استانا قالاسى اكىمدىگىنىڭ بەلسەندى ۇزاق ءومىر ءسۇرۋ ورتالىعىنىڭ زەينەتكەرلەرى شالا تۋعان نارەستەلەرگە ارناپ كيىم-كيشەك توقۋدى داستۇرگە اينالدىرعان بولاتىن. قايىرىمدىلىق اكتسياسىن ەكىنشى جىل قاتارىنان جالعاسىپ كەلەدى, دەپ حابارلايدى astana-akshamy.kz
ادەتتەگىدەي, 1 ماۋسىم – بالالاردى قورعاۋ كۇنى قارساڭىندا ورتالىقتىڭ ونەرلى اجەلەرى نارەستەلەرگە تابيعي جۇننەن شۇلىق توقۋ جۇمىستارىن باستاپ كەتتى.
بيىلعى جىلى اجەلەردىڭ بۇل يگى باستاماسىنا استانا قالاسىنىڭ ەرىكتى جاستارى قولداۋ كورسەتتى. ولار تابيعي جۇننەن جاسالعان توقىما جىپتەرىن ساتىپ الۋ ءۇشىن قارجى جيناپ, زەينەتكەرلەرگە 30-دان اسا تابيعي ءجۇن ونىمدەرىن ساتىپ الىپ بەردى.
«قايىرىمدىلىق ءىس-شاراسىن ەكىنشى جىل قاتارىنان ۇيىمداستىرىپ جاتىرمىز. بىلتىر اجەلەرىمىز استانا قالاسىنداعى پەرزەنتحانالاردا ەم الىپ جاتقان مەرزىمىنەن بۇرىن تۋعان نارەستەلەرگە 30-دان استام شۇلىق توقىپ بەرگەن ەدى. بيىل دا, بۇل يگى شارانى جالعاستىرۋدى ءجون كوردىك. تابيعي جۇننەن توقىلعان كيىمدەردىڭ ءسابي دەنساۋلىعى ءۇشىن پايداسى زور, شالا تۋعان بالالاردىڭ تىنىس الۋ جۇيەسىن جاقسارتادى. بالالار مەرەكەسى قارساڭىندا قايىرىمدىلىق اكتسياسىنا قاراجات جيناۋدى ۇيىمداستىرعان بەلسەندى جاستار داۆيد ءشارىپوۆ پەن دانيال كەلگەنباەۆقا العىس بىلدىرەمىز!» – دەپ ءسوزىن تۇيىندەدى بەلسەندى ۇزاق ءومىر ءسۇرۋ ورتالىعىنىڭ ءبولىم باسشىسى روزا ماۋسىمباەۆا.
