جاستارعا الەمدىك جوعارى ساپالى بىلىممەن سۋسىنداتىپ وتىرعان ءبىلىم وشاقتارىنىڭ ءبىرى – Maqsut Narikbayev University-ىندە جۋىردا تۇلەكتەرىنىڭ ءبىتىرۋ كەشى ءوتتى.
بيىلعى جىلى وقۋدى 694 ستۋدەنت ءتامامدادى, ال ونىڭ 39-ى – شەتەلدىك ستۋدەنت. وسى وقۋ جىلىندا MNU ستۋدەنتتەرى QAA ارقىلى اككرەديتتەلگەن, ياعني ۇلىبريتانيانىڭ جوعارى ءبىلىم بەرۋ ساپاسىنىڭ ستاندارتتارىنا سايكەس كەلەتىن ديپلومدارىن قولدارىنا الدى. مەرەكە ءداستۇرلى تۇردە ۋنيۆەرسيتەتتىڭ ورتالىق فەميدا الاڭىندا ءوتتى. MNU پروۆوستى سەرگەي پەن ءبىرىنشى كەزەكتە ءسوز الىپ, تۇلەكتەردى ۋنيۆەرسيتەتتى اياقتاۋىمەن قۇتتىقتاپ, جىلى لەبىزىن ءبىلدىردى. – بۇگىن ءاربىرىڭىزدىڭ جاھاندى جاقسارتۋعا اتسالىسا الاتىندىعىڭىزعا كەپىل بولاتىن ديپلومدارىڭىزدى قولدارىڭىزعا الاسىزدار. قازىرگى تاڭدا الەم تۇرعىندارىنىڭ سانى 8 ميلليارد بولسا, سىزدەر سولاردىڭ ىشىندەگى – 694 جۇيرىگىسىزدەر. سەبەبى سىزدەر – MNU تۇلەكتەرىسىزدەر. ءبىز بارشاڭىزعا سەنىم ارتىپ وتىرمىز, ال جەتىستىكتەرىڭىز جاقىندارىڭىزعا, ءبىزدىڭ ۋنيۆەرسيتەتكە ماقتانىش بولاتىنى انىق. ومىرلىك جانە كاسىبي جولدا دانالىق پەن ابىروي بيىگىنە كوتەرىلىڭىزدەر, – دەدى سەرگەي پەن. سونداي-اق MNU ستۋدەنتتەرى بار ىقىلاسپەن وتان ءۇشىن ەڭبەكتەنۋگە, پاتريوتيزم, ادالدىق پەن ادىلدىكتى العا تارتۋعا انت بەردى. ءداستۇر بويىنشا فەميدا ءمۇسىنىنىڭ جانىنداعى ورتالىق الاڭعا «جۇلدىز» قويىلىپ, بۇل تۇلەكتەر بۋىنى ۋنيۆەرسيتەت تاريحىنا ەندى. ءىس-شاراعا قاتىسقان پارلامەنت ءماجىلىسىنىڭ دەپۋتاتى ايداربەك حودجانازاروۆ قۇتتىقتاۋ ءسوز سويلەدى. -سىزدەر ۇزدىك ۋنيۆەرسيتەتتىڭ شاكىرتىسىزدەر! ەگەر ءسىز ءوز ورتاڭىزدىڭ ەڭ اقىلدىسى بولىپ كورىنسەڭىز, دەمەك, قورشاعان قاۋىمىڭىزدى وزگەرتۋىڭىز كەرەك. ءاردايىم وزىڭىزدەن الدەقايدا اقىلدى, تاجىريبەلى ادامدارمەن سويلەسىڭىز. بارشاڭىزعا باقىت تىلەيمىن. بۇل جاھان قانشا كەڭ كورىنگەنىمەن, سىزدەر الار اسۋ الدا!,- دەدى حالىق قالاۋلىسى.
