10-13 ماۋسىم ارالىعىندا اباي وبلىسىنداعى «اباي-شاكارىم» مەموريالدىق كەشەنىندە XXV رەسپۋبليكالىق «اباي وقۋلارى» وتەدى. كوركەمسوز بايقاۋىنا 8-11 سىنىپ وقۋشىلارى قاتىسۋدا, دەپ حابارلايدى astana-akshamy.kz.
بايقاۋدىڭ ماقساتى – قازاق حالقىنىڭ ادەبي مۇراسىن دارىپتەۋ, مەكتەپ وقۋشىلارىنىڭ كلاسسيكالىق قازاق ادەبيەتىن وقۋعا دەگەن قىزىعۋشىلىقتارىن ارتتىرۋ, اباي مەن شاكارىم شىعارمالارىنداعى ەستەتيكالىق تالعام مەن تۇلعالىق قاسيەتتى ناسيحاتتاۋ, ۇلىلار پوەزياسىنا, ۇلتتىڭ رۋحاني مۇراسىنا دەگەن سۇيىسپەنشىلىككە تاربيەلەۋ.
سالتاناتتى شارانىڭ اشىلۋىندا وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ توراعاسى قانىبەك جۇماشەۆ جاس تالانتتارعا ساتتىلىك تىلەدى.
«اباي وقۋلارى وقۋشىلاردىڭ رۋحاني دامۋىنا ەرەكشە اسەر ەتەتىن قوعامدىق – مادەني شارا ەكەندىگى جىل سايىن ايقىندالىپ كەلەدى. ەلىمىزدىڭ تۇكپىر-تۇكپىرىنەن جاس دارىنداردىڭ باسىن قوساتىن كيەلى مەكەندە ءار قاتىسۋشى ءسوز ونەرى شىڭىندا سىنالادى, قابىلەت قارىمىن ارتتىرادى. قازىرگى جاڭا بۋىن اباي مۇراسىنان ءنار الىپ, ونىڭ اسىل سوزدەرىن, اسقاق پوەزياسىن, تەرەڭ فيلوسوفياسىن بويىنا ءسىڭىرىپ وسۋگە ءتيىس», – دەدى قانىبەك جۇماشەۆ.
رەسپۋبليكالىق قورىتىندى كەزەڭدە 130-دان اسا جاس دارىن 6 نوميناتسيا بويىنشا باق سىناسادى: «ولەڭ – ءسوزدىڭ پاتشاسى, ءسوز ساراسى», «ابايدىڭ قارا سوزدەرى», «ابايدىڭ اقىن شاكىرتتەرىنىڭ شىعارمالارى», «كوڭىلىم ءاندى ۇعادى», «جۇيرىكتەن جۇيرىك وزار جارىسقاندا», «ءسوز ونەرىندەگى ۇلى اباي بەينەسى».
باستى شارت – قاتىسۋشىلار اباي شىعارمالارىن جاتقا ايتۋى ءتيىس.
ايتا كەتۋ كەرەك, اباي وقۋلارىنىڭ جۇلدەگەرلەرى قازاقستان رەسپۋبليكاسى وقۋ-اعارتۋ مينيسترلىگىنىڭ ءى, ءىى, ءىىى دارەجەلى ديپلومدارىمەن جانە التىن, كۇمىس, قولا مەدالدارمەن ماراپاتتالادى. سونداي-اق «دارىن» رەسپۋبليكالىق عىلىمي-تاجىريبەلىك ورتالىعىنىڭ اتىنان گراموتالار مەن باعالى سىيلىقتار تاپسىرىلادى.
