قاڭتار ايىندا وتەتىن ۇبت-عا قاتىسۋ ءۇشىن ءوتىنىش قابىلداۋ 29 جەلتوقساننان باستالىپ, 6 قاڭتارعا دەيىن جالعاسادى. ۇبت-عا تىركەلۋ ۇلتتىق تەستىلەۋ ورتالىعىنىڭ app.testcenter.kz. سايتىندا نەمەسە UTO قوسىمشاسى ارقىلى جۇرگىزىلەدى.
قاڭتار ايىندا وتەتىن ۇلتتىق بىرىڭعاي تەستىلەۋ 18 قاڭتار مەن 10 اقپان ارالىعىندا وتەدى. ەستەرىڭىزگە سالا كەتسەك, قاڭتارداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, جازعى ۇبت ناتيجەلەرى بويىنشا شەكتى بالل جيناماعاندار, شىعارماشىلىق ببت-دان باسقا دايىندىق باعىتتارىنا, پەداگوگيكالىق باعىتقا اقىلى نەگىزدە اۋىسقىسى كەلەتىندەر, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى. قاتىسۋشىلار تەستىلەۋ وتكىزىلەتىن ورىندى, كۇندى جانە ۋاقىتتى وزدەرى تاڭدايدى. ۇبت-داعى پاندەردىڭ سانى وزگەرىسسىز قالادى, ياعني ۇشەۋى مىندەتتى جانە ەكەۋى تاڭداۋ بويىنشا بولادى. الايدا «وقۋ ساۋاتتىلىعى» مەن «ماتەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقارادى. ال بەيىندىك پاندەردىڭ سۇراقتار سانى ارتىپ, 40 تەست تاپسىرماسىنان تۇراتىن بولادى.
اتاپ وتەيىك, بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلادى. وسىلايشا, ۇبت تاپسىرمالار سانى وزگەرىسسىز قالادى, جالپى 120 سۇراق. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرما. جوعارى بالل – 140, ول دا وزگەرىسسىز قالدى.
«وسى وزگەرىستەردى ەسەپكە الا وتىرىپ, ءبىز جاتتىعۋ تەستىن ىسكە قوستىق. ەلىمىزدىڭ ءبىلىم بەرۋ ورتالىقتارىمەن بىرلەسىپ ۇبت-عا دايىندالۋعا ارنالعان تەگىن ونلاين-ساباقتاردى باستادىق. سونىمەن قاتار وقۋ جىلىنىڭ باسىندا ۇتو سايتىندا تەست تاپسىرمالارى قۇراستىرىلعان ادەبيەتتەر ءتىزىمى مەن تەست جوسپارى; «قازاقستان تاريحى» جانە «دۇنيەجۇزى تاريحى» پاندەرى بويىنشا 100 تاريحي داتا ءتىزىمى; «ينفورماتيكا» پانىنەن تەرميندەر ءتىزىمى; «قازاق ادەبيەتى» جانە «ورىس ادەبيەتى» بويىنشا ادەبي شىعارمالار ءتىزىمى جاريالاندى. سونداي-اق بارلىق تالاپكەر ءۇشىن تەستىلەۋدە كومپيۋتەر ەكراندارىندا كالكۋلياتور, مەندەلەەۆ جانە ەرىگىشتىك كەستەسى قولجەتىمدى بولادى» دەدى قر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.
