استانادا قوعامدىق كولىك تىزگىندەگەن ارۋلار ساۋساقپەن سانارلىقتاي عانا. سولاردىڭ ءبىرى – تاعدىردىڭ قاتال سىناعىنا مويىماي, ءومىردىڭ قيىندىقتارىنا قايسارلىقپەن توتەپ بەرىپ, 25 جىلدان بەرى جولاۋشىلار تاسىمالى سالاسىندا جەمىستى ەڭبەك ەتىپ كەلە جاتقان ەلوردالىق ساكەن پىشەنبايقىزى.
ونىڭ بالالىق بال كۇندەرى اقمولا وبلىسىنىڭ قورعالجىن اۋدانىنا قاراستى امانكەلدى كەڭشارى مەن جۇماي بولىمشەسىندە وتەدى. باستاۋىشتى بىتىرگەننەن كەيىن اۋدان ورتالىعىندا وقىپ, 7-سىنىپتى بىتىرگەن جىلى وتباسى جاعدايىمەن قالاعا كوشەدى. مۇندا كەلگەن سوڭ №4 جالعىز قازاق مەكتەبىندە ءبىلىمىن جالعاستىرادى. ورتا مەكتەپتى ويداعىداي تامامداعانمەن, قارشاداي قىز-قۇربىلارىنا ۇقساپ جوعارى وقۋ ورنىنا تۇسۋگە اسىقپادى. بىرگە تۋعان باۋىرلارى بولماعاندىقتان, ەگدە تارتقان اناسىنىڭ دەنساۋلىعىنا الاڭداپ, سول كەزدەگى توقىما-ءجىپ ءيىرۋ فابريكاسىنا جۇمىسقا ورنالاسادى.
جالعىز پەرزەنتىن بەتىنەن قاقپاي وسىرگەنمەن, اناسى ونى ەڭبەككە ەرتە جاسىنان باۋلىپ, ۇقىپتىلىق پەن ادالدىققا ۇيرەتتى. سودان بولار, ساكەن پىشەنبايقىزى تىم پىسىق بولىپ بوي جەتتى. ەش جۇمىستى قيىنسىنبادى. مىلتىق اتۋ, تەننيس ويناۋ سەكىلدى ەر بالالارعا ءتان ويىندارعا قۇمارتىپ, تۋىسقان اعالارىمەن بىرگە ءشوپ شاۋىپ, ك-700, زيل ايداۋدى ۇيرەنەدى. فابريكادا دا العىرلىعىمەن ايرىقشالانىپ, جۇمىسقا ەندى ۇيرەنىسىپ كەلە جاتقاندا قيىن-قىستاۋ زامان تۋىپ, كاسىپورىن جابىلىپ قالادى. بۇل ەل ىشىندە اۋىرتپالىق تۋدىرعان 90-جىلدار بولاتىن.
سول تۇستا قالادا جۇمىس ىستەپ تۇرعان بىردەن-ءبىر مەكەمە تروللەيبۋس پاركى ەدى. قارشاداي قىز قۇجاتىن الىپ سوندا كەلەدى. مۇندا الدىمەن كوندۋكتور بولىپ جۇمىسقا ورنالاسقان ول كوپ ۇزاماي تروللەيبۋس جۇرگىزۋدى ۇيرەنىپ الادى. بۇل كەزدە قالادا تروللەيبۋس جۇرگىزۋشىلەرى جەتىسپەيتىن. سوندا ءجۇرىپ توپپەن بىرگە ءبىلىمىن جەتىلدىرىپ, ءوزى اقشاسى كوبىرەك كرانشىنىڭ وقۋىنا بارعىسى كەلگەنمەن, نۇسقاۋشىسىنىڭ ايتۋىمەن «تروللەيبۋس جۇرگىزۋشىسى» كۋالىگىن الىپ شىعادى. ءسويتىپ, جۇرگىزۋشى بولىپ جۇمىس ىستەپ جۇرگەندە پارك جابىلىپ قالادى. قايسار قىز بۇل كەزەڭنەن دە سۇرىنبەدى. تاعى ءبىر جىلداي وقۋىن جالعاستىرىپ, ۆ, س, د كاتەگوريالارىن الىپ, قالاداعى №3 پارككە اۆتوبۋس جۇرگىزۋشىسى بولىپ جۇمىسقا ورنالاسادى.
سول جەردە ءجۇرىپ تاعدىردىڭ ۇلكەن سىناعىنا تاپ بولىپ, قاتەرلى ىسىك دياگنوزى قويىلعان سوڭ مۇگەدەكتىككە شىعارىلسا دا, قيىندىققا مويىماي, ماڭدايعا سالعانعا ءتوزىپ, باسىنان وتكەرگەن اۋىر جاعدايدان كەيىن تەز بويىن جيناپ, №1 پارككە بارىپ, جارتى كۇندىك جۇمىسقا اۋىستىرىلادى. ودان سوڭ مان, يۆەكو, سيتەلوس, ۋربان اۆتوبۋستارىندا جۇرگىزۋشى بولعان ساكەن لەيب بۇگىندە №25 ەلەكتروبۋستا جۇرگىزۋشى بولىپ ەڭبەك ەتىپ ءجۇر.
– قوعامدىق كولىكتى تىزگىندەۋ ۇلكەن جاۋاپكەرشىلىك پەن باتىرلىقتى تالاپ ەتەدى. 2000 جىلدارى العاش رەت تروللەيبۋس جۇرگىزدىم. بۇل كولىك قۇرالى اۆتوبۋسقا قاراعاندا قيىنداۋ. اۆتوبۋستا ءبىر-اق جول بولسا, تروللەيبۋستا الدىڭنان كوز الماي وتىرىپ, توبەدە دە جولدىڭ بارىن ەستەن شىعارماۋ كەرەك. اسپالى ەكى سىم شىعىپ كەتكەن جاعدايدا, جىپتەن تارتىپ ورنىنا كەلتىرەتىنبىز. جول قوزعالىسى كەزىندە بۇرىلۋ دا وڭاي ەمەس. اسىرەسە تايعاق كەزدەردە ابايلاماسا بولمايدى. بىردە جۇمىس ۋاقىتى اياقتالعان سوڭ اۆتوبۋستى تروللەيبۋسپەن شاتاستىرىپ, ديزەل وتىنىن قۇيۋدى ۇمىتىپ, رەيسكە شىعىپ كەتكەنىم بار. جاراتىلىسى نازىك جاندار ءۇشىن قوعامدىق كولىك ايداۋدىڭ قيىندىعى مەن قىزىعى وسىلايشا قاتار جۇرەدى. اۆتوبۋسىم بۇزىلىپ قالعاندا ارىپتەستەرىم كومەككە كەلەتىن, كەيدە سولارمەن بىرگە ماي-ماي بولىپ جۇرەتىن كەزدەر ەسىمە تۇسەدى. قازىر ءبارى ارتتا قالدى, – دەدى جۇرگىزۋشى.
ايتۋىنشا, تاڭعى 5-تەن جۇمىسقا شىعادى. كەيدە رۋلدە ايەل ادامنىڭ وتىرعانىن كورە تۇرا جول بەرمەيتىندەر كەزدەسىپ قالادى. وندايدا مىنەز كورسەتىپ قوياتىنىن جاسىرمادى.
– مەن ايدايتىن اۆتوبۋسقا ۇلكەن كىسىلەر ءجيى مىنەدى. كولىكتەن ءتۇسىپ بارا جاتىپ «وتە جەڭىل ءارى بايىپپەن جۇرگىزەدى ەكەنسىز» دەپ شىنايى ريزاشىلىعىن ءبىلدىرىپ جاتادى. ونداي سوزدەردى ەستىگەندە شاتتانامىن. كەيدە كەۋدەمدى ەرەكشە سەزىم كەرنەيدى. جالپى مەن ءوز كاسىبىمدى وتە جاقسى كورەمىن. سوندىقتان بولار قيىندىقتى سەزبەيتىنىم. ۇيرەنشىكتى جۇمىسىم بولعان سوڭ, بارىنشا ۇقىپتى ىستەۋگە تىرىسامىن. جاقسى جۇرگىزۋشى كولىكتىڭ الدىنداعىنى عانا ەمەس, ارتىنداعىنى جانە جان-جاعىنداعىنىڭ ءبارىن بىردەي كورىپ وتىرۋى كەرەك دەپ ويلايمىن. ماقتانعانىم ەمەس, ءوز باسىم ءجۇرىپ كەلە جاتقان كولىككە قاراپ جۇرگىزۋشىنىڭ مىنەزىن جازباي تانيمىن, – دەدى ساكەن لەيب.
بۇگىندە ول – ءۇش جيەن نەمەرەنىڭ سۇيىكتى اجەسى. قىزىنان وربىگەن قۇلىنشاقتاردىڭ بولاشاعى جارقىن, جاقسى ازامات بولعانىن كورگىسى كەلەدى. پاريجگە ءبىر بارسام دەپ ارماندايدى. ەڭ باستىسى, استانا ۇلگىلى قالاعا اينالىپ, ونداعى قوعامدىق كولىكتىڭ ساعات سەكىلدى توقتاۋسىز جۇرگەنىن, جۇرگىزۋشىلەردىڭ ءتارتىپتى, جولاۋشىلاردىڭ مەيىرىمدى بولعانىن قالايدى. جاقسى تىلەكتەر قابىل بولسا ەكەن دەيمىز.
