استانادا بەلگىلى تەاتر رەجيسسەرى, قازاقستاننىڭ ەڭبەك سىڭىرگەن ونەر قايراتكەرى بولات اتاباەۆ تۋرالى تۇسىرىلگەن «مىڭ جىلدىق ويىن» دەرەكتى ءفيلمىنىڭ تۇساۋكەسەرى ءوتتى. تۋىندىنىڭ قويۋشى رەجيسسەرى – قانات تىلەۋحان.
اۆتوردىڭ ايتۋىنشا, ءفيلمدى ءتۇسىرۋ 2021 جىلى, رەجيسسەردىڭ 70 جىلدىعىنا وراي جوسپارلانعان ەدى. الايدا رەتى وتكەن جىلى عانا كەلدى. وعان تەلەجۋرناليست, ءماجىلىس دەپۋتاتى ماقسات تولىقبايدىڭ دانەكەر بولۋىمەن كاسىپكەر ماحات تورەالى دەمەۋشىلىك كورسەتتى.
«تەاتردىڭ مىڭ جىلدىق ويىنى ءالى جالعاسىپ جاتىر. اۆتوريتارلىق جۇيەنىڭ, ديكتاتورلىق بيلىكتىڭ سوناۋ ريم يمپەرياسىنان بەرگى يمپەراتورلاردىڭ حالىقپەن ويناۋىنا دا مىڭ جىل. وسى مىڭ جىلدىق ويىنداردىڭ اراسىندا باسىن تاسقا دا, تاۋعا دا سوققان رەجيسسەردىڭ بەينەسىن جاساۋعا مۇمكىندىگىمىزشە تىرىستىق. ارينە, ەرمەك تۇرسىنوۆ ايتقانداي, بولات اعا – ەڭ ءبىرىنشى كەزەكتە سۋرەتكەر. بۇل – تەاتردىڭ قارسىلىعى, تەاتردىڭ كۇرەسى. ونەر ارقىلى ول كىسى ءوزىنىڭ ءسوزىن ايتقىسى كەلدى. ەركىندىك, دەموكراتيالىق قۇندىلىقتاردى دارىپتەگىسى كەلدى» دەيدى فيلم اۆتورى قانات تىلەۋحان.
ءفيلمدى تاماشالاعان بەلگىلى جازۋشى-دراماتۋرگ, اباي اتىنداعى مەملەكەتتىك سىيلىقتىڭ لاۋرەاتى روزا مۇقانوۆا تۋىندى جانە ونىڭ كەيىپكەرى تۋرالى تەبىرەنە كەلە, «بولات اتاباەۆ شىن مانىندە تەاتردىڭ رەفورماتورى بولدى» دەدى.
فيلم ساياسي ۇستانىمى ءۇشىن ەلدەن جىراق كەتكەن رەجيسسەردى كورەرمەنگە جاقىننان تانىتتى. كوپ جەردە جاريالانباعان بولات اتاباەۆتىڭ بەينەجازبالارى, قانات تىلەۋحاننىڭ ودان العان سۇحباتتارى مەن «كورول لير» قويىلىمى استاسىپ تۇسىرىلگەن. ءفيلمنىڭ باستاپقى اتاۋى «ابايدىڭ دوسى» بولعان. الايدا تەاتر رەجيسسەرىنىڭ شاكىرتى ازامات شارعىننىڭ ۇسىنىسىمەن «مىڭ جىلدىق ويىن» بولىپ وزگەرتىلدى.
تۇساۋكەسەردە «بولات اتاباەۆتىڭ مىقتى رەجيسسەرلىگى ءوز الدىنا, ول وسى كۇندەلىكتى ومىردە دە ادىلدىك ءۇشىن كۇرەسىپ وتكەن قايراتكەر جانە سول شىنايىلىقتى ساحنادان دا تالاپ ەتەتىن» دەدى ماقسات تولىقباي.
