استانادا «سوڭعى ۇكىم» ءفيلمىنىڭ الدىن الا كورسەتىلىمى ءوتتى. فيلم قازاقتىڭ كورنەكتى اعارتۋشىسى, ۇلت ۇستازى احمەت بايتۇرسىنوۆتىڭ ءومىرىنىڭ بارلىق كەزەڭدەرىن قامتيدى. تۋىندى 23 مامىردان باستاپ ەل كينوتەاترلارىنا جول تارتادى.
تولىقمەتراجدى تاريحي درامانى مادەنيەت جانە اقپارات مينيسترلىگىنىڭ تاپسىرىسىمەن, ۇلتتىق كينونى قولداۋ مەملەكەتتىك ورتالىعىنىڭ قولداۋىمەن Folklore media ستۋدياسى تۇسىرگەن. «ۇلتتىق ءپاتريوتيزمدى تەك تاريح وياتادى. تاۋەلسىزدىكتىڭ تامىرى تەرەڭ تاريحتان باستاۋ الادى. وسىنى الاش الىپتارى ايتىپ, قاعازعا ءتۇسىردى. ءبىز دە وسىنداي تاعىلىمعا, ونەگەگە تولى شىعارمالار كوبەيە بەرسىن دەيمىز. بيىل 5 جىلدىق مەرەيتويىن اتاپ وتكەن ۇلتتىق كينو ورتالىعى وسى باعىتتا وتاندىق كينويندۋستريانى دامىتۋ ءۇشىن مينيسترلىكپەن بىرلەسە جۇمىس ىستەيتىن بولادى» دەدى «ۇلتتىق كينونى قولداۋ ورتالىعى» اق باسقارما توراعاسى قۇرمانبەك جۇماعالي. ءفيلمنىڭ ءتۇسىرىلىمى الماتى, سەمەي قالالارى مەن اباي, الماتى, جەتىسۋ وبلىستارىندا ۇيىمداستىردى. ءتۇسىرىلىم توبىن ەرلان نۇرمۇحامبەتوۆ پەن ەرگەن توقمۋرزين باسقاردى. «احاڭ عىلىمعا عاشىق, رۋحاني جاعىنان جەتىلگەن, قايراتتى دا, جىگەرلى كەمەل ادام بولعان. جالپى, كەز كەلگەن ءفيلمدى باستاعاندا وسىنداي سەزىم بوي تۇزەيدى. بىراق, ءبىز بۇل جوباعا بارىنشا دايىندالىپ كەلدىك جانە دە احاڭدى تانۋ ءفيلمدى ءتۇسىرۋ بارىسىندا دا ءوز جالعاسىن تاپتى. ءبىز احاڭ عۇمىر كەشكەن ۋاقىت پەن كەڭىستىكتە ءومىر سۇرۋگە بارىمىزدى سالدىق» دەيدى ەرگەن توقمۋرزين. فيلمدە باستى ءرولدى قازاقستاننىڭ ەڭبەك سىڭىرگەن قايراتكەرى ازامات ساتىبالدى سومدايدى. سونداي-اق, كارتيناعا نازگۇل قارابالينا, الەكساندر باگريانتسەۆ جانە ەرلان كارىباەۆ تۇسكەن.
انەل امانگەلديەۆا,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
