ەلورداداعى «استانا ترياتلون» ساياباعىندا مەملەكەتتىك رامىزدەر كۇنىنە وراي قالالىق «تولاعاي» الىپتار سايىسىنىڭ جەڭىمپازدارى بەلگىلى بولدى, دەپ حابارلايدى astana-akshamy.kz
ۇلى دالانىڭ باتىرلارىن ناسيحاتتاپ, قازاقتىڭ ەتنو-ويىندارىن دارىپتەۋ ماقساتىندا وتكىزىلگەن تۋرنيردە بىلەگى توقپاقتاي, جاۋىرىنى قاقپاقتاي قالامىزدىڭ 11 سپورتشىسى باق سىنادى.
بىلەكتى باتىرلار سايىستىڭ 5 ءتۇرى بويىنشا, ياعني 1,5 م ۇزىندىقتاعى تەمىردى مويىنعا سالىپ مايىستىرۋ, سالماعى 100 كەلىلىك تاستى مەجەلى قاشىقتىققا دەيىن كوتەرىپ اپارۋ, 130 كەلى اۋىر بورەنەنى جەلكەگە سالىپ وتىرىپ-تۇرۋ, 200 كەلىلىك جۇك ارتىلعان اربانى سۇيرەۋ, ون كەلىلىك نايزانى قاشىقتىققا لاقتىرۋ سەكىلدى ەرەكشە سايىس تۇرلەرى بويىنشا سىنعا ءتۇستى.
ۇيىمداستىرۋشىلار تەمىردەن ءتۇيىن ءتۇيىپ, نار كوتەرۋ – بايىرعى ۇلتتىق ءداستۇرىمىز ەكەنىن ايتادى. جارىستىڭ ۇيىمداستىرۋشىسى ءارى جوبا اۆتورى تيمۋر سپاتاەۆ قازاق بالۋاندارىن الەمدىك دەڭگەيگە تانىتۋ ماقساتىندا يگى ءىس-شارا وسىمەن ەكىنشى جىل قاتارىنان استانا تورىندە ءوتىپ جاتقانىن اتاپ ءوتتى.
«تولاعاي الىپتار سايىسى استانا قالاسىندا ەكىنشى رەت وتكىزىلىپ وتىر. بۇل سايىس قىركۇيەك ايىندا وتەتىن V دۇنيەجۇزىلىك كوشپەندىلەر ويىندارىنا استانا قالاسى بويىنشا ىرىكتەۋ كەزەڭى بولىپ سانالادى. قالالىق بىرىنشىلىكتەر بۇعان دەيىن تۇركىستان, الماتى, اقتاۋ قالالارىندا ءوتتى. ەندى مۇنداي ىرىكتەۋ الداعى ۋاقىتتا باسقا وڭىرلەردە وتەدى. جارىستىڭ باستى ماقساتى – بۇقارالىق سپورتتى دامىتۋ. الىپتار سايىسىنا قولداۋ بىلدىرگەن استانا قالاسى اكىمدىگىنە جانە قالالىق دەنە شىنىقتىرۋ جانە سپورت باسقارماسىنا العىسىمدى بىلدىرەمىن» – دەدى ول.
بەس سايىستىڭ ناتيجەسى بويىنشا ءبىرىنشى ورىندى ماۋتان جاننۇر يەلەنسە, ەكىنشى جانە ءۇشىنشى ورىنداردى توققۇلوۆ قانات پەن شايمەردەن ءبىرجان ەنشىلەدى. الداعى رەسپۋبليكالىق تۋرنيردە استانا قالاسىنىڭ نامىسىن ماۋتان جاننۇر قورعايدى.
ايتا كەتەيىك, جالپى جۇلدە قورى ءبىر ميلليون تەڭگەنى قۇرايتىن تۋرنير استانا قالاسى اكىمدىگىنىڭ قولداۋىمەن ءوتتى.
