استانا قالاسىنىڭ اكىمى جەڭىس قاسىمبەك Instagram پاراقشاسىندا مەديتسينا قىزمەتكەرلەرىنىڭ ەڭبەگى تۋرالى ايتتى, دەپ حابارلايدى astana-akshamy.kz.
«مەديتسينا قىزمەتكەرلەرىن كاسىبي مەرەكەلەرىمەن قۇتتىقتايمىن! دەنساۋلىق – قولىمىزدا بار ەڭ قۇندى نارسە, ال سىزدەر – ءبىزدىڭ باستى قاھارماندارىمىز وسى جولدا كۇن سايىن توقتاۋسىز ەڭبەك ەتىپ جۇرسىزدەر.
ەلوردانىڭ مەملەكەتتىك دەنساۋلىق ساقتاۋ سەكتورىندا 12 مىڭعا جۋىق مەديتسينا قىزمەتكەرى جۇمىس ىستەيدى. سىزدەردىڭ ارقايسىلارىڭىز ۇلتىمىزدىڭ دەنساۋلىعىنا باعا جەتپەس ۇلەس قوسىپ كەلەسىزدەر.
بىلتىر ەمحانالاردىڭ دارىگەرلەرى 10 ميلليوننان استام قابىلداۋ وتكىزدى, جەدەل جاردەم قىزمەتكەرلەرى 700 مىڭنان استام شاقىرۋعا شىقتى. ەلوردا ستاتسيونارلارى 200 مىڭعا جۋىق ناۋقاستىڭ ءومىرىن ساقتاپ قالدى, ءجۇز مىڭنان استام كۇردەلى وپەراتسيا جاسالدى. سىزدەر 30 مىڭنان استام ءسابيدىڭ ومىرگە كەلۋىنە كومەكتەستىڭىزدەر! وسى ساندارعا قاراپ-اق ۇلكەن جۇمىستارىڭىز بەن ادال ەڭبەكتەرىڭىز تۋرالى ايتۋعا بولادى.
مەملەكەت باسشىسى دەنساۋلىق ساقتاۋ جۇيەسىن دامىتۋ, دارىگەرلەردى جان-جاقتى قولداۋ – مەملەكەتتىڭ باسىم مىندەتتەرىنىڭ ءبىرى ەكەنىن اتاپ ءوتتى.
ءبىز مەديتسينا قىزمەتكەرلەرى مەن ناۋقاستار ءۇشىن قولايلى جاعداي جاساۋ بويىنشا جۇمىستى جالعاستىرامىز. الداعى ءۇش جىلدا 11 دەنساۋلىق ساقتاۋ نىسانىن, ونىڭ ىشىندە 2 پەريناتالدىق ورتالىقتى, 2 جاڭا زاماناۋي كوپسالالى اۋرۋحانانى, ونىڭ ىشىندە بالالار اۋرۋحاناسىن, 2 مەملەكەتتىك جانە 5 جەكە ەمحانانى سالۋدى جوسپارلاپ وتىرمىز.
مەديتسينالىق ۇيىمداردى زاماناۋي تەحنيكامەن قامتاماسىز ەتۋ, مەديتسينا قىزمەتكەرلەرىنىڭ بىلىكتىلىگىن ارتتىرۋ ماڭىزدى مىندەت بولىپ سانالادى.
اقحالاتتى جانداردى كاسىبي مەرەكەمەن قۇتتىقتايمىن! سىزدەرگە زور دەنساۋلىق, باقىت جانە اماندىق تىلەيمىن!» – دەپ جازدى ەلوردا اكىمى.
