قازاقستان رەسپۋبليكاسى ۇلتتىق ارحيۆىندە قازاقستاننىڭ ەڭبەك سىڭىرگەن قايراتكەرى, ارحەولوگ, تاريحشى, ەتنوگراف الكەي مارعۇلاننىڭ تۋعانىنا 120 جىل تولۋىنا وراي «الكەي مارعۇلاننىڭ الەمى» اتتى قۇجاتتىق كورمەنىڭ اشىلۋ سالتاناتى ءوتتى, دەپ حابارلايدى astana-akshamy.kz.
ءىس-شاراعا قر مادەنيەت جانە اقپارات ۆيتسە-ءمينيسترى ەربول الىقۇلوۆ, فيلولوگيا عىلىمدارىنىڭ دوكتورى, پروفەسسور سەرىك نەگيموۆ, قر پارلامەنتى سەناتىنىڭ دەپۋتاتى التىنبەك نۇحۇلى, الكەي مارعۇلاننىڭ قىزى دانەل مارعۇلان, جازۋشى, فيلولوگيا عىلىمدارىنىڭ دوكتورى, تۇرسىن جۇرتباي جانە ت.ب قوعام قايراتكەرلەرى قاتىستى.
«الكەي حاقانۇلىنىڭ اۋدارعان حاتتارى, ماقالالارى, قازاق دالاسىنان تاپقان ەرەكشە سۋرەتتەرى, وقۋ ورىندارىندا جازعان ەڭبەكتەرى بۇگىنگى عىلىمي اينالىمنىڭ سۇبەلى ماتەريالدارىنىڭ قاتارىنا كىرەدى. الكەي حاقانۇلى كوپ اشىلا بەرمەگەن كونە داۋىرلەرگە ساياحات جاساپ, ءبىزدىڭ بايىرعى مادەنيەتىمىزدى اق قاعازعا التىن ارىپتەرمەن جازعان عالىم. الكەي مارعۇلاننىڭ 100 جىلدىق مەرەي تويى يۋنەسكو شەڭبەرىندە اتالىپ ءوتتى. 2003 جىلى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ الدىندا جانە 2007 جىلى الماتىداعى ۇلتتىق عىلىم اكادەمياسىنىڭ جانىندا قولادان بيۋست-ەسكەرتكىش ورناتىلدى. سونداي-اق باياناۋىل اۋدانىنىڭ قۇندىكول اۋىلىنداعى جالپى ورتا ءبىلىم بەرۋ مەكتەبى مەن باياناۋىل ورتالىعىندا ورنالاسقان كوشەگە ەسىمى بەرىلدى», – دەدى ۆيتسە-مينيستر ەربول الىقۇلوۆ.
الكەي حاقانۇلىنىڭ قىزى دانەل مارعۇلان عالىمنىڭ ەسىمىن ارداقتاعان اۋقىمدى ءىس-شارا ءۇشىن العىس ايتىپ, اكەسى تۋرالى ەسكىرمەس ەستەلىكتەرىمەن ءبولىستى.
كورمەگە الكەي مارعۇلاننىڭ ومىرىنەن سىر شەرتەتىن 90-نان استام قۇندى قۇجات قويىلدى. اتاپ ايتساق, «شوقان ءۋاليحانوۆتىڭ كوركەم مۇراسى ماقالاسى», «قازان ۋنيۆەرسيتەتىنەن الىنعان قولجازبالار», «قولا ءداۋىرى قورىمدارى ماقالاسى», سونداي-اق جوشى حان كەسەنەسى مەن ايشا ءبيبى مازارىنىڭ سىزباسى, ماڭعىستاۋ ولكەسىنىڭ ەتنوگرافيالىق جازبالارى, رۋ تاڭبالارى, ارحيتەكتۋرالىق قۇرىلىس ماتەريالدارىنىڭ سىزبالارى, سۋرەتتەر تانىستىرىلدى.
