجان اقىشەۆا.
ايتا كەتەيىك, «جاسىل ەل» جوباسى اياسىندا ەلوردادا بيىل 14-35 جاس ارالىعىنداعى 4200-دەن استام جاستار جۇمىسپەن قامتىلاتىن بولادى. ولار قالامىزدىڭ قۇرىلىس نىساندارىندا, قالا ماڭىنداعى «جاسىل بەلدەۋدە», الەۋمەتتىك نىسانداردىڭ, جالپى ءبىلىم بەرۋ مەكەمەلەرى مەن قالالىق ساياباقتاردىڭ اۋماعىندا جۇمىس ىستەيدى.
