استانا قالاسى ءماسليحاتىنىڭ دەپۋتاتتارى ەكى قاباتتى ەكسكۋرسيالىق اۆتوبۋسقا ءمىنىپ, ەلوردانىڭ تۋريستىك ورتالىقتارىن ارالادى.
باس قالانىڭ تۋريستىك نىساندارىن ارالاۋدى نۇرسۇلتان نازارباەۆ اتىنداعى حالىقارالىق اۋەجايدان باستاعان دەپۋتاتتار ەكسكۋرسيا بارىسىندا تۋريستەرگە قىزمەت كورسەتۋ سالاسىنداعى ساپا ماسەلەسىن باستى نازاردا ۇستاپ, ونداعى تۇيتكىلدەردى استانا قالاسى ءماسليحاتىنىڭ الداعى وتىرىسىندا ورتاعا سالماق. اۋەجايدىڭ تىنىس-تىرشىلىگىمەن تولىقتاي تانىسىپ شىققان دەپۋتاتتار باس قالاعا تۋريستەردى تارتۋدا كەلىپ-كەتەتىن جەر مەن تۇسەلحانالاردىڭ جاعدايىنىڭ جاسالۋىنىڭ ماڭىزى زور ەكەنىن ايتتى.
– مەملەكەت باسشىسى قاسىم-جومارت توقاەۆ جاقىندا وتكەن ءتۋريزمدى دامىتۋ جونىندەگى كەڭەستە «بۇگىندە الەمدىك جالپى ونىمدەگى ءتۋريزمنىڭ ۇلەسى 9 پايىزدان استى. ياعني, پاندەمياعا دەيىنگى دەڭگەيگە قايتا كەلدى دەۋگە بولادى. دۇنيەجۇزىندەگى جۇمىس ورىندارىنىڭ شامامەن 10 پايىزى تۋريزمگە تيەسىلى. ءاربىر ءتورتىنشى جۇمىس ورنى وسى سالادا اشىلىپ جاتىر. كورسەتىلەتىن قىزمەتتەر بويىنشا الەمدىك ەكسپورتتىڭ 30 پايىزى, ينۆەستيتسيانىڭ 7 پايىزى جانە سالىق تۇسىمدەرىنىڭ 5 پايىزى تۋريزم ارقىلى تۇسەدى. قازاقستاندا ءتۋريزمنىڭ بارلىق ءتۇرىن دامىتۋعا مول مۇمكىندىك بار, ەكولوگيالىق تۋريزمنەن باستاپ بيزنەس تۋريزمىنە دەيىن دامىتۋعا بولادى» دەپ جاۋاپتى ادامدارعا تاپسىرمالار جۇكتەگەن بولاتىن. مىنە, سول نەگىزدە قازىرگى تاڭدا كوپتەگەن جۇمىستار قولعا الىنىپ جاتىر. ارينە, ەلىمىزگە تۋريست رەتىندە كەلگەن ادامنىڭ العاشقى كورەتىن جەرى اەروپورت پەن تەمىرجول ۆوكزالدارى بولعاندىقتان, ءبىز دە ساپارىمىزدى وسى جەردەن باستاعاندى ءجون كوردىك. قازىر ءبىز اەروپورتتىڭ تىنىس-تىرشىلىگىمەن تانىسىپ شىقتىق. حالىقارالىق اۋەجاي بولعاندىقتان, بارلىق تالاپتارعا ساي جۇمىس ىستەپ تۇرعانىن كورىپ وتىرمىز. 2023 جىلى ەلىمىزگە اۋەجولدارى ارقىلى كەلۋشىلەردىڭ سانى 7,5 ميلليون ادامدى قۇراپتى. ونىڭ ىشىندە 1,3 ميلليون ادام تۋريستەر ساناتىنا جاتادى. شەتەلدەن كەلۋشىلەرگە جاعدايدىڭ بارلىق ءتۇرى جاسالعان. اۋەجايدا, تەمىرجول ۆوكزالىندا, سوو-دا Taxi Point اپپاراتتارى دا ورناتىلعان. سونىمەن قاتار تاماقتانۋ, جاتىن ورىن سياقتى نىساندار دا قوناقتاردى بارىنشا ريزا قىلىپ شىعارىپ سالۋعا ءوز كومەگىن تيگىزىپ جاتىر. الدا تاعى باسقا دا نىسانداردى ارالاپ, ءوزىمىز دە تۋريستەردىڭ كوزىمەن قاراپ كورەتىن بولامىز, – دەدى استانا قالاسى ءماسليحاتىنىڭ VIII شاقىرىلىم دەپۋتاتى ءمادينا اجىكەنوۆا.
اۋەجايدان كەيىن حالىق قالاۋلىلارى «Wyndham Garden Astana» قوناق ءۇيى مەن «Green Clinic» مەديتسينالىق ورتالىعىنا ات باسىن بۇردى.
– ءبىزدىڭ مەديتسينالىق ورتالىق – 2018 جىلدان باستاپ قىزمەت كورسەتە باستاعان ەلوردامىزداعى بىردەن-ءبىر زاماناۋي ورتالىق. مۇندا اقش, جاپونيا, گەرمانيا جانە وڭتۇستىك كورەيانىڭ جەتەكشى الەمدىك وندىرۋشىلەرىنىڭ زاماناۋي مەديتسينالىق جابدىقتارىمەن جابدىقتالعان. ءبىزدىڭ بارلىق مەديتسينالىق قىزمەتكەرلەرىمىز جوعارى مەديتسينالىق بىلىكتىلىككە يە جانە قازاقستان رەسپۋبليكاسى دەنساۋلىق ساقتاۋ مينيسترلىگىنىڭ نورماتيۆتىك-قۇقىقتىق اكتىلەرىنە قاتاڭ سايكەستىكتە جۇمىس ىستەيدى.
ءبىزدىڭ ورتالىق پاتسيەنتتەرگە دارىگەردىڭ العاشقى قابىلداۋىنان, فۋنكتسيونالدىق جانە ساۋلەلىك دياگنوستيكادان تەراپيالىق جانە حيرۋرگيالىق بەيىن بويىنشا ستاتسيونارلىق ەمدەۋگە دەيىن مەديتسينالىق قىزمەتتەردىڭ كەڭ سپەكترىن الۋعا مۇمكىندىك بەرەدى. ءارى پاتسيەنتتەر ءۇشىن ءبىز كەلىسىمشارت نەگىزىندە پروفيلاكتيكالىق دەربەستەندىرىلگەن مەديتسينا ەلەمەنتتەرىمەن ۇزاق مەرزىمدى قاتىناستاردى, سونداي-اق سوزىلمالى اۋرۋلارى بار پاتسيەنتتەردى ديناميكالىق باقىلاۋدى قامتاماسىز ەتەمىز. ءبىزدىڭ باسىمدىلىعىمىز – پاتسيەنتتەردىڭ قاۋىپسىزدىگى جانە كورسەتىلەتىن مەديتسينالىق قىزمەتتەردىڭ قاۋىپسىزدىگى. سوندىقتان بىزدە مەديتسينالىق قۇرالداردى زارارسىزداندىرۋعا ارنالعان ءوز ورتالىعىمىز بار جانە تەك زاماناۋي جابدىقتار مەن دالەلدەنگەن زارارسىزداندىرۋ قۇرالدارىن پايدالانامىز, – دەدى مەديتسينالىق ورتالىقتىڭ ديرەكتورى, مەديتسينا عىلىمدارىنىڭ كانديداتى راحات بايقوشقاروۆا.
اتالعان ورتالىق ەلىمىزدىڭ مەديتسينالىق ءتۋريزمىن دامىتۋعا ۇلەس قوسىپ وتىرعان بىردەن-ءبىر ەمحانا بولىپ سانالادى. جالپى مەديتسينالىق تۋريزم تەرمينىنە توقتالساق, ول – ازاماتتى تۇرعىلىقتى جەرىنەن تىس جەردە دەمالىسپەن قوسا, 5 ءتۇرلى مامانداندىرىلعان مەديتسينالىق كومەكپەن, ونىڭ ىشىندە جوعارى تەحنولوگيالىق مەديتسينالىق قىزمەتپەن قامتۋدى كوزدەيتىن تۋريزم ءتۇرى. اۋەلدە, بۇل سالادا باتىس ەۋروپا جانە اقش ەلدەرى كوشباسشى بولسا, بۇگىندە وڭتۇستىك كورەيا, قىتاي, ءۇندىستان جانە وڭتۇستىك-شىعىس ازيا ەلدەرىندەگى مەدتۋريزم ۇزدىكتەر قاتارىندا. سوڭعى ۋاقىتتا مەديتسينالىق تۋريزم قازاقستاندا دا قارقىن الىپ كەلە جاتىر, دەرتىنە شيپا ىزدەگەندەر ەلىمىزگە الەمنىڭ تۇكپىر-تۇكپىرىنەن كەلەدى. ءوز كەزەگىندە بۇل دا ءبىر ەلگە تۋريستەردى تارتۋدىڭ تارتىمدى جولى بولماق.
ال ەندى ءتۇرلى باعالاۋلار بويىنشا, ستاتيستيكالىق اقپاراتتارعا سۇيەنسەك, قازاقستانعا جىل سايىن مەديتسينالىق كومەك الۋ ماقساتىندا شامامەن, ەكى مىڭ شەتەل ازاماتى كەلەدى. ءتۇرلى دەرەكتەرگە سايكەس, 2017 جىلى نەگىزگى مەديتسينالىق ۇيىمداردىڭ ستاتسيونارىندا ەمدەلگەن شەتەلدىك ەمدەلۋشىلەر سانى (جوسپارلى ەمدەۋ) 1 600-دەن استام ادامدى قۇراعان. ال 2018 جىلى بۇل كورسەتكىش ەداۋىر ارتىپ, 2 400-دەن اسىپ ءتۇستى. سونداي-اق 2017-2018 جىلدارى شيپاجايلىق-كۋرورتتىق ۇيىمداردا ساۋىقتىرۋ شارالارىن العان شەتەلدىك ازاماتتار سانى تيىسىنشە, 24 مىڭ ادامعا جەتكەن.
ال دەپۋتاتتار «Wyndham Garden Astana» قوناق ءۇيى مەن «Green Clinic» مەديتسينالىق ورتالىعىنان كەيىن «اتامەكەن» ەتنو-مەموريالدىق كەشەنى مەن «Sandyq» ۇلتتىق تاعامجايىنا دا بارىپ, اتالعان نىسانداردىڭ تىنىس-تىرشىلىگىمەن, قىزمەت كورسەتۋ ساپاسىمەن تانىستى.
شاپاعات ءابدىر
