جىل وتكەن سايىن باس قالا تۋريستەر ءۇشىن تارتىمدى قالاعا اينالىپ كەلەدى. استانا قالاسى ينۆەستيتسيالار جانە كاسىپكەرلىكتى دامىتۋ باسقارماسىنىڭ مالىمەتى بويىنشا وتكەن جىلى ەلورداعا 1036921 وتاندىق تۋريست كەلسە, 287126 شەتەلدىك تۋريست قوناق بولعان. باس قالادا ىشكى ءتۋريزمنىڭ نەگىزگى تۇرلەرى: mice-تۋريزم, ىسكەرلىك تۋريزم جانە مەديتسينالىق ءتۋريزمنىڭ دامۋ قارقىنى كوڭىل قۋانتارلىق.
ارقاداعى استانا تۋريستەردى ماگنيتشە تارتاتىن قالاعا اينالدى. 2023 جىلدىڭ قورىتىندىسى بويىنشا ەلورداعا اعىلعان تۋريستەردىڭ سانى 2022 جىلمەن سالىستىرعاندا 12,3 پايىزعا ارتىپ, 1324047 ادامدى قۇرادى. سونىڭ ىشىندە: 1036921-ءى – وتاندىق تۋريستەر, 287126-سى – شەتەلدىك تۋريستەر. مۇنداي رەسمي اقپاراتتى قالالىق ينۆەستيتسيالار جانە كاسىپكەرلىكتى دامىتۋ باسقارماسىنىڭ تۋريزم بولىمىنەن الدىق.
ىشكى ءتۋريزمنىڭ ءۇش ءتۇرى دامىپ كەلەدى
استانادا ىشكى ءتۋريزمنىڭ نەگىزگى تۇرلەرى: mice-تۋريزم, ىسكەرلىك تۋريزم جانە مەديتسينالىق تۋريزم قارقىندى دامىپ كەلەدى. وسىلاردىڭ ىشىنەن مەديتسينالىق تۋريزمگە ناقتى مىسال كەلتىرەيىك. ماسەلەن, بيىل 27-28 ساۋىردە حالىقارالىق دەڭگەيدەگى جەتەكشى دارىگەرلەر مەن مەديتسينا سالاسىنىڭ عالىمدارى استانادا باس قوستى. يننوۆاتسيالىق-پروفيلاكتيكالىق مەديتسينا ينستيتۋتى ۇيىمداستىرعان ەڭ اۋقىمدى مەديتسينالىق فەستيۆالدىڭ ءبىرى – «Nobel Fest: مەديتسينالىق يننوۆاتسيالار» اتتى حالىقارالىق فورۋم ءوتتى. الەمگە ايگىلى 40-تان استام عالىمدار مەن دارىگەرلەر عىلىم, يننوۆاتسيا جانە ءبىلىم بەرۋ ماسەلەلەرىن بىرىگىپ تالقىلادى. رەسەيدىڭ باس گەرونتولوگى ولگا تكاچەۆا, مولەكۋلالىق پاتولوگيا سالاسىنداعى جەتەكشى مامان يگور كۆەتنوي, پروفەسسور, مەديتسينا عىلىمدارىنىڭ دوكتورى, «سەرپىن» سىيلىعىنىڭ يەگەرى پاسكال مايەر جانە جەتەكشى امەريكالىق نەيروحيرۋرگ ءسالىم ابدۋلراۋف سەكىلدى مەديتسينا سالاسىنداعى ساراپشىلار القالى جيىننىڭ نەگىزگى سپيكەرلەرى بولدى.
«فورۋم بىزگە دەربەس مەديتسينا, بيوينفورماتيكا, جاساندى ينتەللەكت جانە كلينيكالىق مەديتسينانىڭ ءارتۇرلى باعىتى بويىنشا الدىڭعى قاتارلى حالىقارالىق دەرەكتەرمەن تانىسۋعا بىرەگەي مۇمكىندىك ۇسىندى. سونداي-اق بۇل جەردە ادام اعزاسىنىڭ نەيرو-يممۋنوەندوكريندىك رەتتەلۋى سالاسىنداعى ىرگەلى زەرتتەۋلەر مەن ءدىڭ جاسۋشالارىن زەرتتەۋدەگى سوڭعى جەتىستىكتەر تۋرالى وزەكتى اقپارات بەرىلدى» دەدى جيىننىڭ اشىلۋ سالتاناتىندا «يننوۆاتسيالىق-پروفيلاكتيكالىق مەديتسينا ينستيتۋتى» كورپوراتيۆتىك قورىنىڭ ديرەكتورى, قر ۇعا اكادەميگى, پروفەسسور ۆالەري بەنبەرين.
رەسەي گەرونتولوگيالىق عىلىمي-كلينيكالىق ورتالىعىنىڭ ديرەكتورى, رەسەي دەنساۋلىق ساقتاۋ مينيسترلىگىنىڭ باس شتاتتان تىس گەرياترى ولگا تكاچەۆا بۇگىنگى تاڭدا ادامنىڭ ۇزاق جاساۋى مەن ءومىر ءسۇرۋ ۇزاقتىعىنا قانداي فاكتورلار اسەر ەتەتىنى جايلى ايتتى.
«سوڭعى 100 جىلدا مەديتسينالىق تەحنولوگيانىڭ دامۋى ارقاسىندا تۋعان كەزدەگى كۇتىلەتىن ءومىر ءسۇرۋ ۇزاقتىعى شامامەن 30 جىلعا ۇزاردى. ورتاشا ءومىر ءسۇرۋ ۇزاقتىعى دا ارتتى, بىراق ماكسيمالدى ءومىر ءسۇرۋ ۇزاقتىعى جوعارىلامادى. قازىرگى كەزدە تىركەلگەن ەڭ ماكسيمالدى ءومىر ءسۇرۋ ۇزاقتىعى – جاننا كالموندىكى, 122 جىل 164 كۇن. جۇيەنىڭ مۇشەلەرى ءارتۇرلى قارقىنمەن قارتايادى, بيولوگيالىق جاستى قاداعالاۋ ءۇشىن جۇرەك-تامىر جۇيەسىن, مەتابوليزم جۇيەسىن, كوگنيتيۆتى فۋنكتسيالاردى, كورۋ ورگاندارىن جانە ت. ب. قاداعالاۋ كەرەك. سوندىقتان قارتايۋدىڭ ءارتۇرلى بيوماركەرىنە نەگىزدەلگەن ءارتۇرلى كالكۋلياتور جاسالىپ جاتىر. وسىنداي كالكۋلياتوردى پايدالانىپ, قان تامىرلارىنىڭ جاسىن انىقتاۋعا بولادى» دەدى ول.
مولەكۋلالىق پاتولوگيا سالاسىنداعى جەتەكشى مامان يگور كۆەتنوي: «مۇنداي عىلىمي فەستيۆالدەردى وتكىزۋ – قازاقستان, استانا ءۇشىن وراسان زور وقيعا, ءارى بۇل ىرگەلى ءبىلىمنىڭ دامۋىنا ىقپال ەتەدى. ءبىلىم – ءبىزدىڭ باستى كاپيتالىمىز. ال ماقساتىمىز – ادامزاتتى ساقتاۋعا جانە ادام ءومىرىن قۇتقارۋعا باعىتتالعان عىلىم, ونەر جانە كاسىپتى بىرىكتىرەتىن زاماناۋي مەديتسينا جەتىستىكتەرىن سىزدەرگە تانىستىرۋ» دەگەن ويىن جەتكىزدى.
فەستيۆالدىڭ باستى ماقساتى – مىڭداعان قازاقستاندىقتى ءبىلىم, عىلىم جانە يننوۆاتسياعا شابىتتاندىرۋ. Nobel Fest جىل سايىن 100 ەلدەن 500 مىڭ قاتىسۋشى مەن 500 ۋنيۆەرسيتەتتى جيناي وتىرىپ, ۇزاق مەرزىمدى دامۋ مەن ەڭ جاقسى بولاشاقتى قالىپتاستىرۋداعى ءبىلىم مەن جان-جاقتى وقىتۋدىڭ ءرولى تۋرالى يدەيانى تاراتادى.
ەلوردا تۋريستەرگە قولايلى ما؟
رەسمي مالىمەتتەرگە سۇيەنسەك, قازىرگى كەزدە استانادا 17,5 مىڭ توسەك/ورىنعا (9439 بولمە) ارنالعان 257 قوناقۇي جۇمىس ىستەيدى. ولاردىڭ ءبارى eQonaq جۇيەسىنە قوسىلعان. سونىڭ ىشىندە بەس جۇلدىزدىسى – 8, ءتورت جۇلدىزدىسى – 11, ءۇش جىلدىزدىسى – 5. 205 قوناقۇي ەشقانداي ساناتقا جاتپايدى. ۇلتتىق ستاتيستيكا بيۋروسىنىڭ دەرەكتەرىنە ۇڭىلسەك, 2023 جىلدىڭ ءىىى توقسانىندا ەلورداداعى قوناقۇيلەردىڭ ورتاشا تولىمدىلىعى 30,1 پايىزدى قۇراعان.
استانا قالاسىنىڭ اكىمدىگى تۋريستىك ينفراقۇرىلىمدى دامىتۋعا ايرىقشا كوڭىل بولۋدە. قالاعا كەلگەن تۋريستەرگە ەڭ الدىمەن كەرەك نارسە – كولىك پەن اقپارات. وسىنداي ماقساتپەن نۇرسۇلتان نازارباەۆ اۋەجايىندا جانە «استانا-بايتەرەك» مونۋمەنتىندە تۋريستەرگە ارنالعان اقپاراتتىق دۇڭگىرشەكتەر جۇمىس ىستەيدى. سونىمەن بىرگە izi.travel حالىقارالىق پلاتفورماسىندا استانا قالاسى بويىنشا اۋديو-تۋرلارعا قولجەتىمدىلىكتىڭ بولۋى ءاربىر تۋريسكە ىڭعايلى. وندا ەلورداداعى 164 تانىمال نىسان بويىنشا ەكسكۋرسيا جۇكتەلگەن. باس قالادا جاياۋ جۇرگىنشىلەرگە باعىت-باعدار سىلتەيتىن بىرىڭعاي جۇيە دە بار. وندا 15 افيشا تۇعىرى, 139 باعىت سىلتەگىش, 108 پيلون بىرىكتىرىلگەن.
«Astana City Pass» تۋريستىك كارتا جوباسىنىڭ كومەگىمەن كەز كەلگەن تۋريست قالانىڭ كورىكتى جەرلەرىنە لەزدە بارا الادى. ويتكەنى تۋريستىك كارتا 11 مادەنيەت نىسانىنا 70 پايىزعا دەيىن جەڭىلدىكپەن بارۋعا مۇمكىندىك بەرەدى. 1 كارتانىڭ قۇنى 24 ساعاتقا – 9990 تەڭگە, 72 ساعاتقا – 13990 تەڭگە. سونداي-اق شەتەلدىك تۋريستەرگە «Red Bus» ەكسكۋرسيا اۆتوبۋسى قىزمەت كورسەتەدى. بۇل اۆتوبۋستاردىڭ بارلىعى اۋديوگيدپەن جابدىقتالعان. وندا تۋريستەرگە ەكسكۋرسيا 8 تىلدە: قازاق, ورىس, اعىلشىن, قىتاي, نەمىس, تۇرىك, فرانتسۋز, يسپان تىلدەرىندە ۇسىنىلادى.
قىزمەت تۇرلەرى قانداي؟
تۋريستەرگە ارنالعان قىزمەت تۇرلەرىن جاقسارتۋ ماقساتىمەن visitastana.kz اقپاراتتىق جۇيەسى ىسكە قوسىلعان. بۇل جۇيەدە مىناداي قىزمەت تۇرلەرى بار: aviata.kz قىزمەتىمەن ينتەگراتسيالاۋدىڭ ناتيجەسىندە اۋە بيلەتتەرىن وڭاي ساتىپ الۋعا مۇمكىندىك بار; booking.com حالىقارالىق جۇيەسىمەن كىرىكتىرىلگەن سەرۆيس قوناقۇيدەگى بولمەلەردى الدىن الا برونداۋعا قولايلى; ticketon.kz پلاتفورماسى استاناداعى بارلىق مادەني, سپورتتىق, رۋحاني ءىس-شارالاردىڭ افيشاسىمەن الدىن الا تانىسۋعا, كينوعا يا بولماسا فۋتبول ويىنىنا بارۋدى جوسپارلاۋعا جول اشادى. ال بارلىق قالادا بار 2GIS ىزدەستىرۋ جۇيەسى تۋريستىك نىساندارعا اداسپاي جەتۋگە مۇمكىندىك بەرەدى. Visitastana.kz برەندىن الەمگە تانىمال ەتۋ جانە وسى سەرۆيستى پايدالانۋشىلار اعىنىن ۇلعايتۋ ماقساتىندا visitastana.kz برەندتىك كيىم وندىرىسىنە جاردەمدەسۋ باعىتىندا قىزۋ جۇمىس جۇرۋدە. جالپى العاندا, استانانىڭ تۋريستىك يندۋسترياسىن دامىتۋدىڭ الەۋەتى وتە زور. سول سەبەپتەن باس قالامىزدىڭ تارتىمدىلىعىن ارتتىرۋعا باعىتتالعان ءىس-شارالار ۇزدىكسىز اتقارىلىپ كەلەدى. ەلوردادا قازىر 2435 تاماقتانۋ نىسانى بار. ول جەردە ۇلتتىق اس مازىرىنەن باستاپ كوپتەگەن حالىقتىڭ تاعامى قويىلعان. بۇل جەردە ۇلتتىق اس, ۇلتتىق مەيرامحانا ماسەلەسى وتە وزەكتى.
ەلورداعا تابانى تيگەن تۋريستەر تاماشالايتىن جەرلەر از ەمەس. ءبىر عانا رەسپۋبليكالىق مەشىتتە بىرنەشە ساعات قىدىرۋعا بولادى. ودان بولەك, قالادا 9 مۇراجاي, ورتالىقتار; 2 ۇلكەن ساراي, 8 تەاتر عيماراتى, 4 كونتسەرت زالى, 11 ءدىني نىسان, 6 سپورت عيماراتى, 7 ۇلكەن ساۋدا-ساتتىق جانە ويىن-ساۋىق ورتالىقتارى, 4 كوركەم گالەرەيا, اتىراۋ كوپىرى سياقتى كورنەكتى, كورىكتى جەرلەر بار. ەلىمىزدىڭ وزگە وڭىرلەرىنەن كەلگەن قوناقتار كوبىنەسە ەكسپو-
قالاشىققا, «Ailand» وتباسى دەمالىس ورتالىعىنا, «استانا بالەت» تەاترىنا, «استانا-بايتەرەك» مونۋمەنتىنە, «حان شاتىر» ساۋدا-ساتتىق جانە ويىن-ساۋىق ورتالىعىنا بارىپ دەمالادى جانە سەرۋەندەيدى.
