ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ ع.جۇبانوۆا اتىنداعى مەملەكەتتىك ىشەكتى كۆارتەتى «استانا وپەرا» تەاترىنىڭ ك.بايسەيىتوۆا اتىنداعى كامەرالىق زالىندا كامەرالىق مۋزىكا كەشىن ۇسىندى.
اتالمىش ونەر ۇجىمى 1988 جىلى قازكسر حالىق ءارتىسى, كورنەكتى كومپوزيتور عازيزا جۇبانوۆانىڭ باستاماسىمەن قۇرىلعانى ءمالىم. كۆارتەتكە كەيىننەن اتاقتى كومپوزيتوردىڭ اتى بەرىلدى. قىرىق جىلعا جۋىق تاريحىندا ۇجىم تالاي تابىستارعا قول جەتكىزدى. كۆارتەتتىڭ رەپەرتۋارىندا ورىس جانە شەتەل كلاسسيكتەرىنىڭ كوپتەگەن شىعارمالارى, زاماناۋي مۋزىكانىڭ وزىق ۇلگىلەرى بار.
ال «وتكەن عاسىرلار كۋميرلەرى» اتاۋىن العان كونتسەرتتە ءتۇرلى داۋىرلەردىڭ كۆارتەتتىك مۋزىكاسى ۇسىنىلدى. اتاپ ايتقاندا, يوزەف گايدن, فەليكس مەندەلسون, دميتري شوستاكوۆيچ سىندى كلاسسيك كومپوزيتورلاردىڭ مۋزىكاسى اۋەلەدى. بەلگىلى كۇيشى-كومپوزيتور, قازاقستاننىڭ ەڭبەك سىڭىرگەن قايراتكەرى ەرمۇرات ۇسەنوۆ ع.جۇبانوۆا اتىنداعى مەملەكەتتىك ىشەكتى كۆارتەتكە ارنايى كۇي اتاسى قۇرمانعازىنىڭ «تورەمۇرات» كۇيىن وڭدەدى. بۇل تۋىندى دا ورىندالدى.
