ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە العاش رەت قازاقستاندىق ەكسكۋرسيا جۇرگىزۋشىلەرىنىڭ فورۋمى ءوتتى. ەلىمىزدە ءبىرىنشى جىل وتكىزىلگەن ءىس-شارا دۇنيەجۇزىلىك ەكسكۋرسيا جۇرگىزۋشىلەرىنىڭ كۇنىنە وراي ۇيىمداستىرىلدى.
21 اقپان – دۇنيەجۇزىلىك ەكسكۋرسيا جۇرگىزۋشىلەرىنىڭ كۇنى. ايتۋلى مەرەكەنى ەلىمىزدە العاش رەت اتاپ ءوتتى. اتالمىش جيىننىڭ وتۋىنە تۋريزم جانە سپورت مينيسترلىگى, «Kazakh Tourism» ۇك» اق, استانا قالاسىنىڭ اكىمشىلىگى جانە ەۋرازيا ۇلتتىق ۋنيۆەرسيتەتى ۇيىتقى بولدى. فورۋمدا الماتى, تاراز, قاراعاندى, پاۆلودار جانە كوكشەتاۋ قالاسىنىڭ تۋريزم سالاسىنىڭ ماماندارى, 100-دەن استام ەكسكۋرسيا جۇرگىزۋشىلەرى, مۇعالىمدەر مەن ستۋدەنتتەر باس قوسىپ, وسى سالاداعى وزەكتى ماسەلەلەر تۋرالى تالقىلادى.
ءىس-شارانى اشقان تۋريزم جانە سپورت ءمينيسترىنىڭ ورىنباسارى ەرجان ەركىنباەۆ تۋريزم سالاسى ماماندارى قىزمەتىنىڭ ماڭىزدىلىعىن اتاپ ءوتتى. سونداي-اق ەلىمىزدەگى ۇزدىك گيدتەرگە مينيسترلىك اتىنان العىس حاتتار تابىستادى. ال «Kazakh Tourism» ۇك» اق باسقارما توراعاسىنىڭ ورىنباسارى دانيەل سەرجانۇلى ەلىمىزدەگى بارلىق ەكسكۋرسيا جۇرگىزۋشىلەرىنىڭ ءتىزىمىن ارنايى ۇلتتىق پورتالدا تىركەپ, سالا ماماندارىنىڭ قىزمەتىن ودان ءارى جەتىلدىرۋ بويىنشا قاناتقاقتى جوبا جۇزەگە اسىرىلىپ جاتقانىن مالىمدەدى. فورۋمدا «استانا دامۋ ورتالىعى» جشس تۋريزم جانە ينفراقۇرىلىمدى دامىتۋ دەپارتامەنتىنىڭ ديرەكتورى ولگا ابەلدينوۆا ەلوردانىڭ تۋريستىك الەۋەتى جايىندا ءسوز قوزعادى.
«2024 جىلى استاناعا 1,4 ميلليون تۋريست كەلۋى جوسپارلانۋدا. ونىڭ ىشىندە ۇشاقپەن قاتىنايتىن جولاۋشىلار قاتارى 8,5 ميلليون بولسا, ال تەمىرجولدا جولاۋشى اعىنى – 7,1 ميلليون ادام. ەلوردادا ءتۋريزمنىڭ ىسكەرلىك, مەديتسينالىق جانە قالالىق دەمالىس باعىتى قارقىندى دامۋدا. رەسەي, تۇركيا, قىتاي, گەرمانيا جانە وزبەكستان مەملەكەتتەرىنىڭ تۋريستەرى وسى ماقساتتا باس قالاعا ءجيى كەلەدى.
ەلوردانىڭ پايدالى ينفراقۇرىلىمى تۋرالى ايتاتىن بولساق, قالادا قۇرىلعان جاياۋ جۇرگىنشىلەرگە باعدارلاۋدىڭ بىرىڭعاي جۇيەسى – نەگىزگى ەلەمەنتتەردىڭ ءبىرى. قالا قوناقتارى مەن تۇرعىندارى 108 ناۆيگاتسيالىق تىرەك پەن 138 بەلگى ارقىلى ەلوردا بويىنشا باعىتتاردى وڭاي قۇراستىرا الادى جانە قالانىڭ كورىكتى جەرلەرى, سونداي-اق قالالىق قىزمەتتەردىڭ بارلىق قاجەتتى بايلانىستارى تۋرالى ءۇش تىلدە اقپارات الادى. سونىمەن قاتار CityPass تۋريستەرگە ارنالعان بىرىڭعاي كارتاسى ارقىلى استانانىڭ 11-دەن استام نىسانىنا ارنايى بەلگىلەنگەن باعا بويىنشا ەركىن كىرۋگە بولادى. ءموبيلدى قوسىمشانى ەكسكۋرسيا جۇرگىزۋشىلەرى تۋريستەرگە ۇسىنا الادى. استانادا ساياحاتتاۋعا ءتيىمدى تاعى ءبىر ءموبيلدى قوسىمشا – izi.TRAVEL. وعان كەز كەلگەن تۋريست قالانىڭ بىرقاتار كورىكتى جەرلەرىنىڭ ماڭدايشالارىندا كورسەتىلگەن QR كودىن پايدالانىپ كىرە الادى. حالىقارالىق پلاتفورمادا ورنالاستىرىلعان 167-دەن استام قالالىق نىساندار تۋرالى اۋديوەكسكۋرسيالار كوپشىلىككە قولجەتىمدى, اقپارات التى تىلدە بەرىلەدى.
بيىل 105-دەن اسا مادەني, 50-دەن كوپ ىسكەرلىك, 25-تەن اسا سپورتتىق باعىتتاعى ءىس-شارالار مەن 50-دەن كوپ وقيعالاردى باس قالادا وتكىزۋ جوسپارلانۋدا. ونىڭ ىشىندە بيىل وتەتىن V دۇنيەجۇزىلىك كوشپەندىلەر ويىندارى ەلوردالىق ءتۋريزمنىڭ بارلىق باعىتىنىڭ دامۋىنا يگى اسەر ەتەتىن ەڭ ايتۋلى وقيعانىڭ ءبىرى بولماق. جاھاندىق جارىستى تاماشالاۋعا 100 مىڭنان استام تۋريست كەلەدى دەپ جوسپارلانۋدا. جىل سايىن ەكسكۋرسيا جۇرگىزۋشىلەرى بىلىكتىلىكتى ارتتىرۋ بويىنشا ارنايى باعدارلامالاردان ءدارىس الادى. ماسەلەن, بىلتىر استانا قالاسى بويىنشا 150-دەن اسا گيدتەر مەن 60-قا جۋىق قوناقۇي, مەيرامحانا جانە مەديتسينالىق ۇيىمداردىڭ قىزمەتكەرلەرى بىلىكتىلىگىن ارتتىردى» دەدى ءوز سوزىندە و.ابەلدينوۆا.
جيىنعا قاتىسقان وزگە دە سپيكەرلەر ەلىمىزدەگى تۋريستىك بيزنەستى دامىتۋ, بالالار مەن قالالىق ءتۋريزمنىڭ ماڭىزدىلىعى جانە ەكسكۋرسيا جۇرگىزۋشىلەرى ماماندارىن ۋنيۆەرسيتەت قابىرعاسىندا جۇيەلى وقىتۋ ماسەلەلەرىن قوزعاپ, بۇل فورۋمدى جىل سايىن رەسپۋبليكانىڭ وزگە دە وڭىرلەرىمەن بىرگە ۇيىمداستىرۋدى ۇسىندى.
