بيىل – استانا قالاسىنىڭ جەرگىلىكتى ءبىرپالاتالى زاڭ شىعارۋشى ورگانى استانا قالاسىنىڭ ءماسليحاتىنا 30 جىل. ەلگە قىزمەتتى ابىرويلى اتقارعان حالىق قالاۋلىلارى از ەمەس. سونىڭ ءبىرى – استانا قالاسى ءماسليحاتىنىڭ VIII شاقىرىلىمىنىڭ دەپۋتاتى, ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ ديرەكتورى ەرلان داكەنوۆ.
ەرلان ەرعازىۇلى – استانا قالاسى ءماسليحاتىنىڭ VII, VIII سايلانىمىنىڭ دەپۋتاتى, استانا قالاسى ءماسليحاتىنىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيا توراعاسىنىڭ ورىنباسارى.
حالىق قالاۋلىلارىنىڭ قوعامداعى ءرولى تۋرالى ەرلان داكەنوۆ بىلاي دەپ اڭگىمەلەپ بەردى.
– بيىل – بارلىق دەڭگەيدەگى ءماسليحاتتار ءۇشىن مەرەيتويلىق جىل, ماسليحاتقا – 30 جىل. دەپۋتات بولۋ, ارينە, ۇلكەن مىندەت. ال حالىق سەنىمىن اقتاۋ, شەشىم تابۋ, ايتقانىڭدى ورىنداۋ زور جاۋاپكەرشىلىك جۇكتەيدى. قوعامنىڭ ءۇنىن تىڭداپ, قوعامنىڭ وزەكتى ماسەلەلەرىن تىڭداپ جۇرگەندىكتەن, سارىارقا اۋدانىنان دەپۋتات بولىپ سايلاندىم. پارتياىشىلىك پرايمەريزدە باعىمدى سىناپ كورىپ قاتىسىپ ەدىم, ناتيجەسىندە العاشقى دەپۋتاتتىڭ ءبىرى رەتىندە سايلاۋشىلارىم مەنى تاڭدادى. سارىارقا اۋدانىنا قاراستى اگروقالاشىق اۋماعىندا تۇرعىندارمەن كەزدەسىپ, ءتۇرلى ماسەلەنى شەشۋگە تىرىستىم. اۋلاداعى گۇلباقتار (سكۆەر), جاياۋ جۇرگىنشىلەر جولى (تروتۋار), ءتۇرلى ۇيىرمە, تاعى باسقا ماسەلەلەرىن شەشىپ ءجۇرىپ, تۇرعىندار تالاپ-تىلەگىن ورىنداي وتىرىپ, تاجىريبە جيناقتادىم. حالىقتىڭ كوڭىلىنەن شىعۋ – پارىز, العىس الۋ جىگەرلەندىرەدى, سوندىقتان قىزمەت بارىسىندا ءتۇرلى مادەني ءىس-شاراعا اتسالىستىم. سونداي-اق الەۋمەتتىك ماسەلەلەر ماڭىزدى. استانا قالاسى ءماسليحاتىنىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيا توراعاسىنىڭ ورىنباسارى بولعاندىقتان, تۇرعىندار ماسەلەسىنە ءجىتى كوڭىل بولدىك. ارينە, كەلۋشىلەر از ەمەس, كوبىنە الدىڭا جاعدايى تومەن وتباسىلار, باسپانا ماسەلەسىنە قاتىستى جانايقايىمەن كەلەتىن ادامدار بار. شەشىمىن تاباتىن ماسەلەلەر دە بار, قيىندىق تۋعىزاتىن دا پروبلەمالار جەتەرلىك. وندايدا دەپۋتاتتىق ساۋال جولداپ, شەشۋگە تىرىسامىز. مۇگەدەك جاندار ارباسىنا قاتىستى ماسەلەلەر, ينۆاتاكسي, پاندۋس, اۆتوبۋستاردىڭ ارباداعى مۇمكىندىگى شەكتەۋلى جانداردى الماي كەتكەن قولايسىز جاعدايلارى, گاز, سۋ, ازىق-تۇلىك ماسەلەسى, تاعى باسقا وزەكتى پروبلەمالارمەن كەلەتىن تۇرعىنداردىڭ تالاپ-تىلەگىن تىڭداپ, بارىنشا كومەك بەرەمىز. مەكتەپتەرگە قاتىستى دا سۇراق كوپ. جول كارتاسى بويىنشا, جوسپارعا سايكەس, الداعى ۋاقىتتا وقۋ ورىندارى سالىنىپ جاتقانىن ءتۇسىندىرىپ وتەمىز. كەي الەۋمەتتىك نىساندار, عيماراتتارعا بولىنگەن قارجىنىڭ كەشەۋىلدەۋىنە, يا باسقالاي سەبەپتەرىنە بايلانىستى سەبەپتەرىن ءتۇسىندىرىپ جاتامىز, قولدان كەلگەنشە تۇرعىندار وتىنىشىنە قۇلاق اسامىز. فيلارمونيانىڭ ديرەكتورى رەتىندە 13 ونەر ۇجىمى, گاسترولدىك ساپارى, ءتۇرلى ۇيىمداستىرۋ ماسەلەسىمەن قوسا دەپۋتاتتىق قىزمەتتى اتقارۋ ۇلكەن جاۋاپكەرشىلىك, تاجىريبە جيناقتاۋ دەپ ايتار ەدىم. استانا قالاسى مەن ءۇشىن ىستىق. قالانىڭ سالىنىپ جاتقانى, كوركەيگەنى – ءبارى كوز الدىمدا. ەلوردادا سوناۋ 1994 جىلدان بەرى تۇرامىن. اقمولادان باستاۋ الىپ, حالىقارالىق دەڭگەيدەگى اسەم قالاعا اينالعانىنا, جايقالىپ وسكەنىنە قاتتى قۋانامىن. استانا – جاستاردىڭ قالاسى, مول مۇمكىندىكتەر الاڭى. كاسىبي قىزمەتىمدى وسىنداي حالىققا قاجەتتى قوعامدىق قىزمەتپەن ۇشتاستىرعانىما قۋانىشتىمىن, – دەيدى ەرلان ەرعازىۇلى.
