ۆانداليزم جاساعاندار 50 تاۋلىككە دەيىن قاماۋعا الىنۋى مۇمكىن. بۇل تۋرالى ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ ايتتى, دەپ حابارلايدى astana-akshamy.kz.
«مەملەكەت باسشىسى ءۆانداليزمدى جاعىمسىز قۇبىلىس دەپ, ونىمەن كۇرەسۋ كەرەكتىگىن اتاپ ءوتتى. سول سەبەپتى وسى زاڭ جوبالارىنا وزگەرىستەر ەنگىزىلىپ جاتىر. ۆانداليزم ۇعىمى قولدانىستاعى زاڭمەن بىرگە قالادى. بۇل تاريحي-مۇرا نىساندارىن, تاريحي جانە مادەني ەسكەرتكىشتەرىن, ۇكىمەت قورعايتىن تاريح نىساندارىن سۋرەت پەن باسقا دا ادامگەرشىلىككە جاتپايتىن ارەكەتتەرمەن قورلاۋ دەپ تانىلىپ وتىر. ۇعىم قالا بەرەدى. ال جازا كۇشەيتىلەدى. مىسالى, ايىپپۇل 100-دەن 200 اەك-كە دەيىن ۇلعايتىلادى. بۇگىندە ول 50-دەن 160 اەك اراسىندا. ال قاماۋعا الۋ مەرزىمى بۇگىندە 40 تاۋلىك بولسا, ەندى 50 تاۋلىككە دەيىن ارتتىرىلادى. مۇنداي ارەكەتتەردى بىرنەشە رەت نەمەسە توپپەن ىستەسە 3 جىلعا دەيىن باس بوستاندىعىنان ايىرىلۋى مۇمكىن. مۇنداي جاۋاپكەرشىلىك قازىرگى زاڭدامادا جوق», — دەدى مارات قوجاەۆ سەناتتىڭ جالپى وتىرىسىندا.
سونىمەن قاتار ول اكىمشىلىك كودەكسكە ەنگىزىلەتىن وزگەرىستەر مەن تولىقتىرۋلارعا توقتالدى.
«اكىمشىلىك كودەكستىڭ 434-بابىنىڭ تاعى ءبىر بولىگى بولادى. جات ارەكەتتەر قوعامدىق ينفراقۇرىلىمعا كادىمگىدەي شىعىن كەلتىرەدى. سوندىقتان جاۋاپكەرشىلىك كۇشەيتىلەدى. ايىپپۇل 20-دان 50 اەك دەيىن وسەدى. ال قاماۋعا الۋ 15-تەن 20 تاۋلىككە دەيىن ارتادى ال ەگەر وسى ارەكەتتەر 1 جىلدىڭ ىشىندە قايتالانسا, قاماۋعا الۋدىڭ ەڭ جوعارى مەرزىمى قولدانىلادى», — دەدى ول.
ايتا كەتەيىك, بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ادام ساۋداسىنا, ۆانداليزم كورىنىسىنە جانە بوتەننىڭ مۇلكىن بۇلدىرۋگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ادام ساۋداسىنا, ۆانداليزم كورىنىسىنە جانە بوتەننىڭ مۇلكىن بۇلدىرۋگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭدارى 1-وقىلىمدا ماقۇلداعان ەدى.
