استانادا تۇرعىن الاپتارعا جوعارى ساپالى ينتەرنەت تارتۋ جۇمىستارى قارقىندى جۇرۋدە. تسيفرلاندىرۋ جانە مەملەكەتتىك قىزمەت باسقارماسى بايلانىس وپەراتورلارىمەن بىرلەسە وتىرىپ, بايلانىس پەن ينتەرنەت ساپاسىن ارتتىرۋ بويىنشا تۇراقتى جۇمىستار اتقارۋدا. بۇل تۋرالى بۇگىن استانا كوممۋنيكاتسيالار قىزمەتى الاڭىندا وتكەن «استانا قالاسىنىڭ تۇرعىن اۋداندارىن جوعارى ساپالى ينتەرنەتپەن قامتاماسىز ەتۋ» اتتى بريفينگتە ايتىلدى, دەپ حابارلايدى astana-akshamy.kz
شاھاردا 16 تۇرعىن الابى مەن 1 ساياجاي الابى بار بولسا, سونىڭ 12 تۇرعىن الابى جوعارى جىلدامدىقتى ينتەرنەتكە قوسىلعان بولاتىن. اتاپ ايتقاندا, كوكتال-1, كوكتال-2, اگروقالاشىق, ۇركەر, تەلمان, پريگورودنىي, زارەچنىي, يۋگو-ۆوستوك, ينتەرناتسيونالنىي, جەلەزنودوروجنىي, پرومىشلەننىي, سونداي-اق قوياندى ساياجاي ءماسسيۆىن قوسا العاندا. بۇگىندە, بۇل اۋدانداردىڭ تۇرعىندارى تالشىقتى–وپتيكالىق بايلانىس جەلىلەرىن پايدالانا وتىرىپ, جوعارى جىلدامدىقتى ينتەرنەت پەن تسيفرلىق تەلەۆيدەنيە قىزمەتىمەن تولىق قامتاماسىز ەتىلگەن. ال, قالعان 5 تۇرعىن الاپتا – ءوندىرىس, كازگورودوك, كيرپيچنىي, ميچۋرينو جانە كۇيگەنجار – ۇيلەردى قوسۋ 2024 جىلدىڭ ءۇشىنشى توقسانىنىڭ سوڭىندا جوسپارلانعان.
-جالپى جوسپار 12 000 جەكە ۇيگە قوسىلۋدى قامتيدى. بۇگىنگى تاڭدا 7593 ابونەنت قوسىلعان. جوباعا سالىنعان ينۆەستيتسيالاردىڭ جالپى سوماسى 2,68 ملرد. تەڭگەنى قۇرايدى. بارلىعى 665 شاقىرىم وپتيكالىق بايلانىس جەلىلەرىن سالۋ جوسپارلانۋدا. استانا قالاسىنىڭ اكىمدىگى, قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, بايلانىس وپەراتورلارىمەن بىرلەسە وتىرىپ, بايلانىس پەن ينتەرنەت ساپاسىن ارتتىرۋ بويىنشا تۇراقتى تۇردە جۇمىستار جۇرگىزىپ كەلەدى. ماسەلەن, كوكتال-1, كوكتال-2, اگروقالاشىقتار تۇرعىن الاپتارىندا تالشىقتى-وپتيكالىق بايلانىس جەلىلەرىن جۇرگىزگەن ينۆەستور «قازاق ءۇي جەلىلەرى» جشس جالپى ۇزىندىعى 132 كم قۇرايتىن كوشە كابەلىن تارتىپ, 1198 ابونەنتتى قوستى. ەسىل جانە نۇرا اۋداندارى بويىنشا ينۆەستور «Synergy Telecom» جشس-ءنىڭ كومەگىمەن 200 شاقىرىمنان استام كوشە كابەلدەرى توسەلىپ, 1710 ابونەنت قوسىلدى. ال, الماتى اۋدانىندا يۋگو-ۆوستوك (وڭ جاعى) ت/ا: 85 كم-دەن استام كوشە كابەلدەرى تارتىلىپ, 754 ابونەنت قوسىلسا, پرومىشلەننىي تۇرعىن الابىندا 25 كم-دەن استام كوشە كابەلدەرى تارتىلىپ, 435 ابونەنت قوسىلدى, – دەيدى استانا قالاسى تسيفرلاندىرۋ جانە مەملەكەتتىك قىزمەت باسقارماسى مم باسشىسىنىڭ ورىنباسارى بەرىك احمەتوۆ.
ينۆەستور: «قازاق ءۇي جەلىلەرى» جشس. سونداي-اق, ينۆەستور «Synergy Telecom» جشس-ءنىڭ قولداۋىمەن ينتەرناتسيونالنىي تۇرعىن الابىنا 70 كم كوشە كابەلدەرى تارتىلىپ, 490 ابونەنت قوسىلدى. ميچۋرينو جانە كۇيگەنجار تۇرعىن الاپتارىندا جۇمىس 2024 جىلدىڭ قىركۇيەگىندە اياقتاۋ جوسپارلانعان. سونداي-اق, بايقوڭىر اۋدانىنداعى ءوندىرىس, كازگورودوك جانە كيرپيچنىي تۇرعىن الاپتارىنا قوسۋ جۇمىستارىن وسى جىلدىڭ تامىز-قىركۇيەك ايلارىندا اياقتاۋ جوسپاردا. قوياندى ساياجاي الابى بويىنشا 20 كم كوشە كابەلدەرى تارتىلىپ, 20 ابونەنت قوسىلدى. ينۆەستور: «تۆوي نوۆىي تەلەكوم» جشس. ەلوردانىڭ تۇرعىن الاپتارىندا جوعارى جىلدامدىقتى ينتەرنەتتى قوسۋ جوباسى تسيفرلىق تەحنولوگيالارعا قولجەتىمدىلىكتى ارتتىرا تۇسپەك.
