بىرىڭعاي ۋاقىت بەلدەۋىنە كوشۋگە بايلانىستى قازاقستاندا جۇمىس كەستەسى وزگەرۋى مۇمكىن, دەپ حابارلايدى astana-akshamy.kz
بۇل تۋرالى جۋرناليستەرگە ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ايتتى.
«ناۋرىزدان باستاپ ءبىز جاڭا ۋاقىت بەلدەۋىنە كوشتىك, قازىر كۇن ەرتە اتادى. الەۋمەتتىك جەلىلەردە ءارتۇرلى ۇسىنىستار ايتىلىپ ءجۇر, سونىڭ ىشىندە قىستا قاراڭعى ەرتە تۇسەتىندىكتەن, جۇمىس كۇنىن ءبىر ساعات بۇرىن باستاۋ. بۇعان قالاي قارايسىز؟ مۇنداي جوسپارلار بار ما؟», – دەپ سۇرادى جۋرناليستەر جاقىپوۆادان ۇكىمەت كۋلۋارىندا.
مينيستر جۇمىس بەرۋشى مەن قىزمەتكەرلەر جۇمىس كەستەسىن قايتا قاراۋعا كەلىسە الاتىنىن ءتۇسىندىردى, ويتكەنى شارت ەكى تاراپپەن كەلىسىلەدى جانە جاسالادى.
«كوپتەگەن ۇسىنىس بار, ولاردى بىرىڭعاي فورماتتا قاراستىرامىز جانە جاۋاپ بەرەمىز: جۇمىس بەرۋشى مەن جۇمىسشىلار اراسىندا كەلىسىمشارت بار جانە ولار جۇمىس كەستەسى تۋرالى كەلىسە الادى. جۇمىستان قاراڭعىدا شىقپاس ءۇشىن, ەگەر قازىر, مىسالى, جۇمىس كۇنى ساعات 09:00-دە باستالسا, ولار جۇمىستى 08:00-دە باستاۋعا كەلىسە الادى, سودان كەيىن جۇمىس بەرۋشى جۇمىس كۇنىن ءبىر ساعاتقا قىسقارتۋدى قاراستىرۋى مۇمكىن. بۇل قيىن ەمەس, قىزمەتكەر مەن جۇمىس بەرۋشى كەلىسە الادى», – دەپ جاۋاپ بەردى سۆەتلانا جاقىپوۆا.
