كەشە ەلوردادا «اقپاراتتىق تەحنولوگيالار سالاسىنىڭ تەرميندەرى» رەسپۋبليكالىق بايقاۋىنىڭ جەڭىمپازدارى ماراپاتتالدى. قازاقستان رەسپۋبليكاسى عىلىم جانە جوعارى ءبىلىم مينيسترلىگى ءتىل كوميتەتىنىڭ ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى ۇيىمداستىرعان بايگەنىڭ باستى ماقساتى – قازاق تىلىندەگى تەرميندەردىڭ ساپالىق, ساندىق دەڭگەيىن ارتتىرۋ.
2 مامىر-10 ماۋسىم ارالىعىندا وتكەن ونلاين-بايقاۋعا ەلىمىزدىڭ ءار ايماعىندا تۇراتىن ءتىل جاناشىرلارى قاتىستى. ولار termincom.kz سايتىنداعى تەرميندەر بويىنشا ءوز وي-پىكىرىن, ۇسىنىسىن جازا وتىرىپ, ساۋالناما ارقىلى تاپسىرمالاردى ورىندادى. بەرىلگەن تەرميندەرگە قازاقشا بالاما بەرۋ ارقىلى انىقتاماسىنا ءۇڭىلدى. بايقاۋ شارتىنىڭ ءبىرى – مەملەكەتتىك تىلدە ءىت تەحنولوگيالار سالاسىنىڭ جاڭا نەمەسە قازاق تىلىنە اۋدارىلماعان, termincom.kz سايتىنىڭ «بەكىتىلگەن تەرميندەر تىزىمىنە» ەنبەگەن, قاتە قولدانىلىپ جۇرگەن, تالاس تۋدىراتىن جانە ت. ب. ماسەلەلەرى بار تەرميندەرگە بەينەروليك ازىرلەۋ. سونداي-اق قاتىسۋشىلار مەملەكەتتىك تىلدە جارىق كورگەن ءىت تەحنولوگيالار سالاسىنىڭ وقۋلىقتارىنا, عىلىمي باسىلىمدارداعى تەرميندەردىڭ قولدانىسىنا تالداۋ جاساپ, ونىڭ ۇتىمدى جانە ۇتىمسىز تۇستارىن نەمەسە قاتەلەرىن اشىپ كورسەتتى.
قازاقستان رەسپۋبليكاسى عىلىم جانە جوعارى ءبىلىم مينيسترلىگى ءتىل كوميتەتى توراعاسى ەربول تىلەشوۆ اتاپ وتكەندەي, بيىلعى بايقاۋدىڭ شارتى جەتىلدىرىلىپ, سايكەسىنشە, قاتىسۋشىلاردىڭ دا ءبىلىم-بىلىكتىلىك دارەجەسى ارتقان.
ادىلقازىلار القاسىنىڭ توراعاسى, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, ف.ع.د., اكادەميك شەرۋباي قۇرمانبايۇلى بيىلعى بايقاۋعا قاتىسۋشىلار ءىت سالاسىنىڭ تەرميندەرىن يگەرۋ, قازاقشالاۋ ءۇشىن مەيلىنشە ىزدەنىپ, ىنتا-ىقىلاسىن سالعانىن ايتتى.
«ەندىگى ماقسات – ۇسىنىلعان تەرميندەردىڭ قولدانىسقا ەنىپ كەتۋى. بۇل سالا ماماندارى مەن لينگۆيستەر بىرلەسە جۇمىس ىستەگەندە عانا ناتيجەلى بولماق» دەدى ش.قۇرمانبايۇلى.
ەلىمىزگە بەلگىلى تەرمينولوگ عالىمدار مەن سالا ماماندارى قازىلىق ەتكەن سايىستا 9 ۇمىتكەر جۇلدەگەر اتاندى.
بايقاۋدىڭ ءتورت كەزەڭىنىڭ قورىتىندىسى بويىنشا اقپاراتتىق تەحنولوگيالار سالاسىنىڭ تەرميندەرىن زەردەلەۋدە ەرەكشە كوزگە تۇسكەن قىزىلوردا قالاسىنداعى «وقۋشىلار مەن جاسوسپىرىمدەر ءۇيى» مەملەكەتتىك مەكەمەسىنىڭ ينكليۋزيۆتى اعىلشىن ءتىلىنىڭ مۇعالىمى يبراگيم ازامات پەن اقتوبە وبلىسى مارتوك اۋدانى سارىجار اۋىلىنىڭ تۇرعىنى ساياگۇل جولماعانبەتكە 3-ورىن بۇيىردى.
ءىى دارەجەلى ديپلوم مەن سىيلىق-سەرتيفيكات ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى فيلولوگيا فاكۋلتەتىنىڭ ماگيسترانتى, اۋدارماشى مالىك ماقساتقا بەرىلدى.
ءى دارەجەلى ديپلوم ءالىمحان جۇمابەككە بۇيىردى. ول – الماتى قالالىق №179 جالپى ءبىلىم بەرەتىن مەكتەپتىڭ فيزيكا ءپانىنىڭ مۇعالىمى.
اقپاراتتىق تەحنولوگيالار تەرميندەرى بويىنشا وتكەن بايقاۋدا جۇزدەن جۇيرىك شىققان پاۆلودار قالاسىنداعى ا.شامكەنوۆ اتىنداعى مەكتەپ-ليتسەيدىڭ تاريح ءپانى مۇعالىمى ەربول تەمىروۆ جەڭىمپاز اتانىپ, وعان باس جۇلدە سەرتيفيكاتى تابىستالدى.
گۇلميرا شارحانقىزى
