استانادا «ۇلى دالا جورىعى» ات مارافون-بايگەسى تۋرالى دەرەكتى ءفيلمنىڭ تۇساۋكەسەر كورسەتىلىمى ءوتتى, دەپ حابارلايدى astana-akshamy.kz
بۇل مارافون 2022 جىلدان باستاپ جىل سايىن «AMANAT» پارتياسىنىڭ, تۋريزم جانە سپورت مينيسترلىگىنىڭ قولداۋىمەن وتكىزىلىپ كەلەدى. ۇيىمداستىرۋشىلار – قر ۇلتتىق سپورت قاۋىمداستىعى مەن ونىڭ قۇرامىنا كىرەتىن «JORYQ» ات سپورتى فەدەراتسياسى.
فيلمدە 2023 جىلى وتكەن «ۇلى دالا جورىعى» مارافونى تۋرالى باياندالادى. وسى جورىققا قاتىسۋشىلار استانادان تۇركىستانعا دەيىن 1300 شاقىرىم جول ءجۇرىپ وتكەن ەدى. مارافون 14 كەزەڭگە ءبولىنىپ, وعان ەلىمىزدىڭ 19 وڭىرىنەن ءبىر كوماندادان قاتىستى.
ەكىنشى مارافوننىڭ قورىتىندىسى بويىنشا 1300 شاقىرىم جولدى 93 ساعات 47 مينۋت 43 سەكۋندتا ءجۇرىپ وتكەن جەتىسۋ وبلىسىنىڭ كومانداسى ابسوليۋتتى چەمپيون اتاندى. سونىمەن قاتار, ماڭعىستاۋ وبلىسىنىڭ شاباندوزى ماعجان ابدولۇلى 50 شاقىرىمدى 1 ساعات 33 مينۋتتا ءجۇرىپ ءوتىپ, الەمدىك رەكورد ورناتتى.
«AMANAT» پارتياسىنىڭ اتقارۋشى حاتشىسى داۋلەت كارىبەك تەڭدەسى جوق «ۇلى دالا جورىعى» مارافون-بايگەسى از ۋاقىتتىڭ ىشىندە حالقىمىزدىڭ سۇيىكتى جارىسىنا, كوزايىمىنا اينالعانىن اتاپ ءوتتى.
«مەملەكەت باسشىسىنىڭ قولداۋىمەن باستالعان «ۇلى دالا جورىعى» بايگەسى ۇلتتىق سپورتتىڭ دامۋىنا عانا ەمەس, ۇلتتىق بولمىسىمىز بەن تاريحىمىزدى تانۋعا, ۇلتتىق رۋحتىڭ ويانۋىنا زور قوزعاۋ سالىپ وتىر. بايگە-مارافونعا «AMANAT» پارتياسىنىڭ توراعاسى ەرلان جاقانۇلى قوشانوۆ تا ۇنەمى قولداۋ كورسەتىپ كەلەدى. ءبىز دە ءاردايىم وسى يگى شارانىڭ باسى-قاسىندا بولا بەرەمىز. «ۇلى دالا جورىعىنان» كەيىن قوعامدا, اسىرەسە جاستاردىڭ اراسىندا جىلقىعا, ۇلتتىق سپورتقا دەگەن قىزىعۋشىلىقتىڭ ەسەلەپ ارتقانىن كورىپ وتىرمىز. قازىرگى ۋاقىتتا جىلقى ۇلتتىق برەندىمىزگە اينالدى دەۋگە بولادى. سوندىقتان, بۇگىنگى دەرەكتى ءفيلمدى بولاشاقتا جىلقى تۋرالى تۇسىرىلەتىن ونەر تۋىندىلارىنىڭ, كوركەم فيلمدەردىڭ ءىزاشارى دەپ بىلەمىن», – دەدى داۋلەت كارىبەك.
كينوكارتينادا شاباندوزداردىڭ جارىسقا دايىندىعى, ولاردىڭ قيىندىقتاردى قالاي جەڭگەنى جانە جەڭىسكە دەگەن ۇمتىلىسى كورسەتىلەدى. فيلم قازاق حالقىنىڭ وتكەن كوشپەلى ءومىر سالتى مەن قازىرگى قازاقستاننىڭ كەلەشەك كوكجيەگىن بىرىكتىرە وتىرىپ, ۇلتتىق رۋحتى جاڭعىرتادى.
فيلمدە ات مارافونىنا قاتىسۋشىلار ساپار بارىسىندا باسىنان وتكەن وقيعالارى تۋرالى اڭگىمەلەپ, شىنايى ەموتسياسىمەن بولىسەدى. ولار ۇلى دالا ءتوسىن كوكتەي ءوتىپ, كوشپەندىلەردىڭ شىنايى الەمىنە ەنۋگە مۇمكىندىك العاندارىن ايتادى.
«ءبىز وسى بىرەگەي جوبانى قاتارىنان ءۇشىنشى جىل وتكىزگەلى وتىرمىز. «ۇلى دالا جورىعى» كۇزدە ەلىمىزدە وتەتىن 5-ءشى دۇنيەجۇزىلىك كوشپەندىلەر ويىندارىنىڭ باعدارلاماسىنا ەنگىزىلدى. ياعني, جورىق حالىقارالىق دەڭگەيگە كوتەرىلدى. وسى جوبانىڭ ارقاسىندا ەلىمىزدە ۇلتتىق سپورت جانە ات سپورتى ونەرى دامي تۇسەدى دەپ ۇمىتتەنەمىز», – دەدى قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ.
دەرەكتى ءفيلمنىڭ تۇساۋكەسەرىنە كەلگەن قوناقتاردىڭ قاتارىندا وتكەن جىلى وسى مارافون-بايگەگە قاتىسۋشىلار, سپورت سالاسىنىڭ وكىلدەرى, پارلامەنت دەپۋتاتتارى, قوعام قايراتكەرلەرى, شەتەلدىك ديپلوماتيالىق كورپۋس وكىلدەرى جانە ت.ب. بولدى. ايتا كەتەيىك, وسى جەكسەنبىدە پاۆلودار-استانا باعىتى بويىنشا ءۇشىنشى «ۇلى دالا جورىعى» مارافون-بايگەسى باستالادى.
«ۇلى دالا جورىعى» دەرەكتى ءفيلمىن «Black&White» كومپانياسى ءتۇسىردى. جوبانىڭ سەرىكتەستەرى – «سامۇرىق-قازىنا» اق جانە «Sport Qory» سپورتتى قولداۋ قورى.
ەسكە سالا كەتەيىك, رەسپۋبليكالىق «JORYQ» فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە بايگە, كوكپار, تەڭگە ءىلۋ, اۋدارىسپاق, جامبى اتۋ, قۇسبەگىلىك, ساداق اتۋ, اسىق اتۋ جانە ت.ب. فەدەراتسيالار بار. قر ۇلتتىق سپورت قاۋىمداستىعىن بەلگىلى كاسىپكەر, مەتسەنات, «Altyn Qyran Foundation» قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.
