استانا قالاسى ءماسليحاتىنىڭ دەپۋتاتى سالتانات جەنالاەۆاعا ا.پۋشكين كوشەسى, 3/1 مەكەنجايىنداعى تۇرعىن ءۇي جاعدايىنا قاتىستى ءوتىنىش ءتۇستى. دەپۋتات تۇرعىندارمەن كەزدەسىپ, وتكەن عاسىردىڭ 60-جىلدارى سالىنعان تۇرعىن ءۇيدىڭ ماسەلەلەرىمەن تانىستى.
«بۇل ءۇي بىردە-ءبىر رەت كۇردەلى جوندەۋدەن وتپەدى. شاتىرى مەن جەرتولەدەگى كوممۋنيكاتسيالارمەن پروبلەمالار بار. عيماراتتىڭ قاسبەتى دە ەرەكشە نازار اۋدارۋدى قاجەت ەتەدى. اۋلادا اباتتاندىرۋ جۇمىستارى جۇرگىزىلدى, بىراق تۇرعىنداردىڭ بۇعان قاتىستى سۇراقتارى بار» دەدى دەپۋتات.
ونىڭ ايتۋىنشا, ول بارلىق پروبلەمالارمەن تانىسىپ, جاقىن ارادا وسى ءۇي تۇرعىندارىنىڭ ءومىر ءسۇرۋ ساپاسىن جاقسارتۋ ءۇشىن ءتيىستى اۋدان اكىمدىگىنىڭ الدىندا ماسەلە كوتەرەدى.
دەپۋتات سونداي-اق پيك جانە ميب جۇمىسىنا قاتىستى پىكىر ءبىلدىردى.
«ەلوردا ءماسليحاتىنىڭ دەپۋتاتى رەتىندە جەتىنشى سايلاۋ وكرۋگىنىڭ ميب جانە پيك باسشىلارىمەن ۇنەمى بايلانىس ۇستايمىن. تۇراقتى نەگىزدەگى كەزدەسۋلەر مەن بىرلەسكەن كوشپەلى كەڭەستەر – ءبىزدىڭ جۇمىسىمىزدىڭ اجىراماس بولىگى. بۇل جۇمىس بىزگە تۋىنداعان ماسەلەلەردى جەدەل شەشۋگە, تۇرعىنداردىڭ ءومىر ساپاسىن جاقسارتۋعا مۇمكىندىك بەرەدى. ميب جانە پيك توراعالارى كۇندە ءتۇرلى ماسەلەلەرگە تاپ بولىپ, ۇلكەن جۇمىس اتقارىپ وتىر. ولاردىڭ كۇش-جىگەرى مەن ىستەرىن بەرىلە ورىنداۋىنىڭ ارقاسىندا ءبىز ۇنەمى وزەكتى ماسەلەلەردەن حاباردار بولىپ, ولاردى شەشۋدە جەدەل قيمىلداي الامىز. ميب جانە پيك باسشىلارى تۇرعىنداردىڭ بەرەكەلى ءومىرى مەن جايلى تۇرمىسىن قامتاماسىز ەتۋدە نەگىزگى بۋىن بولىپ سانالادى» دەدى دەپۋتات.
