استانا مەملەكەتتىك فيلارمونياسىنىڭ كامەرالىق حورى العاش رەت ۇندىستانداعى حالىقارالىق فەستيۆالگە قاتىستى.
ونەر ۇجىمىنىڭ كوركەمدىك جەتەكشىسى گۇلميرا قۇتتىباداموۆانىڭ سوزىنشە, بىلتىرعا دەيىن ونىڭ ءۇندى مۋزىكاسىمەن تانىستىعى رادج كاپۋر مەن ميتحۋن چاكرابورتيدىڭ ورىنداۋىنداعى اندەرمەن شەكتەلەتىن. الايدا بۇكىل الەمگە تانىمال كومپوزيتور, سكريپكاشى
ل.سۋبرامانياممەن كەزدەسىپ, ىنتىماق ورناتۋىنان كەيىن ونىڭ ويى وزگەرگەن. «سۋبرامانيام مۋزىكاسىنىڭ وزىندىك قاسيەتى مەن ەرەكشەلىگى بار. ونىڭ اۋەندەرى ەركىندىككە تولى» دەيدى حوردىڭ كوركەمدىك جەتەكشىسى.
ءۇندىستاندا وتكەن حالىقارالىق لاكشمينارايانا مۋزىكالىق فەستيۆالىندە (LGMF) 100-گە جۋىق مۋزىكانت ونەر كورسەتتى. «ءۇندى مۋزىكاسىنىڭ قۇدايى» سانالاتىن سۋبرامانيامنىڭ جەتەكشىلىگىمەن كلاسسيكالىق مەلوديالاردىڭ ءپوپۋرريى شىرقالدى. فەستيۆالدىڭ 33 جىلدىق تاريحىندا تىنباي ونەر كورسەتىپ كەلە جاتقان ۆيرتۋوز سكريپكاشى مۋزىكانىڭ مادەني جانە تىلدىك شەكارالارى جوق ەكەنىن دالەلدەپ كەلەدى.
33-فەستيۆال Times Of India-مەن بىرىگىپ ۇيىمداستىرىلدى. بيىلعى فەستيۆال ءۇندى-قازاق دوستاستىعىنا ارنالدى. ورتالىق ازيادان بارعان سيمفونيالىق جانە حور وركەسترى 13 قاڭتارعا دەيىن ءۇندىستاننىڭ بانگالور, مايسورۋ جانە مۋمباي سياقتى 4 قالاسىندا ونەر كورسەتىپ كەلەدى. دەليدەگى كەشكە ەلدىڭ مادەنيەت ءمينيسترى ميناكشي لەكحي, سونداي-اق قازاقستان رەسپۋبليكاسىنىڭ ەلشىلىگى وكىلدىگى باسشىسىنىڭ ورىنباسارى دارحان سەيتەنوۆ قاتىستى.
ايتا كەتەيىك, قازاقستاننان كەلگەن حور ءانسامبلى ەكى ىشەكتى دومبىرا مەن قوبىز سياقتى اسپاپتاردىڭ سۇيەمەلدەۋىمەن حالىق اندەرىن ورىندادى.
