«تۋعان ەلگە ساياحات» بالالار ەكسكۋرسيالىق پويىزى جولعا شىعادى. بۇل تۋرالى تۋريزم جانە سپورت مينيسترلىگىنەن ءمالىم ەتتى, دەپ حابارلايدى astana-akshamy.kz
«2016 جىلدان باستاپ Samruk-Kazyna Trust الەۋمەتتىك جوبالاردى دامىتۋ قورىنىڭ قولداۋىمەن „تۋعان ەلگە ساياحات“ بالالار ەكسكۋرسيالىق پويىزى جوباسى ىسكە اسىپ جاتىر. بۇل جوبا وسى كۇنگە دەيىن 2 320 بالانى قامتىدى», — دەپ اتاپ ءوتتى مينيسترلىكتەن اگەنتتىكتىڭ رەسمي ساۋالىنا وراي.
ۆەدومستۆو ۇسىنعان انىقتامالىق دەرەككە سايكەس, «تۋعان ەلگە ساياحات» — پاتريوتتىق جوبا.
ونىڭ اياسىندا بالالار پويىزبەن ساياحاتتاي وتىرىپ, قازاقستان قالالارىنداعى تاريحي ەسكەرتكىشتەرمەن, كورىكتى جەرلەرمەن تانىسادى.
جوبا «سامۇرىق-قازىنا» اق قايىرىمدىلىق جوبالارىنىڭ حالىقارالىق فورۋمىندا كورپوراتيۆتىك قايىرىمدىلىق اياسىندا ۇزدىك دەپ تانىلدى.
ول جىل سايىن ىسكە اسادى. تەك 2020-2021 جىلدارى كوروناۆيرۋس پاندەمياسىنا بايلانىستى جولعا شىققان جوق.
«تۋعان ەلگە ساياحات» جازعى تانىمدىق-تۋريستىك پويىزىنىڭ ءبىرىنشى رەيسى 27 ماۋسىمدا جولعا شىعادى. 12 كۇن بويى بالالار استانا, بۋراباي, الماتى, تاراز, تۇركىستان جانە بايقوڭىر قالالارىنداعى تانىمال مادەني-تاريحي ورىنداردى ارالايدى. ەكسكۋرسيادان باسقا جول بويى وقۋشىلارمەن بىرگە تالىمگەرلەر مەن پەداگوگتار جۇمىس ىستەيدى. قىزىعۋشىلىق ۇيىرمەلەرى, زياتكەرلىك جانە سپورتتىق ويىندار مەن باسقا دا ويىن-ساۋىقتار قاراستىرىلعان. ەكىنشى رەيس وسى جىلعى 24 شىلدەگە جوسپارلانعان. «Samruk-Kazyna Trust» قورى قولدايتىن الەۋمەتتىك جوبا ەكى ماۋسىمدا وتەدى. وگلاردىڭ ارقايسىسىنا كوپبالالى, از قامتىلعان نەمەسە تولىق ەمەس وتباسىلاردان شىققان 10-15 جاستاعى 200 بالا قاتىسادى. سۋ تاسقىنىنان زارداپ شەككەن وڭىرلەردىڭ بالالارىنا باسىمدىق بەرىلەدى», — دەدى مينيسترلىكتەن.
