توقاەۆ باق وكىلدەرىمەن ۇلكەن ءباسپاسوز ءماسليحىتىن وتكىزەدى

مەملەكەت باسشىسى قاسىم-جومارت توقاەۆ بيىل جۋرناليستەرگە ارنالعان ءباسپاسوز جيىنىن وتكىزەدى, دەپ حابارلايدى astana-akshamy.kz.

بۇل جۋرناليستەرمەن سوڭعى ءتورت جىلداعى العاشقى كەزدەسۋ بولماق.
«ءيا, ءباسپاسوز ءماسليحاتى بولادى. ءبىرىنشى جارتى جىلدىققا جوسپارلاپ وتىرمىز», – دەدى پرەزيدەنتتىڭ ءباسپاسوز حاتشىسى بەرىك ءۋالي Press.kz تىلشىسىنە بەرگەن سۇحباتىندا.
ايتا كەتەيىك, قازاقستان پرەزيدەنتى قاسىم-جومارت توقاەۆ 2019 جىلى ماۋسىمدا وتكەن سايلاۋدان كەيىن جۋرناليستەرمەن العاش رەت جولىققان. وعان 66 باق, ونىڭ ىشىندە 22 شەتەلدىك اقپارات قۇرالى اتىنان 107 جۋرناليست قاتىسقان بولاتىن.
كەزدەسۋدە پرەزيدەنتكە 30-عا جۋىق سۇراق قويىلدى. ءبىر ساعاتتان استام ۋاقىتقا سوزىلعان ءباسپاسوز ءماسليحاتىنان كەيىن پرەزيدەنت توقاەۆ مۇنداي كەزدەسۋلەر داستۇرگە اينالاتىنىن ايتتى. سودان بەرى ءتورت جىلدان استام ۋاقىت ءوتتى, بىراق بۇگىنگە دەيىن اقوردا تاراپىنان ءباسپاسوز ءماسليحاتتارىن ءداستۇرلى ەتۋ ارەكەتى بايقالمادى.
ەسكە سالايىق, قاسىم-جومارت توقاەۆ 2022 جىلدىڭ 20 قاراشاسىندا كەزەكتەن تىس پرەزيدەنتتىك سايلاۋ وتكىزگەن. سول كەزدە ءباسپاسوز ءماسليحاتى بولاتىنا ۋادە ەتكەن.
«ەگەر مەن سايلانسام, جىلدىڭ سوڭىندا نەمەسە كەلەسى جىلدىڭ باسىندا ۇلكەن ءباسپاسوز ءماسليحاتىن وتكىزۋ كەرەك», – دەگەن ەدى پرەزيدەنت.