Umai-2023 ۇلتتىق سىيلىعىن استانا قالاسى اكىمدىگىنە قاراستى قوس تەاتر يەلەندى. اتاپ ايتقاندا, «ۇزدىك مۋزىكالىق-درامالىق سپەكتاكل» اتالىمىندا مۋزىكالىق جاس كورەرمەن تەاترىنىڭ «گاۋھارتاس» مۋزىكالىق دراماسى ۇزدىك دەپ تانىلدى. ال «ۇزدىك سپەكتاكل» نوميناتسياسىن م.گوركي اتىنداعى مەملەكەتتىك اكادەميالىق ورىس دراما تەاترىنىڭ «جازدىڭ سوڭى» تراگيكومەدياسى الدى.
بيىلعى اقپان ايىندا پرەمەراسى انشلاگپەن وتكەن «گاۋھارتاستىڭ» اۆتورى – كورنەكتى جازۋشى-دراماتۋرگ, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك ەرى دۋلات يسابەكوۆ. سپەكتاكلدىڭ قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى اسحات ماەميروۆ. قويىلىم جۇرتشىلىقتىڭ ۇلكەن قىزىعۋشىلىعىن تۋدىردى. جىل بويى كورەرمەن تولاستامادى. سول سەبەپتەن تەاتر ۇجىمى «گاۋھارتاستى» كۇنىنە بىرنەشە رەت قويۋعا شەشىم قابىلدادى. سوندا دا بيلەت تابا الماعاندار بولدى. سپەكتاكل پرەمەراسى وتكەن كۇننەن باستاپ, 8 ايدىڭ ىشىندە كورەرمەن نازارىنا 155 مارتە ۇسىنىلدى. قويىلىمدى 65 مىڭعا جۋىق ادام تاماشالادى.
ال «جازدىڭ سوڭى» تراگيكومەدياسى امەريكالىق دراماتۋرگ ترەيسي لەتتستىڭ «تامىز: وسەيدج گرافتىگى» شىعارماسى جەلىسىمەن قويىلدى. قويۋشى رەجيسسەرى – اننا ترويانوۆا. پرەمەراسى تاياۋدا عانا وتكەن تۋىندىدا كەيىپكەردى سومداعان قازاقستاننىڭ ەڭبەك سىڭىرگەن ءارتىسى ناتاليا كوسەنكو (ترەگۋبەنكونىڭ) ونەرى دە ەلەندى. ول «اكتەرلىك شەبەرلىك (ۇزدىك ايەل ادام ءرولى)» اتالىمىنا قاتىسىپ, فينالعا دەيىن جەتتى. وعان ارنايى ديپلوم تاپسىرىلدى.
