تۇران داڭعىلىنىڭ ۋچاسكەسى جوندەۋگە جابىلادى, دەپ حابارلايدى astana-akshamy.kz
«استانا قالاسىنىڭ كولىك جانە جول-كولىك ينفراقۇرىلىمىن دامىتۋ باسقارماسى» مم-ءنىڭ مالىمەتىنشە, تۇران داڭعىلى بويىنشا حۋسەين بەن تالال كوشەسىنەن ۇلى دالا داڭعىلىنا دەيىنگى ۋچاسكەدەگى اۋەجاي باعىتىنان قالا باعىتىنا قاراي جۇمىستار اۋا رايىنىڭ قولايسىزدىعىنا بايلانىستى توقتاتىلدى. اعىمداعى جىلدىڭ 24 مامىرىنان باستاپ اتالعان جول ۋچاسكەسى اشىلدى.
سونىمەن قاتار, اعىمداعى جىلدىڭ 28-30 مامىر ارالىعىندا تۇران داڭعىلى بويىنشا حۋسەين بەن تالال كوشەسىنەن ۇلى دالا داڭعىلىنا دەيىنگى ۋچاسكەدە جانە ۇلى دالا داڭعىلىنان سىعاناق كوشەسىنە دەيىنگى ۋچاسكەدە جول توسەمىنىڭ جوعارعى قاباتىن توسەۋ ءۇشىن تۇران داڭعىلىن جابۋ جوسپارلانىپ وتىرعانىن حابارلايمىز. بۇل رەتتە تۇران/ۇلى دالا قيىلىسى اشىق بولادى.
استانا تۇرعىندارى مەن قوناقتارىنان قالا جولدارىنداعى كەپتەلىستەردى بولدىرماۋ ماقساتىندا ءوز مارشرۋتتارىن الدىن الا جوسپارلاۋدى سۇرايمىز. ۋاقىتشا قولايسىزدىقتار ءۇشىن كەشىرىم سۇرايمىز جانە جول-قۇرىلىس جۇمىستارىن جۇرگىزۋگە تۇسىنىستىكپەن قاراۋدى سۇرايمىز.
