استانا قالاسى اكىمدىگىنىڭ تىلدەردى دامىتۋ جانە ارحيۆ ءىسى باسقارماسىنا قاراستى «رۋحانيات» مەكەمەسىنىڭ ۇيىمداستىرۋىمەن قازاق جانە اعىلشىن تىلدەرىن وقىتۋ كۋرستارىنىڭ اياقتالۋىنا وراي «ءتىل – تاتۋلىق تىرەگى» اتاۋىمەن سەرتيفيكاتتاردى تاپسىرۋ ءراسىمى ءوتتى.
اتالمىش مەكەمە استانا قالاسىنىڭ تۇرعىندارىن مەملەكەتتىك ءتىلدى دەڭگەيلەپ وقىتۋ قىزمەتىنە سايكەس جىل سايىن مەملەكەتتىك قىزمەتشىلەرگە, ەرەسەك ءتىل ۇيرەنۋشىلەرگە, جەرگىلىكتى بيۋدجەت ۇيىمدارىنىڭ قىزمەتكەرلەرىنە قازاق جانە اعىلشىن تىلدەرىن وقۋ كۋرستارىن ۇيىمداستىرادى. 2024 جىلدىڭ باسىندا كۋرسقا قالا تۇرعىندارى مەن مەكەمەلەردەن 1500-گە جۋىق سۇرانىس ءتۇستى. ءى كەزەڭدە 1099 تىڭداۋشى قابىلدانىپ, قورىتىندىسىندا قازاق ءتىلىن وقۋ بويىنشا 871, ال اعىلشىن ءتىلىن ۇيرەنۋ بويىنشا 38 تىڭداۋشى سەرتيفيكات الدى.
مەكەمە باسشىسى ءادىل ورىنباسارۇلىنىڭ ايتۋىنشا, قازاق جانە اعىلشىن تىلدەرىن ۇيرەنۋشىلەردىڭ سانىن كوبەيتۋ جوسپارلانعان. سەبەبى بۇعان نيەتتىلەردىڭ سانى ارتىپ كەلە جاتىر. سوندىقتان كەلەسى جىلعى مەجە – 3000-5000 ادام.
ءتىل ۇيرەنۋشىلەر قاراپايىم جانە بازالىق دەڭگەيلەر (ا1-ا2) جانە ورتا جانە ورتادان جوعارى دەڭگەيلەر (ۆ1-ۆ2) بويىنشا وقىدى. سونىڭ ءبىرى – قالا تۇرعىنى لاۋرا قارينانىڭ ايتۋىنشا, وقۋ بارىسىندا ول قازاق ءتىلىنىڭ بايلىعىن, تەرەڭدىگىن ءتۇسىندى. ۆ1 دەڭگەيى بويىنشا ايجان سەرىكقىزى ۆ2 دەڭگەيىنەن جۇپار كەنجەتايقىزى سىندى وقىتۋشىلاردان ساباق الدى. ورىس مەكتەبىندە وقىعان كۋرس ءبىتىرۋشى ەكى دەڭگەي بويىنشا ءار دەڭگەيدى 4 ايدان 8 اي وقىدى. ءتىلدى جەتىلدىرۋدى ءارى قاراي دامىتامىن دەپ وتىر.
ال اتباسار قالاسىنىڭ تۋماسى, بۇگىندە ەلوردا تۇرعىنى ەربول ەرەجەپوۆ كوپتەگەن وزگە ۇلتتاردىڭ ورتاسىندا وسكەندىگىن, 5 جاسىندا اتاسى قايتىس بولعاننان كەيىن انا تىلىنەن ماقۇرىم قالعانىن ايتتى. سول ولقىلىقتى تۇزەۋ ءۇشىن كۋرستارعا جازىلىپ, وقۋ بارىسىندا رۋحىنىڭ كوتەرىلگەنىن جەتكىزدى.
گۇلميرا ايماعانبەت
