بيىل الەم تاريحىندا حالىقارالىق يوگا كۇنىن ونىنشى رەت اتاپ وتۋدە. يوگا – بۇل سانا مەن دەنەنىڭ ۇيلەسىمى, وي مەن ارەكەت اراسىنداعى تەپە-تەڭدىككە, دەننىڭ ساۋلىعىنا باستايتىن ەجەلگى تاجىريبە. وسى مەرەكەگە وراي, استاناداعى بەيبىتشىلىك جانە كەلىسىم سارايىنىڭ الدىنداعى الاڭدا بۇقاراعا ارنالعان اشىق جاتتىعۋ ءوتتى.
ءۇندىستاننىڭ قازاقستانداعى ەلشىلىگى جانىنداعى Yoga family Astana جانە سۆامي ۆيۆەكاناندا اتىنداعى مادەني ورتالىعى ۇيىمداستىرعان ءىس-شارا قالا اكىمدىگى تاراپىنان قولداۋعا يە بولدى.
«ەگەر ءسىز دەنساۋلىعىڭىز ءۇشىن نە ىستەۋ كەرەكتىگىن بىلمەسەڭىز, يوگامەن اينالىسىڭىز. بۇل ءسىزدىڭ بۇلشىق ەتتەرىڭىزدى شيراتىپ, دەنىڭىزدى ساۋلىعىن جاقسارتىپ, سترەسكە ءتوزىمدى ەتەدى. ەڭ باستىسى, تىنىس الۋ جۇيەسىنە ەرەكشە نازار اۋدارىڭىز, ويتكەنى تىنىس الۋ تاماق پەن سۋدان دا ماڭىزدى» دەدى ءىس-شارانى ۇيىمداستىرۋشىلاردىڭ ءبىرى راماناتحان سۋنداراپانديان.
ەلوردادا جۇزدەن استام يوگا ورتالىقتارى بار, مىڭداعان استانالىقتار الەممەن جانە تابيعاتپەن ۇيلەسىمدىلىك سەزىمىن اشۋعا باعىتتايتىن جاتتىعۋلار كەشەنىن يگەرىپ, جان دۇنيەسىنىڭ ۇيلەسىمىنە قول جەتكىزۋدە. سول سەبەپتى دە يوگا كۇنىنە ارنالعان شاراعا كەلۋشىلەردىڭ قاتارى كوپ بولدى. يوگا شەبەرلەرى بۇل ءادىستى يگەرۋ ءۇشىن جاس مولشەرى دە, شەبەرلىك دەڭگەيى دە ماڭىزدى ەمەس دەپ سانايدى. ويتكەنى بۇل جاسى ۇلكەنگە دە, كىشىگە دە بىردەي پايدالى.
«نيەت بىلدىرگەندەردىڭ ءبارى جينالدى. باسىندا «سۋريا-ناماسكار» جاتتىعۋلار كەشەنىنىڭ 108 اينالىمى وتكىزىلدى, ودان كەيىن ءتۇرلى ءىس-شارالار مەن قويىلىمدار ءوز دارەجەسىندە ءوتتى» دەدى يوگا جاتتىقتىرۋشىسى ايجان.
قاتارىنان بىرنەشە جىلدان بەرى وتكىزىلىپ كەلە جاتقان مەرەكەنى ەلوردالىقتار جىلى قابىلدادى.
