ەلوردا جولدارىندا 21 اقپاننان باستاپ «Ekin Patrol G2» ءموبيلدى اپپارات-باعدارلاما كەشەنىمەن جابدىقتالعان 5 ەكيپاج پاترۋلدەيتىن بولادى. بۇل قالادا جول قوزعالىسى قاۋىپسىزدىگىن قامتاماسىز ەتۋگە مۇمكىندىك بەرەدى.
استانا قالاسى پوليتسيا دەپارتامەنتى باستىعىنىڭ ءبىرىنشى ورىنباسارى ەلدار دانياروۆتىڭ ايتۋىنشا, جاڭا جوبا قاراما-قارسى جانە ءبىر باعىتتا كەلە جاتقان اۆتوكولىكتەردىڭ جىلدامدىق رەجيمىن بۇزۋشىلىقتى انىقتايدى.
– «Ekin Patrol G2» ءموبيلدى اپپارات-باعدارلاما كەشەنى 360 گرادۋسقا جان-جاعىن شولىپ قارايتىن پانورامالىق باقىلاۋ تەتىگى ارقىلى ىزدەۋدە جۇرگەن كولىك قۇرالدارىن تانۋعا جول اشادى. بۇل فۋنكتسيا وسىنداي اۆتوكولىكتەردى ۇستاۋعا جەدەل ارەكەت جاساۋعا ىقپال ەتەدى. كەشەن ءموبيلدى ءارى كوپفۋنكتسيونالدى بولعاندىقتان, بۇزۋشىلىقتى تىركەيتىن ستاتسيونارلىق كامەرالارى جوق كوشەلەردىڭ ۋچاسكەلەرىندە جىلدامدىق رەجيمىن بۇزۋشىلىقتار تىركەلەدى, – دەدى ەلدار دانياروۆ.
جالپى ەنگىزىلىپ جاتقان باعدارلاما جول قاۋىپسىزدىگى دەڭگەيىن ارتتىرۋعا جانە قوعامدىق ءتارتىپتىڭ قامتاماسىز ەتىلۋىن باقىلاۋعا مۇمكىندىك بەرەدى.
